U minułym hodzie 15-hadovaja Marharyta paznajomiłasia na sajcie znajomstvaŭ z 28-hadovym Siarhiejem. Jana svajho ŭzrostu nie chavała, ale mužčyna pačaŭ rabić joj nieprystojnyja prapanovy, — paviedamlaje «Viačerni Babrujsk». Marharyta «hulniu» padtrymała, zaprasiła mužčynu ŭ Babrujsk, a tam pieradała jaho ŭ ruki pravaachoŭnikaŭ. Ciapier Siarhiej znachodzicca ŭ kałonii.
Marharyta raspaviała, što jaje prymusiła pajści na taki ŭčynak. Pavodle jaje słovaŭ, jaje zaŭsiody šakavali historyi pra toje, jak darosłyja ludzi zvodziać dziaciej.
«Ja pračytała, što ŭ Rasiei sami dzieci i padletki łoviać piedafiłaŭ, jość navat śpiecyjalnyja ruchi i hrupy. I vyrašyła pasprabavać», — kaža jana.
Marharyta zarehistravałasia na sajcie znajomstvaŭ mamba.ru. Chacieła paznačyć u ankiecie svoj realny ŭzrost, ale administratarami ŭstanoŭlena abmiežavańnie: z 18 hadoŭ. Tady jana dadała paru hadoŭ. Na staroncy dziaŭčyna raźmiaściła fatahrafiju tolki svajho tvaru, kab śpiecyjalna nie pravakavać «palaŭničych».
U toj ža dzień dziaŭčyna atrymała paviedamleńnie ad 28-hadovaha Siarhieja z Puchavickaha rajona Minskaj vobłaści: «Ty takaja pryhožaja, ty mnie padabaješsia». Marharyta adrazu papiaredziła, što joj 15 hadoŭ, što vučycca ŭ škole. Siarhieja heta nie spyniła.
«Oho, maleniečkaja))). Pa fota i nie skažaš», — napisaŭ mužčyna. — «Jak u ciabie na asabistym?».
Pastupova jon pieravioŭ razmovu na intymnyja temy. Spytaŭ, ci byŭ u jaje žyćci seks, jakaja na joj bializna. Vysłaŭ svaje intymnyja fatahrafii i paprasiŭ dziaŭčynu zrabić toje ž samaje. Marharyta fota nie adpraviła, adkazvała strymana. Praź niekalki dzion Siarhiej paprasiŭ u dziaŭčyny numar jaje telefona, pa viečarach pačaŭ telefanavać joj.
Praz tydzień jon prapanavaŭ sustrecca ŭ Babrujsku i zaniacca seksam. A kab dziaŭčyna nie bajałasia, paabiacaŭ kupić vino i preziervatyvy. Marharyta pahadziłasia. Va ŭmoŭleny dzień pajšła na vakzał sustrakać jaho. Dla padstrachoŭki ŭziała svajho siabra i dvuch jaho tavaryšaŭ.
Jany sustrelisia kala kramy «Marcin», niedaloka ad vakzału. Mužčyna kupiŭ u kramie vino, jany zajšli na dvor i prysieli la padjezda na łaŭku. Siabry Marharyty, jakija siadzieli pobač, padyjšli da ich i spytalisia, ci viedaje Siarhiej, kolki joj hod.
Tady mužčyna adšturchnuŭ jaho i kinuŭsia biehčy, chłopcy — naŭzdahon. Siarhiej bieh pa rejkach, ale jaho dahnali. Chłopcy patelefanavali ŭ milicyju i skazali «My złavili piedafiła».
Pravaachoŭniki zatrymali Siarhieja, vyvučyli jaho pierapisku ŭ mabilnym telefonie. Zdymki, jakija jon rassyłaŭ roznym dziaŭčatam, byli nakiravany na mastactvaznaŭčuju ekśpiertyzu. Ekśpierty paćvierdzili, što zdymki źjaŭlajucca parnahrafičnym materyjałam.
U dačynieńni da mužčyny raspačali kryminalnuju spravu pavodle artykuła ab vyrabie i raspaŭsiudzie parnahrafičnych materyjałaŭ abo ich rekłamavańni zaviedama niepaŭnahadovamu.
Paźniej dadaŭsia jašče adzin artykuł — raspusnyja dziejańni, učynienyja asobaj, jakaja dasiahnuła vasiemnaccacihadovaha ŭzrostu, u adnosinach da asoby, jakaja zaviedama nie dasiahnuła šasnaccacihadovaha ŭzrostu. Sud prysudziŭ Siarhieju 2 hady pazbaŭleńnia voli va ŭmovach ahulnaha režymu.
Siarhiej aficyjna žanaty, ale z žonkaj nie pražyvaŭ. Pryčynaj ich svarki stała mienavita jahonaja pierapiska z małaletnimi, pra jakuju žonka daviedałasia.
Pradstaŭniki Śledčaha kamiteta pa Babrujskim rajonie papiaredžvajuć usich mahčymych paśladoŭnikaŭ Marharyty i jaje siabroŭ ad paŭtareńnia takich dziejańniaŭ, tamu što jany niebiaśpiečnyja dla ich zdaroŭja i žyćcia, i mohuć pryvieści da niepradkazalnych nastupstvaŭ.
Ciapier čytajuć
Pamiatajecie Asol Śliviec? Žyćcio frystajlistki źmianiłasia da niepaznavalnaści, ciapier jana Abihal5
Kamientary