Rekordny adtok. Jak za 2025 hod źmianiłasia kolkaść biełarusaŭ u Litvie
Pahladzieli, jak za minuły hod skaraciłasia kolkaść biełarusaŭ z DNŽ u Litvie.
Kolkaść biełarusaŭ u Litvie praciahvaje skaračacca
Na 1 studzienia 2025 hoda ŭ Litvie naličvałasia 57 511 hramadzian Biełarusi z DNŽ usich typaŭ. Za hod ich kolkaść skaraciłasia na 7 225 čałaviek. Na 1 studzienia 2026 hoda ŭ Litvie zastajecca 50 286 biełarusaŭ z DNŽ usich typaŭ.
Admietna, što kolkaść hramadzian Biełarusi, jakija majuć dazvoły na žycharstva ŭ Litvie, skaračajecca nie pieršy hod. Adnak 2025 hod staŭ rekordnym pa adtoku biełarusaŭ ź Litvy. Dla paraŭnańnia: za 2024 hod biełarusaŭ z DNŽ u Litvie stała mienš na 4 656 čałaviek.
Maksimum biełarusaŭ ź litoŭskim dazvołam na žycharstva (lubych typaŭ) było na 1 krasavika 2024 hoda — 62 844 čałavieki. Da taho času kolkaść biełarusaŭ u Litvie ź dziejnymi DNŽ rasła (dla paraŭnańnia: 1 studzienia 2021 hoda DNŽ u Litvie mieli 23 440 biełarusaŭ). Ale paźniej tendencyja źmianiłasia.
Pry hetym krychu raście kolkaść biełarusaŭ z PMŽ. Za 2025 hod ich ličba vyrasła z 3 773 da 3 958 čałaviek.
Varta adznačyć, što z 50 tysiač biełarusaŭ z DNŽ u Litvie de-fakta pražyvaje tolki kala pałovy. Reč u tym, što biełarusy ŭ Litvie čaściej za ŭsio pracujuć dalnabojščykami.
Tak, naprykład, na 2024 hod kala 25 tysiač hramadzian Biełarusi z DNŽ u Litvie pracavali kiroŭcami-mižnarodnikami. Heta było kala 72% ad usich pracaŭładkavanych biełarusaŭ u Litvie.
Amal usie jany ŭ samoj Litvie pravodziać vielmi mała času, bo, jak praviła, vykonvajuć rejsy pa ŭsioj Jeŭropie i ŭ Litvie pamiž kadencyjami baviać ličanyja dni, paśla čaho na čas adpačynku viartajucca ŭ Biełaruś.
Ahułam biełarusy ŭ Litvie pavodle kolkaści trymalnikaŭ DNŽ sastupajuć tolki ŭkraincam, jakija majuć 79 868 DNŽ u hetaj krainie. Na trecim miescy iduć hramadzianie Rasii — 13 723 čałavieki.
Na jakich padstavach čaściej za ŭsio biełarusy atrymlivajuć DNŽ u Litvie?
Z 50 286 biełarusaŭ 35 335 atrymali DNŽ na padstavie pracy.
Vyłučajucca taksama śpiecyjalisty, jakija atrymali DNŽ na padstavie vysokaj kvalifikacyi (Blue Card). Z 5 144 zamiežnikaŭ z Blue Card u Litvie 3 010 čałaviek — heta hramadzianie Biełarusi.
Što da DNŽ na humanitarnych padstavach, to taki na 1 studzienia 2026 hoda majuć 1142 biełarusy. Hodam raniej takich było 947 čałaviek (+195).
Ale heta nie aznačaje, što ad represij u Litvie chavajecca ŭsiaho 1142 hramadzianiny Biełarusi. Jašče naprykancy 2024 hoda ŭ kamientary «Našaj Nivie» dyrektar Freedom House Vilnius Vicis Jurkonis vykazvaŭ mierkavańnie, što na humanitarnych padstavach u Litvie moža pražyvać da 10 tysiač hramadzian Biełarusi.
Prosta bolšaść ź ich atrymlivała zvyčajnyja pracoŭnyja DNŽ abo Blue Card. Adnoj z pryčyn, čamu humanitarnyja DNŽ ad samaha pačatku nie karystalisia papularnaściu, možna nazvać toj fakt, što da źmien u litoŭskim zakanadaŭstvie DNŽ na humanitarnych padstavach vydavali tolki terminam na hod (z 2024 hoda pačali vydavać na 3 hady). Praz heta mnohija addavali pieravahu inšym typam DNŽ, jakija vydavali adrazu na 2—3 hady.
Tolki žminda i lanivy nie padtrymlivaje «Nivy»! Vy možacie za chvilinu padtrymać «NN» padachodnym, nie patraciŭšy ni kapiejki svaich5
Kamientary
Hetaja kraina nikoli nie budzie nam siabram, jany ŭžo navat lehli pad łukašenku. Nikoli jany nie chočuć bačyć demakratyčnaj Biełarusi, bo tady našaja moc prosta pahłynie ich u rehijonie.
Majcie honar - valicie adtul!