Amal usie škoły biełaruskaj stalicy padobnyja adna da adnoj, jak bliźniaty. Choć by tamu, što budujucca jany pa standartnych płanach. I ŭsio ž siarod amal 250 škoł i himnazij Minska jość asablivyja i ŭnikalnyja.
U top-5 samych niezvyčajnych škoł biełaruskaj stalicy ŭvajšli 4 užo dziejnyja navučalnyja ŭstanovy i adna, jakaja prymie vučniaŭ u 2019 hodzie. Ale hetaja škoła pa svajoj aryhinalnaści całkam moža pieraŭzyści ŭsie najaŭnyja.
SŠ №4: samaja staraja škoła Minska
U 2016 hodzie mienskaja škoła №4 adznačyła svajo stadziesiacihodździe. U 1906 hodzie pryvatnyja pradprymalniki Zubakin i Falkovič na vulicy Mahazinnaj, 32 adkryli pryvatnuju paŭnapraŭnuju mužčynskuju himnaziju, pravapierajemnicaj jakoj i źjaŭlajecca ciapierašniaja škoła №4.
Na Čyrvonaarmiejskuju, 11 škoła pierajechała ŭ 1936 hodzie — śpiecyjalna dla jaje byŭ pabudavany budynak pa prajekcie architektara Hierasima Jakuška. Padčas vajny ad jaho zastalisia tolki ścieny. Ale za 2 hady škołu adnavili, i ŭ 1947-m jana znoŭ pačała pracavać. U 1979 hodzie była praviedziena rekanstrukcyja budynka i da jaho dabudavali druhuju častku.
Fasad škoły zachavaŭsia ŭ idealnym stanie. Unikalnaj asablivaściu škoły źjaŭlajecca biblijateka, jakaja raźmiaščajecca ŭ paŭkruhłym kałonnym porciku. A taksama marmurovaja leśvica jašče davajennych časoŭ.
Pieršaja škoła stalicy, pabudavanaja pa ŭnikalnym prajekcie
SŠ №23 — pieršaja škoła ŭ Minsku, pabudavanaja pa ŭnikalnym architekturny prajekcie. Adkryłasia jana ŭ Sucharavie ŭ 2009 hodzie. Niahledziačy na toje, što raźličana navučalnaja ŭstanova na 720 miescaŭ, u pieršy ž hod svajho isnavańnia za party ŭ joj sieła kala 900 vučniaŭ.
Škoła sapraŭdy vyłučajecca na fonie typovych, choć zusim užo niezvyčajnym budynak nie nazavieš. U škole dva korpusy — navučalny i kulturna-zabaŭlalny, u jakim jość dźvie spartzały, trenažornaja i chareahrafičnaja zały i navat zimovy sad. Asablivaściu navučalnaha korpusa źjaŭlajecca lekcyjnaja zała na 90 miescaŭ.
Škoła imia Rut Uoler
130-ja škoła, što adkryłasia ŭ 2004 hodzie, ź niadaŭniaha času nosić imia amierykanki Rut Uoler. Havorka idzie pra pieršuju sakratarku humanitarnaj misii AAN u Biełarusi. U Minsk jana prybyła ŭ krasaviku 1946 hoda, a pamierła ŭ žniŭni taho ž hoda. 24-hadovaja Rut zachvareła na mieninhit paśla taho, jak vyratavała troch dziaciej, jakija tanuli ŭ sažałcy ŭ Łošyckim parku.
U škole ciapier vučycca kala 1000 dziaciej. Tut jość dźvie spartyŭnyja, trenažornaja i chareahrafičnaja zały, kampjutarnyja kłasy i kabiniety infarmacyjnych technałohij, miedycynski, pracedurny i stamatałahičny kabiniety i navat kabiniet sensarnaha stymulavańnia!
Vonkava škoła taksama vyhladaje dosyć niezvyčajna i aryhinalna, choć jana i pabudavana pa standartnym prajekcie.
Ekśpierymientalnaja i samaja «prasunutaja» 61-ja škoła
Adkrytuju ŭ 2014 hodzie hodzie škołu adrazu ž nazvali ekśpierymientalnaj i ŭnikalnaj. Adkryvaŭ jaje tahačasny mer Mikałaj Ładućka, a ŭ sioletnim mai jaje naviedaŭ Alaksandr Łukašenka.
Biezumoŭna, na dadzieny momant — heta samaja «prasunutaja» škoła Biełarusi. Tut vielizarnaja kolkaść spartyŭnych placovak, dva basiejny, saŭna i džakuzi, trenažornyja zały, hodna abstalavanyja kłasy… Uvohule, dziŭna, što školniki jašče dadomu sychodziać.
Prajekt škoły raspracoŭvaŭsia indyvidualna, tamu jana nie padobnaja ni da adnoj inšaj. Budynak vyhladaje stylna, samavita i maštabna — inšy ŭniviersitet pazajzdrościć.
Darečy, cikavy fakt: pieršapačatkova škołu płanavałasia zrabić pravasłaŭnaj, a ŭ samim budynku ŭstalavać ałtar. Miesca dla budaŭnictva ŭ 2012 hodzie navat aśviacili patryjarch maskoŭski Kirył. Ale haradskija ŭłady vyrašyli, što škoła budzie zvyčajnaj, śvieckaj.
Niama miežaŭ daskanałaści: škoła ŭ Novaj Baravoj
Jana prymie pieršych vučniaŭ u 2019 hodzie. Ale, ščyra kažučy, užo ciapier možna pačynać chacieć u joj vučycca. Pabudavanaja jana budzie pa ŭnikalnym prajekcie i źmieścić bolš za tysiaču vučniaŭ.
Škoła budzie radykalna adroźnivacca ad usich isnujučych: jana ŭvabrała ŭ siabie šmat śmiełych rašeńniaŭ i prajektavałasia z ahladkaj na ŭžo isnujučyja sučasnyja navučalnyja ŭstanovy Finlandyi i Narviehii. Płanujecca, što jana stanie miescam dla harmaničnaha raźvićcia dziaciej, dzie pavinna być miesca dla vučoby, sportu i kamunikacyi.
Zamiest pustoha choła — prastorny amfiteatr, dzie vučni zmohuć bavić volny čas. Dla vučniaŭ małodšych kłasaŭ vydzielena asobnaje kryło — małyja i padletki nie pavinny adzin adnamu pieraškadžać. Dla staršakłaśnikaŭ buduć stvorany zony adpačynku, bo ŭ škole treba nie tolki vučycca, ale i adnaŭlać siły.
Mebla, jak i mnohaje inšaje ŭ interjery, budzie stvorana pa indyvidualnym prajekcie. Što tyčycca spartyŭnaha składniku, to, akramia niepasredna spartzały ŭ samoj škole, u adnym kompleksie ź joj budzie pabudavany fizkulturna-azdaraŭlenčy kompleks z basiejnam i trenažornaj załaj. Uviečary abjekty fizkulturna-azdaraŭlenčaha kompleksu buduć adkryty dla naviedvańnia žycharam Novaj Baravoj — dastatkova tolki nabyć abaniemienty.
I — samaje niezvyčajnaje — u škole budzie ekspłuatavacca dach! Na jaho možna budzie vyjści ŭ pahodlivy dzianiok, naprykład, ź biblijateki i pačytać na śviežym pavietry. Prajekt «škoły budučyni» ciapier znachodzicca na stadyi detalovaha prajektavańnia, ale ŭžo ciapier dzivić niezvyčajnym dla Biełarusi padychodam i bahaćciem navatarskich idej.
Kamientary