Sałdatam u Piečach dazvolili trymać pry sabie mabilniki, ale bieź internetu i kamiery

Ciapier maładyja ludzi, jakija słužać u Piečach, mohuć mieć pry sabie telefony, ale tolki dazvolenaha ŭzoru. Takoje rašeńnie, paviedamili ŭ Ministerstvie abarony, pryniaŭ načalnik 72-ha abjadnanaha vučebnaha centra ŭ Piečach. Raniej telefanavać z vojska taksama dazvalałasia, ale zachoŭvalisia mabilnyja ŭ stroha «vyznačanych miescach», pra heta paviedamlaje partał TUT.BY.

Pavialičyć

Pry hetym karystacca mabilnym sałdaty mohuć nie tady, kali zachočuć, a pa raskładzie.

— U čas dla asabistych patrebaŭ, jaki adviedzieny ŭ rasparadku dnia, — udakładnili ŭ Ministerstvie abarony. — Naprykład, paśla viačery, pierad snom. Chłopcy majuć znosiny z rodnymi, i ŭsie hety čas viedajuć.

U astatnija hadziny mabilny moža być vyklučany, stajać na vibra abo ŭ biazhučnym režymie.

— Što značyć «telefon dazvolenaha ŭzoru»?

— Zvyčajny telefon, jaki dazvalaje mieć znosiny, — rastłumačyli ŭ viedamstvie.

U im nie pavinna być kamiery, internetu, dyktafona.

— Raniej u asabisty čas u vajskovaj častcy taksama možna było karystacca telefonami, — kažuć u ministerstvie. — Ale zachoŭvalisia jany ŭ vyznačanych miescach. Naprykład, u kancylaryi ŭ staršyny abo kamandzira, i vydavaŭ ich adkazny aficer. Usio heta fiksavałasia ŭ žurnałach vydačy i pryjomu telefonaŭ.

Akramia taho, kažuć u viedamstvie, kali ŭ baćkoŭ jość niejkija pytańni ci jany nie mohuć datelefanavacca da dziciaci, jany mohuć nabrać kazarmu.

— Baćki mohuć patelefanavać psichołaham, kamandziram, namieśniku pa ideałohii, — pieraličvajuć u ministerstvie. — Usie telefony ŭ volnym dostupie. Nabirać pa ich možna ŭ luby čas.

— Takoje praviła budzie dziejničać tolki ŭ Piečach abo i ŭ inšych vajskovych častkach?

— Telefonami dazvolena karystacca va ŭsich častkach — heta fakt, — paviedamiŭ Uładzimir Makaraŭ, načalnik upraŭleńnia infarmacyi Ministerstva abarony. — Ale kali i ŭ jaki čas, vyznačaje kamandzir častki. Heta tyčycca nie tolki vajennasłužačych, jakija prachodziać terminovuju słužbu, ale i tych, chto słužyć pa kantrakcie, aficeraŭ, praparščykaŭ. My ličym, toje, što heta arhanizavana ŭ Piečach, — heta vielmi dobra.

U subotu padčas pramoj linii ministr abarony Andrej Raŭkoŭ raspavioŭ i pra inšyja pieraŭtvareńni, jakija čakajuć vajskovuju častku ŭ Piečach.

— Pryniata rašeńnie vyłučyć hrašovyja srodki dla ŭstanoŭki ŭ niekatorych miescach raźmiaščeńnia vajskoŭcaŭ techničnych srodkaŭ nazirańnia, — paviedamiŭ Andrej Raŭkoŭ. — Sistema videanazirańnia dazvolić dziažurnamu pa škole, jaki znachodzicca ŭ kazarmie, bolš apieratyŭna bačyć pamiaškańni, dzie znachodziacca vajskoŭcy, kab minimizavać usialakija pytańni — sutyčak jakich-niebudź ci niejkaha ŭździejańnia.

Taksama, pa słovach ministra, pryniata rašeńnie z nahody finansavańnia abjektaŭ haradka — kłuba, stałovaj. Dla miedycynskaj roty budzie zakuplena novaje abstalavańnie. Aficery i praparščyki ŭsiaho centra prachodziać pravierku.

• 0
• 0
• 0
• 0
• 0
• 0
• 0
• 0