Deputat Bobrykaŭ: «Kazki pra Piečy mnie raskazvać nie treba — ja dva hady imi kamandavaŭ!»

Pra trahičny vypadak hibieli sałdata ŭ Piečach i dziedaŭščynu ŭ vojsku Svaboda parazmaŭlała z namieśnikam staršyni pastajannaj kamisii ŭ pytańniach nacyjanalnaj biaśpieki Pałaty pradstaŭnikoŭ Siarhiejem Bobrykavym.

— U Piečach adbyŭsia čarhovy vypadak samahubstva sałdata…

— Čamu vy skazali «čarhovy»?

— Tamu što 31 sakavika byŭ jašče adzin vypadak, kali sałdat paviesiŭsia.

— Nia ŭ Piečach, a ŭ Barysavie. Toje, što pišuć u internecie, u hetym śmietniku, ja jaho tak nazyvaju… Jość fakty. Kali b paru čałaviek pryciahnuli da sudovaj adkaznaści za toje, što pišuć niapravilna, adrazu b pierastali pisać. 31 sakavika byŭ suicyd u Barysavie, ale nia ŭ Piečach. U Piečach staić šmat častak. U Piečach nie čarhovaja za hety hod trahiedyja, a pieršaja.

— Ale nia pieršaja za isnavańnie «vučebki» ŭ Piečach.

— Tak, zdaryłasia hora, fakt jość. Heta hora, i ad jaho nichto nie advaročvajecca. Heta dla Ŭzbrojenych sił vialikaja strata i prablema, što ludzi sychodziać u mirny čas. Pracujuć i instytut psycholahaŭ, instytut ideolahaŭ.

— Ale pra žachi słužby ŭ Piačach raskazvajuć daŭnym-daŭno, i što tam jość niestatutnyja adnosiny. Vy kamandavali častkami, šmat hadoŭ słužyli. Vy pryznajacie, što ŭ vojsku jość dziedaŭščyna?

— Jak my nazaviom taki varyjant? Pryjšoŭ na pradpryjemstva małady chłopiec pracavać kiroŭcam. Jamu ž nie daduć adrazu novy aŭtamabil, novy daduć zasłužanamu tavaryšu. Heta što — dziedaŭščyna nazyvajecca?

— Dyk havorka idzie nie pra heta…

— Jak nie pra heta? My razmaŭlajem pra niejkuju sacyjalnuju niaroŭnaść ludziej. Vy bijahrafiju maju dobra vyvučali? U 2006 — 2008 hadach Bobrykaŭ — načalnik 72-ha vučebnaha centru ŭ Piečach. I kazki pra Piečy mnie raskazvać nia treba, tamu što ja dva hady imi kamandavaŭ.

Kali ja tudy pryjšoŭ, taksama čuŭ, što tam siakierami bulbu abirajuć, travu farbujuć, da drevaŭ pryviazvajuć liście. Ja pahladzieŭ: heta razmovy, papraŭdzie ničoha padobnaha tam niama. I heta nie internet, a toje, što ja sam tam bačyŭ.

— Možna, ja vam na elektronnuju poštu dašlu zdymki cieła chłopca, jaki zahinuŭ? Na im šmatlikija hiematomy, paboi — chłopca žorstka źbivali. U redakcyi jany jość, z etyčnych pryčynaŭ my ich nie vystaŭlali na sajt.

— Jość takoje paniaćcie, jak sudova-medycynskaja ekspertyza. Vy vyniki jaje bačyli? I ja nia bačyŭ. Na jakoj padstavie vy kažycie, što jość fatazdymki źbitaha, pakalečanaha? Baćki jaho taksama nie specyjalisty. Davajcie faktam vieryć. Kali čałaviek niežyvy, jość trupnyja plamy, padobnyja da siniakoŭ. Jość sudmedekspertyza, i tam nichto nia budzie nikoha ŭvodzić u zman. Pra pałosy, plamy ja ŭsio čytaŭ. Budzie aficyjnaje zaklučeńnie ekspertaŭ.

— Tady pra kryminał. A karystańnie bankaŭskaj kartkaj chłopca, jakoj siaržanty i praparščyki, proźviščy jakich viadomyja, płacili ŭ klubach, zdymali hrošy na «Barysaŭ-Arenie», u Miensku — heta narmalna?

