Mižnarodnaja supolnaść nie pavinna zastavacca ŭ baku ad «sapraŭdnaha narodnaha paŭstańnia», jakoje adbyvajecca ŭ Iranie, zajaviła pradstaŭnik Biełaha doma Sara Sanders.
Jana nie vyklučyła, što administracyja Donalda Trampa moža ŭvieści novyja abmiežavalnyja miery suprać Irana ŭ suviazi z padziejami ŭ krainie. Adnak Sanders udakładniła, što prezident ZŠA jašče nie pryniaŭ kančatkovaha rašeńnia ni z nahody sankcyj, ni pa pytańni ab kančatkovym vychadzie z pahadnieńnia pa iranskaj jadziernaj prahramie.
Jana ŭchiliłasia ad adkazu, ci padtrymlivaje administracyja źmienu kirujučaha ŭ Iranie režymu. Kali pratestoŭcy chočuć damahčysia svaich metaŭ šlacham uździejańnia na dziejučych lidaraŭ, chaj i dziejničajuć tak, kali heta mahčyma, patłumačyła jana.
Raniej pastajanny pradstaŭnik ZŠA pry AAN Nikiej Chejli zajaviła, što Vašynhton maje namier sklikać ekstrannaje pasiadžeńnie Rady Biaśpieki AAN i Rady pa pravach čałavieka pa padziejach u Iranie. «My nie majem prava maŭčać. Hramadzianie Irana molać ab svabodzie», — skazała Chejli.
Pa słovach Chejli, vystupy ŭ Iranie źjaŭlajucca spantanymi, ZŠA nie majuć da ich arhanizacyi nijakaha dačynieńnia. Abvinavačvańni ŭ dačynieńni da ŭspyški pratestu jana nazvała «poŭnaj biazhłudzicaj».
Masavyja akcyi pratestu ŭ Iranie pačalisia 28 śniežnia. Ludzi vykazvali niezadavolenaść rezkim rostam cenaŭ, rostam biespracoŭja i zasillem karupcyi. Na niekatorych akcyjach pratestoŭcy patrabavali nie tolki sychodu z pasady viarchoŭnaha lidara krainy Ali Chamieniei, jakoha nazyvali pry hetym «dyktataram», ale i źmieny dziaržaŭnaha ładu (Iran — isłamskaja respublika).
Pavodle niepaćvierdžanych źviestak, u chodzie pratestaŭ i sutyknieńniaŭ ź siłami pravaparadku ŭžo zahinuli bolš za 20 čałaviek, kolkaść aryštavanych pieravysiła 400 čałaviek.
Kamientary