Ministerstva achovy zdaroŭja płanuje zabaranić prodaž kantaktnych linzaŭ praz aŭtamaty

U redakcyju TUT.BY patrapiŭ list za podpisam namieśnika ministra achovy zdaroŭja Ihara Łasickaha. U im paznačana, što ŭ krainie chočuć zabaranić aŭtamaty pa prodažy linzaŭ. A akulary i kantaktnyja linzy płanujuć raspaŭsiudžvać tolki pa recepcie doktara-aftalmołaha i tolki ŭ śpiecyjalizavanych kramach optyki, a taksama aptečnaj sietcy. Kali heta zdarycca, pakul nieviadoma, a linzamaty ŭsio jašče praciahvajuć pracavać.

U liście Ministerstva achovy zdaroŭja havorycca, što viedamstva razhledzieła pytańnie ab realizacyi kantaktnych linzaŭ, karyhujučych akularaŭ i apravaŭ. Ministerstva dakładvaje, što prodaž linzaŭ dapuskajecca tolki pa recepcie doktara-aftalmołaha, u śpiecyjalizavanych kramach optyki i ŭ aptečnaj sietcy, u aŭtamatach pradavać linzy zabaraniajecca.

U śpiecyjalizavanych kramach i optykach, jak praviła, jość akulisty, jakija pry kupli mohuć vypisać recept. Aŭtamaty ž pavinny prybrać.

Pavialičyć

Indyvidualny pradprymalnik Alaksandr Burak adnym ź pieršych prapanavaŭ biełarusam kuplać linzy ŭ aŭtamacie. U našaj krainie jany pracujuć užo try hady.

— Ja źjaŭlajusia aficyjnym pradstaŭnikom kampanii Bausch&Lomb, uvieś tavar siertyfikavany i zavozicca aficyjna, — raspaviadaje Alaksandr Burak. — Bolš za toje, linzy, jakija ja zahružaju ŭ linzamaty, ja pradaju ŭ apteki, optyki i internet-kramy. Za čas pracy nam nie pastupała nivodnaj skarhi na jakaść praduktu.

Pa słovach surazmoŭcy, linzamaty stajać va Ukrainie, Polščy, Rasii, Hiermanii, Litvie, Łatvii — i tam jany nikoha nie biantežać.

— Na kožnym aŭtamacie jość papiaredžańnie: kuplać linzy možna tolki pa recepcie, — praciahvaje surazmoŭca. — Ale da nas biez kansultacyi doktara čałaviek i nie pryjdzie. Jak jon bieź śpiecyjalista daznajecca, jakija linzy jamu patrebnyja, jak imi karystacca?

Alaksandr kaža: kali dakumient budzie padpisany, prybiaruć nie tolki aŭtamaty pa prodažy linzaŭ, linzy zabaroniać pradavać praź internet-kramy, a taksama «astraŭki», jakija jość u bujnych kramach.

— I što tady rabić ludziam u rehijonach? Vykažam zdahadku: žyvie čałaviek u maleńkim horadzie, dzie niama optyki, — nie chavaje emocyj Alaksandr. — Ciapier jamu kožny raz jeździć pa linzy ŭ abłasny centr? Ale navošta, kali jon moža zamović ŭsio heta praź internet-kramu.

— Pajedzie ŭ centr pa linzy, adrazu i zrok pravieryć?

— Čałaviek idzie da doktara, kali adčuvaje, što ŭ jaho padaje zrok, — spračajecca surazmoŭca. — Dla hetaha jamu nie treba čakać pajezdki pa novyja linzy.

Alaksandr upeŭnieny: kali prybiaruć aŭtamaty, u pieršuju čarhu pacierpiać pakupniki. Pa-pieršaje, u niekatorych linzamatach tavar možna kupić kruhłasutačna, pa-druhoje, pa bolš nizkaj canie.

Ministerstva achovy zdaroŭja abiacaje prakamientavać situacyju ŭ najbližejšy čas.

• 0
• 0
• 0
• 0
• 0
• 0
• 0
• 0