— U mianie takich źviestak niama, ja da hetych dadzienych nie dapuščany. Adkul u vas takaja infarmacyja, ja nia viedaju.

— Ale heta narmalna, na vašu dumku, što ŭ mirny čas u biełaruskim vojsku stolki maładych ludziej robić suicyd?

— A vy vaźmicie statystyku samahubstvaŭ luboha horadu ŭ takim samym uzroście — pamiž 18 i 25 hadami. Tam ličby nia bolšyja, čym u vojsku.

Ja liču, što pytańniami, pra jakija my zaraz havorym, pavinny zajmacca adpaviednyja orhany, u tym liku Śledčy kamitet. A naviešvać jarłyki, kazać pra toje, što nie isnuje, nia treba. Niachaj raźbirajucca tyja, kamu naležać, a kali chto vinavaty, budzie adkazvać pierad zakonam.

Prablemy, jakija my abmiarkoŭvajem, nie schavaješ, jany navidavoku. Pravaachoŭnymi orhanami budzie dadziena acenka, i ŭsie, chto vinavaty, paniasuć adkaznaść. Vy nia dumajcie, što chtości štości ŭtojvaje, chtości maŭčyć. Takoj praktyki niama va Ŭzbrojenych siłach. Kali kamandzir, načalnik svoječasova vyznačyŭ skład złačynstva, pryniaŭ zachady, dałažyŭ pa kamandzie — zusim inšaja adkaznaść. A kali heta ŭsio ŭtojvajecca, zamoŭčvajecca, da takich kamandziraŭ prymajucca vielmi žorstkija zachady. I ŭsie zakanadaŭstva va Ŭzbrojenych siłach mienavita na hetym pabudavanaje, kab takich vypadkaŭ nie adbyvałasia.

— A sam kamandzir častki pałkoŭnik Kanstancin Čarniecki ŭ takich vypadkach asabista raźbirajecca?

— Va ŭsich vypadkach, pra jakija my zaraz kazali, kamandzir asabista pavinien raźbiracca i asabista pryniać zachady, kab heta bolš nie paŭtarałasia. Asabista. Heta va ŭsich instrukcyjach, statutach i zakonach prapisana. Asabliva ŭ vypadkach hibieli vajskoŭcaŭ kamandzir raźbirajecca asabista.

— Parlamenckuju kamisiju pa nacyjanalnaj biaśpieki nie tryvožyć hety vypadak i naahuł stan armii? Deputat Hanna Kanapackaja źviartajecca da staršyni kamisii, choča inicyjavać parlamenckija słuchańni pa hetym kankretnym vypadku. U vas u kamisii stolki hienerałaŭ — sami nia chočacie pajechać u Piečy, pahladzieć, parazmaŭlać z asabovym składam, razabracca?

— Ja liču, što hetymi pytańniami pavinna zajmacca Ministerstva abarony. U dziejnaść Minabarony ŭmiešvacca jaki sens? A kali tudy pryjeduć nazvanyja vami deputaty, što jany buduć tam rabić? Tam pracuje Śledčy kamitet. Vy prapanujecie deputatam umiešvacca ŭ dziejańni Śledčaha kamitetu, pravavuju acenku davać?

— Nie, biezumoŭna. Prosta pahladzieć, što tam robicca, parazmaŭlać z sałdatami, niama takoha žadańnia?

— A što tam hladzieć? Tam idzie śledztva. Što — śledztvu pieraškadžać? Sensu hetaj pajezdki ja nie razumieju. U nas była razmova sa staršyniom kamisii. Pryjdzie spadarynia Kanapackaja — adkažam na jaje pytańni. Ale kazać toje, čaho niama, nia treba, nia treba sabie pijar stvarać, tanny aŭtarytet.

Idzie śledztva. I jano adkaža na ŭsie pytańni, vyjavić vinavatych, vyznačyć stupień viny kožnaha. Kali budzie sud — vyznačyć adkaznaść kožnaha.

***

Na telehram-kanał «Našaj Nivy» možna padpisacca tut.

• 0
• 0
• 0
• 0
• 0
• 0
• 0
• 0