Statkievič zaklikaje na 1 Maja vychodzić nie na Banhałor, a na Kastryčnickuju
Pradstaŭniki prafsajuzaŭ vyznačylisia z płanami na akcyju da 1 Maja. U Minharvykankam była padadzienaja zajaŭka na zbor la Akademii navuk, šeście pa Surhanava, a taksama mitynh u parku Družby narodaŭ kala płoščy Banhałor.
Svaju akcyju ŭ Dzień pracy taksama płanuje pravieści Mikałaj Statkievič. Ci supadajuć jahonyja płany z płanami partyjnaj apazicyi i prafsajuzaŭ?
«Biełaruski nacyjanalny kanhres płanuje zładzić akcyju 1 Maja na Kastryčnickaj płoščy ŭ Minsku. Heta budzie akcyja ŭ farmacie sustrečy, narodnaha schodu, mitynhu. My prapanavali hramadstvu prajekt rezalucyi, jaki možna dapaŭniać, mianiać, unosić svaje karekciroŭki. Heta dakumient budzie prapanavany da pryniaćcia na Kastryčnickaj.
Škada, što kalehi nie padtrymali prapanavany nami varyjant, ale heta ichniaja sprava. Kožny zmoža vybrać sabie.
Na nas ułada moža paŭździejničać tolki brutalnymi dziejańniami, a nie dazvołami ci zabaronami. Pahladzim, ci vyčarpali jany limit hetych brutalnych mietadaŭ, ci buduć spyniać ludziej hvałtoŭna.
My nie budziem paŭtarać pamyłki 25 Sakavika, kali pahadzilisia na zbor la Akademii navuk dziela adzinstva apazicyi, adnak nijakaha adzinstva nie atrymałasia. Uvohule paśla Dnia Voli, paśla brutalnych dziejańniaŭ ułady, znoŭ dazvolić sabie pajści na miesca vyhułu sabak aznačaje źlić pratest vielmi na doŭhi čas.
My pamiatajem, što piać hadoŭ u centry Minska nie było nivodnaj akcyi pratestu. Tolki paŭtara hoda tamu my viarnuli sabie prastoru ŭ centry stalicy, trymali jaje. My pavinny zachavać hetaje miesca, bo jano patrebna dla budučyni.
Havorka na 1 Maja taksama budzie vieścisia pra losy dziasiatkaŭ ludziej, jakija pa sfabrykavanym abvinavačańni znachodziacca ŭ źniavoleńni. Kali my chočam ich abaranić, to my nie pavinny być zapałochanyja.
1 Maja — heta dziaržaŭnaje śviata, i my prydumajem, kab na Kastryčnickaj była atmaśfiera śviata. Dzień pracy — heta važna. Pracaj fizičnaj i intelektualnaj zroblena ŭsio, čym my karystajemsia. Akramia taho, heta Mižnarodny dzień salidarnaści pracoŭnych. A tyja ludzi, što siońnia znachodziacca ŭ źniavoleńni, patrabujuć našaj salidarnaści. Usie hetyja faktary buduć spałučanyja».
Kamientary