«Nie prapuściła słužba biaśpieki». Polski bank admoviŭ biełarusu z DNŽ, ale praterminavanym pašpartam u adkryćci rachunku dla IP

U studzieni 2026 hoda jon aformiŭ IP (JDG) i pasprabavaŭ adkryć firmienny rachunak u tym ža banku, dzie ŭ jaho ŭžo jość asabisty rachunak. Adnak słužba biaśpieki banka admoviła jamu. Svaju historyju jon raspavioŭ Most.

U 2023 hodzie Dzianis vyjechaŭ ź Biełarusi va Ukrainu. U Biełarusi siamja zajmałasia ziemlarobstvam, a va Ukrainie ŭ ich byŭ dom i ŭłasnaja ziamla. Sačyć za apracoŭkaj ziamli addalena było składana, i Dzianis źjechaŭ va Ukrainu. Jaho žonka i dzieci pieryjadyčna pryjazdžali da jaho. U adnu z takich pajezdak stała zrazumieła, što viartacca ŭ Biełaruś niebiaśpiečna: u ich domie praviali pieratrusy.

Termin dziejańnia biełaruskaha pašparta Dzianisa minaŭ u studzieni 2025 hoda. Jon adznačaje, što zastavacca va Ukrainie biez sapraŭdnaha pašparta było b prablematyčna, i siamja pryniała rašeńnie letam 2024 hoda źjechać u Polšču. Adrazu padalisia na mižnarodnuju achovu, jakuju atrymali ŭ sakaviku 2025 hoda.

U vieraśni 2024 hoda Dzianis adkryŭ asabisty rachunak u banku PKO — na toj momant u jaho byŭ jašče dziejučy biełaruski pašpart i viza. Kali ŭ studzieni 2025 hoda termin dziejańnia pašparta skončyŭsia, bank paviedamiŭ biełarusu ab nieabchodnaści padać novy dakumient.

— Na toj momant u mianie było tolki časovaje paśviedčańnie asoby (jano vydajecca na čas razhladu spravy ab mižnarodnaj achovie). Jaho pryniali, a supracoŭniki banka skazali, što ja zmahu biez prablem adkryć rachunak i dla pradprymalnickaj dziejnaści, kali ŭ mianie źjavicca IP, — raspaviadaje Dzianis.

Paraili źviarnucca ŭ inšyja banki

U pačatku 2026 hoda mužčyna zarehistravaŭ IP i źviarnuŭsia ŭ adździaleńnie banka dla adkryćcia biznes-rachunku. Tam pryniali ŭsie dakumienty, jon zapoŭniŭ zajavu i aformiŭ zajaŭku. Adnak paźniej jamu pieratelefanavali z banka i admovili.

— Skazali, što, na žal, słužba biaśpieki nie prapuściła, bo ŭ mianie biełaruskaje hramadzianstva. Choć karta pobytu ŭ mianie sapraŭdnaja da 2027 hoda, i ŭ joj paznačana padstava vydačy — dadatkovaja abarona, — raskazvaje Dzianis.

Piśmovaha abhruntavańnia admovy jon pakul nie atrymaŭ. U banku rašeńnie patłumačyli ŭnutranaj praceduraj pravierki i paraili źviarnucca ŭ inšyja banki.

Most patelefanavaŭ na infaliniju banka PKO, adnak tam nie zmahli prakamientavać situacyju Dzianisa, pakolki žurnalist nie maje prava jaho pradstaŭlać. Biełarusam, jakija chočuć adkryć rachunak dla IP, rekamiendavali źviartacca ŭ adździaleńnie banka i vyrašać pytańni indyvidualna.

• 0
• 0
• 0
• 0
• 0
• 0
• 4
• 0