Zabojca hieja Piščeŭskaha vyjšaŭ na volu i nie płacić hrošaj, bo biespracoŭny
Amal try hady tamu kala mienskaj kaviarni «Andervołd» u vyniku kanfliktu atrymaŭ śmiarotnuju traŭmu hałavy biznesoviec, hiej Michaił Piščeŭski — jaho ŭdaryŭ były nastaŭnik fizkultury Źmicier Łukaševič, jaki admysłova pryjšoŭ da kaviarni, dzie hiei źbiralisia na viečarynu, kab abražać ludziej nietradycyjnaj seksualnaj aryjentacyi kryŭdnymi słovami.
Hetak vyśvietliŭ pieršy sud nad Łukaševičam, jaki prachodziŭ, kali Piščeŭski jašče lažaŭ u komie. Što toj pačuŭ ad Łukaševiča kryŭdnaje słova, što pierapytaŭ «chto tut p….ry?» i adrazu ž atrymaŭ kułakom u skroń. Dalej dla Piščeŭskaha byli ŭdar hałavoj ab asfalt, nieprytomnaść, aperacyja, koma z probliskami prytomnaści, pakuty i śmierć u kastryčniku 2015 hodu. A dla Łukaševiča (jaki źbieh, ale potym viarnuŭsia na miesca złačynstva) — śledztva pad vartaj, pieršy i druhi sud, prysud u 2 hady kalonii, daterminovaje vyzvaleńnie pa amnistyi i znoŭ sud, jaki naniasieńnie ciažkaj traŭmy pierakvalifikavaŭ u zabojstva pa nieaściarožnaści dy prysudziŭ złačyncu ŭžo 3 hady źniavoleńnia. Pry hetym sud tak i nie pryznaŭ u dziejańniach Dźmitryja Łukaševiča varožaści pavodle hamafobii, čaho damahałasia advakatka.
Treci sud pa spravie hieja Michaiła Piščeŭskaha adbyŭsia ŭ lipieni 2016 hodu. Pavodle padlikaŭ presy, na volu pryznany ŭ zabojstvie Dźmitry Łukaševič pavinien byŭ vyjści ŭ kancy leta 2017-ha. Akazałasia, Łukaševič užo 5 miesiacaŭ jak vyjšaŭ daterminova.
«Dy jon užo na voli sa studzienia. Skazała sudovaja vykanaŭca, što dahetul nidzie nie pracuje, tamu hrošaj ad jaho my nie atrymlivajem. Jak siadzieŭ paśla sudu spačatku ŭ SIZA, a potym trapiŭ u kaloniju, dyk za hety čas sudovyja vykanaŭcy zmahli ź jaho spahnać tolki pa 50 rubloŭ nam z bratam dy 120 maci. Usiaho 220. Heta ŭsio za 9 miesiacaŭ. Majomaści ŭ jaho, skazali, niama, brać niama čaho. Karaciej, namiakali nam padčas sudu, što ničoha my ad jaho nie atrymajem, hetak i vychodzić», — skazała karespandentu Svabody siastra niabožčyka Michaiła Piščeŭskaha Taciana.
Sud prysudziŭ spahnać sa Źmitra Łukaševiča ŭ jakaści kampensacyi za maralnuju škodu 10 tysiač rubloŭ na karyść maci Michaiła Piščeŭskaha Valanciny Fiodaraŭny, i pa 5 tysiač rubloŭ — jahonym bratu Vitalu i siastry Tacianie.
Pytajusia ŭ Taciany: jak skłałasia ichnaje žyćcio paśla sudu nad zabojcam brata?
«Dy niejak pacichu narmalizujecca. Adpłakali, adharavali, krychu supakoilisia. Chacia na mohiłkach byvajem vielmi časta, ale ŭžo nia tak usio baluča, jak było adrazu. Tolki jak uspaminajem, što Miša pakutavaŭ, kali lažaŭ u komie, dyk vielmi drenna znoŭ. Usio abmiarkoŭvali heta, i padumałasia, što lepš by jon Mišu adrazu zabiŭ, čym hetak prymusiŭ mučycca. Razumieju, što nielha hetak kazać i dumać, ale voś dumajecca. A ŭ nas pakrychu lepš. Maci žyvie sa mnoj, na pracu ŭžo nie pajšła. Dačka ŭ mianie padrastaje, užo 4 hady. Sama pracuju. Brat Vitalik znajšoŭ inšuju dziaŭčynu, taja ž žonka jaho kinuła, jak siadzieŭ ź Mišam, dyk užo žanicca źbirajucca. Moža, budzie ŭsio znoŭ dobra. Chacia biaź Mišy heta ŭžo nia toje. My jaho zaŭsiody ŭspaminajem i nikoli nie zabudziem».
17 traŭnia ŭ śviecie adznačajecca Mižnarodny dzień baraćby z hamafobijaj. Biełaruskija pravaabaroncy kažuć, što ŭ krainie spravy ab hamafobii amal nie dachodziać da sudu ci atrymlivajuć zusim inšuju kvalifikacyju.
«Viedaju tolki adzin vypadak, kali sud pryznaŭ, što złačynstva ŭčynili z pryčyn hamafobii. U lutym 2016 hodu Pieršamajski sud Miensku pryznaŭ, što na maładoha čałavieka napali, źbili i abrabavali jaho mienavita tamu, što jon hiej. Ale, na žal, hety matyŭ — hamafobija — nia byŭ pryznany ŭ spravie ab zabojstvie Michaiła Piščeŭskaha», — kaža pravaabaronca «Viasny» Taciana Raviaka.
Kamientary