Padvodziačy vyniki pieršych 100 dzion svajho prezidenctva, Donald Tramp zajaviŭ, što ličyć ich «samymi paśpiachovymi ŭ historyi krainy», paviedamlajuć infarmahienctvy.
U svaim vystupie ŭ štacie Piensilvanija amierykanski prezident padkreśliŭ, što ščyra vieryć, što pieršyja 100 dzion jaho administracyi byli «samymi paśpiachovymi ŭ historyi krainy».
Padčas vystupu prezident zakranuŭ pytańni handlu, mihracyi, pracoŭnych miescaŭ. Jon paabiacaŭ pabudavać na miažy ź Mieksikaj ścianu, što dazvolić bolš efiektyŭna zmahacca ź nielehalnaj imihracyjaj. Taksama Tramp paabiacaŭ, što ŭsie krainy NATA buduć ŭnosić svoj finansavy ŭkład va ŭmacavańnie biaśpieki błoka.
Prezident taksama paabiacaŭ hramadzianam adno z najbujniejšych u historyi krainy skaračeńnie padatkaŭ. Pa słovach Trampa, jaho administracyja «prapanuje bujnyja padatkovyja lhoty dla siaredniaha kłasa i panižeńnie padatkaŭ dla biźniesu z 35% da 15%».
«Vy ŭbačycie: kampanii buduć raźvivacca, jany viernucca ŭ našu krainu i bolš nie buduć jaje znoŭ pakidać, tamu što padatki i rehulatyŭnyja normy buduć sumlennymi», — skazaŭ Tramp.
Akramia taho, Donald Tramp raskrytykavaŭ amierykanskija ŚMI i abvinavaciŭ ich u vytvorčaści fejkaŭ. Jon zajaviŭ, što kali praca ŚMI — być sumlennymi i kazać praŭdu, to jany zasłuhoŭvajuć «tłustaj dvojki».
Na štohadovuju viačeru Asacyjacyi karespandentaŭ pry Biełym domie Tramp nie pajechaŭ. Asacyjacyja karespandentaŭ źjaviłasia bolš za 100 hadoŭ tamu, u 1914 hodzie, i z 1921 hoda jaje śpiecyjalnyja viačery tradycyjna naviedvali prezidenty ZŠA. Tramp parušyŭ tradycyju.
«Viadučyja (łžyvyja) ŚMI admaŭlajucca ahučvać śpis našych dasiahnieńniaŭ, u tym liku 28 padpisanych zakonaŭ, uzmacnieńnie na miežach i vielizarny aptymizm», — napisaŭ jon u tvitary.
Kamientary