Padobna na toje, biełaruskija čynoŭniki chutka zaryjentavalisia — i znajšli novuju achviaru, jakuju možna «daić» bieź lišniaha šumu.
Paśla niaŭdałaj sproby sabrać «krychu» hrošaj u biudžet z «darmajedaŭ», jakaja daviała da masavych pratestaŭ, ułady ŭzialisia za inšuju hrupu nasielnictva — pradprymalnikaŭ.
Z 1 krasavika pradstaŭnikam małoha biznesu taksama pačali prychodzić «listy ščaścia» — ad ich patrabujuć zapłacić zbor u Fond sacyjalnaj abarony nasielnictva. Pryčym znoŭ pa vielmi chitraj schiemie, paviedamlaje gazetaby.com.
Navat kali pradprymalnik nie vioŭ nijakaj dziejnaści ŭ 2016 hodzie, jon pavinien zapłacić dziaržavie padatak — bolš za 950 rubloŭ. Akramia taho, kali biełarus, zarehistravany ŭ jakaści IP, chacia b na dzień praterminavaŭ apłatu zboru, dziaržava vypisvaje jamu štraf — i praz sud dadaje jašče 10—20% ad niavypłačanaj sumy.
Jak raspaviała adna z supracoŭnic FSAN u razmovie z karespandentam «Salidarnasci», ukazańnie štrafavać usich zapar pryjšło «źvierchu». Žančyna taksama dadała, što ŭ hetym hodzie sudy zavalenyja administracyjnymi spravami na ipešnikaŭ.
— Štrafaŭ prosta mora siniaje, u minułym hodzie takoha nie było, — pryznałasia jana.
Zbor i štrafy pryjdziecca zapłacić navat biespracoŭnym biełarusam, jakija zarehistravalisia ŭ jakaści pradprymalnikaŭ, kab znajści choć niejkuju padpracoŭku. Pad udaram apynulisia i siezonnyja rabotniki, jakija zarehistravali IP, kab pracavać aficyjna.
Niešta padkazvaje, što prostyja biełarusy naŭrad ci vyjduć na płoščy svaich haradoŭ, kab abaranić biełaruskich ipešnikaŭ, a značyć — čynoŭniki atrymlivajuć dobruju mahčymaść «daić» samuju ŭraźlivuju častku biełaruskaha biznesu. Pryčym bieź lišniaha šumu.
Samaje sumnaje, što pad ciskam uładaŭ pradprymalnikaŭ stanovicca ŭsio mienš. Da prykładu, pa dadzienych na 1 lutaha za hod kolkaść zarehistravanych IP u Biełarusi skaraciłasia na 19,8 tysiač. A ŭ situacyi, kali ŭ krainie faktyčna źnikaje mały biznes, ab vychadzie z ekanamičnaha kryzisu kazać nie davodzicca.
Ciapier čytajuć
«Dyjalekt padazrony». Śpiavak Siaroha pryjšoŭ na rasijskaje realici i sabraŭ usich chejtaraŭ5
Kamientary