Lavon Anacka ciaham dvuch hadoŭ biehaje 24-hadzinnyja marafony. Jak adziny biełarus, jon prezientavaŭ krainu na apošnim mižnarodnym čempijanacie ŭ Bełfaście. «Biełsat» daviedaŭsia ŭ spadara Lavona, jak pieraadoleć siabie, dasiahnuć mety i zastacca maładym.
Niekalki dzion nazad Lavon Anacka viarnuŭsia z dvuchdzionnaha marafona ŭ Prazie z vynikam 256 km. Pierad hetym biełarus pryvioz niebłahi vynik z Anhlii, pieraadoleŭšy 165 km za sutki ŭ zabiehu na čempijanacie śvietu ŭ Bełfaście. Siarod 400 udzielnikaŭ spadar Lavon adziny prezientavaŭ Biełaruś i ŭ svajoj uzrostavaj katehoryi zaniaŭ 4-je miesca.
«Šmat chto pabajalisia, bo, viadoma ž, trapić u Anhliju ź Biełarusi dosyć ciažka. Šenhien tam nie dziejničaje, pryjšłosia vizu vyrablać, a heta vielmi składana. Pryčym pa maim zarobku budaŭnika na abutkovaj fabrycy, jak vyśvietliłasia, 105 funtaŭ — heta dzionny zarobak taho anhličanina, što budzie mianie ŭ Anhliju puskać. Pryjšłosia papacieć, kab sabrać niejkija tam dyvidendy realnyja, jakija ja atrymoŭvaju. Zatoje ciapier maju vizu. Płanuju na Rastvo ŭ Łondan palacieć, a pierad hetym budzie zabieh u Barsełonie, a paśla hetaha, 31 śniežnia chaču pryniać udzieł u zabiehu ŭ Kapienhahienie i tam ža sustreć Novy hod», — raspaviadaje pra svaje płany biełaruski biahun.
Startavaŭ apošni, kab usie bačyli cišotku «Belarus»
Spadar Lavon z honaram pakazvaje nam svaju spartovuju formu: «Usio ŭ bieł-čyvona-biełym. Heta maja cišotka była, ja vam pakažu. Dzie łacinkaj pačynajecca, ja startavaŭ, a voś z kirylicaj ja ŭžo finišavaŭ. Ja chacieŭ, kab Biełaruś było bačna. Adzieŭ na anhielskaj movie cišotku, staŭ samy apošni, pabieh i pacichu staŭ usich abhaniać, kab usio ž taki jany pračytali. Straciŭ chvilinku, ale mnie było pryjemna. U vyniku prabieh roŭna 100 kruhoŭ. Usie da sotni abo bolej za sotniu, a ŭ mianie taki kruhły vynik atrymaŭsia».
Na apošnim čempijanacie ŭ Biełfaście ŭdzielničała kala 400 čałaviek z 40 krain śvietu, pry čym siarod žančyn pradstaŭnica Polščy Patrycyja Bereznoŭskapabiła novy suśvietny rekord — 258 km za sutki! Siarod mužčyn napierad vyjšaŭ japoniec, pieraadoleŭšy 267 km.
«Hałoŭnaje — lubić žyćcio!»
Spadar Lavon daje parady tym, chto choča prabiehčy marafon.
«Pa-pieršaje, dobry abutak! Bo ja, jak patryjot i pradstaŭnik Lidskaj abutkovaj fabryki, nabyŭ sabie niejkija krasoŭki našaha vyrabu. U vyniku takija mazali naciraŭ, što całkam ad usioj stapy adychodzili. Ciapier pierajšoŭ na bolš salidny abutak. Nie budu kazać, kab nie rabić rekłamy. A pa-druhoje: lubić žyćcio, być ščaślivym i viedać, i vieryć, što dojdzieš da ranicy. Być ciarplivym i samaje hałoŭnaje, chutka nie startavać. Bo heta jak u žyćci: u 18 hadoŭ možna tak zahulać, što potym u 25 ni zdaroŭja, ni sił, ni žadańnia. A ja voś chaču pakazać, što možna być ščaślivym i zdarovym i na druhoj pałovie žyćcia».
Jak raspaviadaje spadar Lavon, u dziacinstvie jon 12 razoŭ pierachvareŭ na zapaleńnie lohkich, a na pieršym kursie instytutu pastajanna ciarpieŭ na pavyšany cisk. Ale heta nie pieraškodziła jamu adčuvać siabie zdarovym i ščaślivym.
