Błakitnyja aziory ŭ Lubanskim rajonie addali jehipcianinu

Šmat hadoŭ kupańnie tut było zabaroniena, ale ludzi ŭsio roŭna pryjazdžali. Što źmienicca ciapier, vyśviatlała vydańnie «SB Biełaruś Siehodnia».

Adpačyvać siudy pryjazdžajuć sotni ludziej, choć kupacca tut niebiaśpiečna — i hłybinia dasiahaje 30 mietraŭ.

Historyja dziŭnaha łandšaftu z vadoj jarka-biruzovaha koleru pačałasia 20 hadoŭ tamu, kali Lubanski kambinat budaŭničych materyjałaŭ spyniŭ zdabyču vapny. Jakraz tady les, a razam ź im vadajomy pieradali miascovamu lashasu, jaki mieŭsia sačyć za paradkam. Dapamahała i rajonnaja inśpiekcyja pryrodnych resursaŭ i achovy navakolnaha asiarodździa.

Hałoŭnaja prablema ŭ tym, što vadajom nie prystasavanyja dla adpačynku. Niama ŭładkavanaha plažu, ratavalnikaŭ. A ŭ niekatorych miescach — rezkija pierapady hłybiń i tempieratur, navat letam vada nie prahravajecca hłybiej za dva mietry. Za apošnija hady ŭ hibłych miescach patanuła 10 čałaviek.

Na patrabavańnie ŭładaŭ na bierazie pastavili znak, jaki papiaredžvaje pra adkaznaść za kupańnie. Rejdy na «błakitnych aziorach» rehularna pravodzić milicyja, parušalnikaŭ štrafujuć. Ale ludskaja bieskłapotnaść nie viedaje miežaŭ.

Chapaje i adkidaŭ vakoł karjera: na kožnym kroku płastykavaja butelka abo razarvany pakiet. Pahłybicca trochi ŭ les — čakajuć cełyja kučy śmiećcia.

Pavialičyć

Vidavočna, što sprava chutka zrušycca ź miortvaha punkta. Načalnik rajonnaj inśpiekcyi pryrodnych resursaŭ i achovy navakolnaha asiarodździa Alaksandr Małašuk padzialiŭsia navinoj: dva miesiacy tamu pryvatnaja kampanija TAA «Piramida-Hrup», zarehistravanaja ŭ harpasiołku Urečča, praz aŭkcyjon atrymała ŭ arendu krejdavyja karjery.

Hałoŭnym inviestaram stanie biznesoviec ź Jehipta, imia jakoha nie nazyvajecca. Alaksandr Alaksandravič miarkuje, što takoje raźvićcio padziej pojdzie na karyść i rajonu, i haściam:

— Dla nas karjery — prablema. Kožny hod tut tonuć abo atrymlivajuć traŭmy. Adpačyvalniki nie prybirajuć śmiećcia. Adnak ja ŭpeŭnieny, što ŭ «błakitnych azioraŭ» dobryja pierśpiektyvy. Skažam, vosieńniu siudy na treniroŭki rehularna pryjazdžajuć vajskoŭcy z Asipovičaŭ. Jašče kažuć, lepšaha miesca dla padvodnaha płavańnia ŭ krainie nie znajści. Čamu b nie raźvivać dajvinh?

Damovu ź inviestarami zaklučyli na minimalny termin — piać hadoŭ. U ich — pieršačarhovaje prava pradaŭžeńnia arendy. Namieśnica načalnika ziemleŭparadkavalnaj słužby Lubanskaha rajvykankama Natalla Ramienčyk pryadkryła płany novych uładalnikaŭ:

— U budučyni źbirajucca ŭładkavać na bierahach bazu adpačynku: haściavyja domiki, restaran, łaźniu, kiempinh. Praŭda, pakul u arendu addali tolki vodnuju roŭniadź. Dla atrymańnia ziamli inviestary pavinny padrychtavać śpiecyjalny prajekt i zaćvierdzić jaho ŭ abłvykankamie.

U «Piramidzie-Hrup» paćvierdzili hetuju infarmacyju i rastłumačyli, što praca nad atrymańniem ziamli ŭ arendu pačniecca ŭ siaredzinie žniŭnia, kali klučavy inviestar pryjedzie na miesca. Pakul što ŭ płanach TAA zarybleńnie vadajoma. Ale heta tolki pačatak.

Darečy, kupacca paśla dobraŭparadkavańnia plažu źbirajucca dazvolić usim, a voś rybałka stanie płatnaj.

• 0
• 0
• 0
• 0
• 0
• 0
• 0
• 0