Chto taki Dźmitryj Lemiašonak? Čałaviek u majcy «DNR», blizki da žanočaha manastyra ŭ Navinkach
Śviata-Jelizaviecinski žanočy manastyr, jaki mieścicca na ŭskrajku Minsku, la Navinak, pryciahnuŭ da siabie ŭvahu vystupam «padpałkoŭnika rasijskaha HRU» Antona Manšyna. Na sustrečy było kala sotni čałaviek, u tym liku i manaški.
«Chutka našu Radzimu, jakaja nazyvajecca Śviataja Ruś — biez padziełu na Biełuju, Małuju i Vialikuju, — čakaje surjoznaje vyprabavańnie vajnoj. Našym mužčynam, prysutnym tut, hetaja infarmacyja asabliva spatrebicca. Bo ja ŭpeŭnieny, što jany voźmuć u joj udzieł», — kazaŭ Manšyn, što sustrakała zachapleńnie siarod manašak.
Paźniej redaktarka sajta Śviata-Jelisaviecinskaha manastyra inakinia Iaanna skazała, što zaprašeńnie Manšyna było ich pamyłkaj, chacia jana i nie viedaje, adkul vajskoviec uziaŭsia.
Varta adznačyć, što Manšyn zusim nie adziny dziŭny piersanaž, jaki krucicca vakoł Śviata-Jelisaviecinskaha manastyra.
Na šmatlikich fatazdymkach z padvorja ŭ Navinkach prysutničaje 40-hadovy Dźmitryj Lemiašonak. Łysy, baradaty mužčyna, niaredka adziety ŭ majki «Danieckaj narodnaj respubliki» ci minskaha «Dynama».
Dźmitryj Lemiašonak — heta syn protaijereja Andreja Lemiašonka, jaki źjaŭlajecca duchoŭnikam Śviata-Jelisaviecinskaha manastyra. Syn — vielmi časty hość u abicieli.
Jon časta źjaŭlajecca na manastyrskim padvorji, u samim chramie, fatahrafujecca z manaškami. Pryčym Lemiašonak-małodšy nie nadta chavaje svaje palityčnyja pohlady. Najčaściej na im majki z vyjavaj hierba «DNR» i «Biełaja Ruś», ci spartovaja maścierka z nadpisam Russia.
Staronki Lemiašonka ŭ sacyjalnych sietkach poŭniacca pieradrukami ab zmahańni suprać «karnikaŭ» u Daniecku i Łuhansku, a taksama vyjavaŭ pravasłaŭnych śviatych i starcaŭ. Asablivy pijetet Lemiašonak adčuvaje da Sierbskaj pravasłaŭnaj carkvy, ździajśniaje pałomnictvy ŭ tyja miaściny.
Dźmitryj Lemiašonak byŭ adnym z zasnavalnikaŭ sučasnaha fanackaha ruchu minskaha «Dynama». U toj čas jon prytrymlivaŭsia radykalnych nieanacysckich pohladaŭ. Jašče i ciapier na jahonaj staroncy ŭ «Adnakłaśnikach» možna sustreć vodhulle tych pierakanańniaŭ.
Ciapier Lemiašonak faktyčna źjaŭlajecca piersonaj non-hrata dla fanataŭ «Dynama». Nijakaha dačynieńnia da siońniašniaha fan-ruchu jon maje.
Praź niejki čas Lemiašonak staŭ «pravasłaŭnym aktyvistam», pry hetym zachavaŭšy svaje absalutna prarasijskija pierakanańni. Lemiašonak byŭ adnym z tych, chto źbivaŭ maładafrontaŭca Mikałaja Dziemidzienku padčas sustrečy ŭ «Domie Maskvy» ŭ Minsku z rasijskim čarnasocienskim piśmieńnikam Mikałajem Starykavym.
Niaredka Lemiašonak fihuruje na fatazdymkach padčas kazackich schodak, na jakich u tym zafiksavany tak zvany «ataman» Piatro Šapko.
Ciapier ža najčaściej Dźmitryj Lemiašonak u supravadžeńni svajho baćki i manachiń Jelisaviecinskaha manastyra ździajśniaje pałomnictvy ŭ Rasiju i Sierbiju.
Protairej Andrej Lemiašonak padčas sustrečy ŭ manastyry z byłym HRUšnikam Antonam Manšynym byŭ na adpačynku ŭ Čarnahoryi.
Ciapier čytajuć
Praca fizičnaha ofisa Cichanoŭskaj u Vilni časova prypyniena36
Kamientary