Ranicaj 9 červienia prybiralščyca ekśpierymientalnaha cecha homielskaha zavoda «Kamintern» jak zvyčajna pryjšła na pracu kala pałovy na vośmuju.
Praŭda, jana čamuści była ŭ palčatkach — ale na hetuju detal ci to nichto nie źviarnuŭ uvahi, ci to jaje ŭvohule nie zaŭvažyli.
Ale na prachadnoj žančyna dastała zapalničku — i ŭspychnuła.
Adzieńnie na žančynie zaharełasia imhnienna — pa słovach vidavočcaŭ, jana abliłasia bienzinam zahadzia.
Da jaje adrazu kinuŭsia adzin z mužčynaŭ. Jon schapiŭ u harderobie staruju koŭdru, nakinuŭ na jaje i staŭ tušyć ahoń. Paśla zaliŭ vadoj.
«Ja byŭ u šoku, ale niejak zdoleŭ chutka zaryjentavacca. Ničoha hierojskaha ŭ svaim učynku nie baču. Dziejničać prafiesijna ŭ takich situacyjach nidzie nie vučyŭsia. Liču, što dapamahli viedy i prosty žyćciovy vopyt», - raspavioŭ «Homielskaj praŭdzie» Kanstancin Kanyšaŭ, jaki vyratavaŭ žančynu. 36-hadovy indyvidualny pradprymalnik akazaŭsia na prachadnoj vypadkova, jon navat nie pracuje na pradpryjemstvie — «Kamintern» jamu zamoviŭ ramont turnikietaŭ.
Vyklikali chutkuju. Žančynu zabrali ŭ balnicu.
Što stała nahodaj?
Pryčyny ŭčynku dakładna nieviadomyja. Ciapier aktyŭna chodziać čutki pra toje, što žančynie pahražała skaračeńnie.
Akramia taho, jana ŭ apošni čas zajmałasia afarmleńniem piensii. Adnak z Karelii, dzie žančyna žyła niejki čas adrazu paśla avaryi na ČAES, joj dasłali nie ŭsie dakumienty, jakija nieabchodnyja dla paćviardžeńnia pracoŭnaha stažu, paviedamlaje BIEŁTA.
Ale dyrektar «Kaminterna» Piotr Afončanka zajaviŭ, što prablemaŭ na pracy nie było. Ale ŭ rabotnicy, pa słovach kiraŭnika, apošnim časam nibyta byli prablemy ź psichikaj:
«Ab paciarpiełaj skłalisia tolki samyja dobryja ŭražańni: zaŭsiody aktyŭnaja, dobrasumlennaja, vietlivaja, niekanfliktnaja. Kalehi mohuć skazać pra jaje tolki dobraje. Zarpłata ŭ rabotnicy była hodnaja, u cechu stvorany vydatnyja ŭmovy dla pracy. Adnak kalehi kazali, u apošni čas u žančyny adznačalisia niekatoryja prablemy ź psichikaj».
Heta nibyta paćvierdziła i sama žančyna.
«Pry pastupleńni hamialčanka znachodziłasia ŭ prytomnaści i patłumačyła, što ŭ apošnija dni jana znachodziłasia na ambułatornym lačeńni ŭ Homielskaj abłasnoj kliničnaj psichijatryčnaj balnicy», - skazaŭ Uładzimir Kavaloŭ. zahadčyk adździaleńnia aniestezijałohii, reanimacyi, intensiŭnaj terapii Homielskaj haradskoj kliničnaj balnicy №1, kudy dastavili paciarpiełuju.
Akramia taho viadoma, što niadaŭna ŭ žančyny pamior muž. Heta taksama mahło paŭpłyvać na jaje stan.
Apioki - 50% cieła
Ciapier žančyna znachodzicca ŭ balnicy. Kali vyklikali chutkuju adrazu paśla zdareńnia, žančyna navat zmahła sama dajści da mašyny. Adnak, usio zusim nie tak dobra. Stan žančyny aceńvajecca jak ciažki, jaje navat pieraviali na štučnuju vientylacyju lohkich. Daktary dyjahnastavali paciarpiełaj apioki 50% cieła.
Na miescy zdareńnia pracuje apieratyŭnaja hrupa Śledčaha kamiteta, jakaja vyśviatlaje ŭsie padrabiaznaści.
Ciapier čytajuć
Topavy pierakładčyk pajechaŭ u Biełaruś mianiać pašpart — i sieŭ za danaty. «KDB pahladzieŭ na sumu i vyrašyŭ, što nichto ŭ zdarovym rozumie nie moža vydatkavać stolki ŭłasnych hrošaj»3
Topavy pierakładčyk pajechaŭ u Biełaruś mianiać pašpart — i sieŭ za danaty. «KDB pahladzieŭ na sumu i vyrašyŭ, što nichto ŭ zdarovym rozumie nie moža vydatkavać stolki ŭłasnych hrošaj»
Vajb-prahramavańnie źmienić rolu raspracoŭščyka, RLVR, i kali łopnie burbałka. Biełarus-inžynier u halinie ŠI, jaki pracuje ŭ ZŠA, raskazaŭ, što nas čakaje ŭ 202633
Kamientary