Kurs bitkojna dasiahnuŭ novaha histaryčnaha maksimumu. Na tarhach u noč na 17 listapada košt samaj darahoj kryptavaluty na biržy Bitfinex pieravyšaŭ $8000. Zatym kurs skarektavaŭsia, i siońnia ranicaj bitkojn vahaŭsia ŭ pramiežku $ 7500-7900 za manietu, śviedčać dadzienyja partała Coinmarketcap.
Sumarnaja kapitalizacyja bitkojna na siońniašni dzień składaje kala $130 młrd. Rynak — na dumku ekśpiertaŭ — padniaŭsia na fonie rostu bitkojna, a taksama kryptavaluty Ripple, košt jakoj pavialičyŭsia za dzień prykładna na 28% (čaćviortaja pa kapitalizacyi valuta, $ 8,6 młrd).
«Rost kryptavaluty Ripple byŭ vyklikany navinoj pra toje, što kampanija American Express abviaściła pra pačatak pracy z błokčejnam RippleNet», — patłumačyŭ RBK redaktar halinovaha partała Happy Coin Club Valeryj Smal.
Što tyčycca prahnozaŭ na bližejšy čas, to, na dumku Smala, u śniežni na rynku možna čakać zhasańnia trendu. Adnak takija prahnozy ŭžo rabilisia — i jany nie spraŭdzilisia. U pačatku listapada kurs bitkojna ŭpaŭ amal na 30%, źniziŭšysia da $ 5605.
Źviazana heta było z tym, što inviestary pieraklučylisia na alternatyŭnuju kryptavalutu — bitkojn-keš, jakaja adździaliłasia ad asnoŭnaha bitkojna ŭ žniŭni hetaha hoda. Ale paśla rost asnoŭnaha bitkojna adnaviŭsia i praciahvajecca.
Kamientary