Što datyčyć charčavańnia, to 55-ci hadovy spartoviec starajecca prytrymlivacca viehietaryjanskaj ježy. Hałoŭnaje — kab chutka zasvojvałasia.
«Pierad Bełfastam ja ŭvohule dva miesiaca ničoha miasnoha nie jeŭ. Pry biehu i ŭvohule takoj ciažkaj pracy, treba jeści ježu, jakaja chutka zasvojvajecca. Ja vielmi lublu kiefir, jakuju-niebudź aharodninu, jahady, mahu jabłykaŭ šmat źjeści. I jano adrazu ŭ kroŭ idzie i heta dapamahaje. Bo kali tvaje nyrki niedzie nie spracoŭvajuć na 12-j hadzinie i pačynaje ŭsia ježa ad stomlenaści nie prymacca. A ŭ mianie apietyt strašenny. Ja kali idu, jem usio zapar, zvyčajna idu i jem na chadu. Nu i z vadoj. Ja ź dziacinstva ŭ lesie sutki biez vady moh abychodzicca. Nu pravodziŭ ekśpierymienty niekali dla siabie, 68 hadzin suchoj haładoŭki, i narmalna siabie adčuvaŭ».
Na dopytach KDB
Jak uzhadvaje spadar Lavon ciarplivaść i ŭmieranaje spažyvańnie ježy dapamahała časam i ŭ inšych situacyjach. Da prykładu, na dopytach KDB padčas minułych prezidenckich vybaraŭ, kali jon uznačalvaŭ nazirańnie za vybarami va ŭsioj Haradzienskaj vobłaści.
«Kali mianie vyzyvali na dopyt, dyk užo hety kadebist śpiašajecca da chaty iści, a ja «nieje…». Davajcie na biełaruskuju movu pierakładziem pratakoł. I my pakul hadzinku pierakładali, druhuju, treciuju. A ciapier davajcie pytańni zadavać. A jamu ŭžo žonka telefanuje. A ja — jeści nie chaču, pić nie chaču i kuryć — nie kuru. Mahu siadzieć tam kolki zaŭhodna. Nie-nie-nie, davajcie jašče. Ja zamučyŭ jaho tak, što jon užo ŭsio: idzicie, idzicie, idzicie», — uzhadvaje hramadski aktyvist.
«Biehać i biehać!»
Lavon Anacka kala 20-ci hadoŭ uznačalvaje lidski filijał Tavarystva biełaruskaj movy, dziejničaŭ u Biełaruskim chielsinkskim kamitecie, pracavaŭ u Fondzie Lva Sapiehi, kala 8-mi hod byŭ deputatam haradskoj rady ŭ Lidzie. Ciapier sprabuje naviazać supracu ź Biełaruskaj fiederacyjaj lohkaj atletyki pa pytańni pašyreńnia biełaruskaj movy. Adnak jaho listy ŭ fiederacyju pakul viartajucca nazad biez adkazu.
Nastupny čempijanat śvietu pa sutačnym biehu budzie prachodzić u Aŭstryi ŭ 2019-m hodzie, na jaki spadar Lavon choča sabrać kamandu ź Biełarusi. U našaj krainie 24-hadzinny bieh nie pravodzicca, maksimalnyja zabiehi pa 12 hadzinaŭ, ale, jak kaža spartoviec, «biehunoŭ u nas chapaje».
«U kłubie «Rehijon», chaču adznačyć, što na marafonie mianie dahaniajuć niekatoryja siabry z 39-ha i 36-ha hoda i prychodzicca ź imi zmahacca! Tak što, dumaju, mnie jašče biehać i biehać!»
Ciapier čytajuć
Pamior paet Uładzimir Karyzna, aŭtar słoŭ da ciapierašniaha dziaržaŭnaha himna Biełarusi5
Pamior paet Uładzimir Karyzna, aŭtar słoŭ da ciapierašniaha dziaržaŭnaha himna Biełarusi
Viadomy partret Kahanca akazaŭsia savieckim fejkam, zatoje znajšłosia adzinaje fota archieołaha Tatura. Razhadanyja fotatajamnicy Biełaruskaha muzieja ŭ Vilni
Kamientary