Ukraina, jakaja znachodziłasia apošnija hady ŭ stanie piermanientnaha ekanamičnaha kryzisu, maje surjoznyja prablemy ź infrastrukturaj. Zaniadbany stan bolšaści ŭkrainskich haradoŭ užo nikoha nie ździŭlaje, u tym liku biełaruskich turystaŭ, jakija naviedvajuć Ukrainu. Ale ŭ niekatorych aśpiektach ukrainskija harady mohuć dać foru biełaruskim. Naprykład, zachodnieŭkrainski Lvoŭ, dziakujučy namahańniam miascovych uład, pieratvarajecca ŭ horad z samaj sučasnaj viełainfrastrukturaj, jakoj mohuć pazajzdrościć nie tolki biełaruskija abłasnyja centry, ale navat Minsk.
U 730-tysiačnym horadzie ŭžo pabudavana kala 120 kiłamietraŭ vieładarožak, a da 2020 hoda ahulnaja praciahłaść viełašlachoŭ vyraście da 268 kiłamietraŭ. Pryčym heta sapraŭdnyja adasoblenyja vieładarožki, a nie prosta vydzielenyja farbaj na tratuarach pałosy, jak heta robicca ŭ bolšaści vypadkaŭ u Minsku.
Adasoblenych paŭnavartasnych vieładarožak u stalicy Biełarusi nie tak i šmat: 27-kiłamietrovaja hałoŭnaja vieładarožka, 15-kiłamietrovy viełašlach na Raŭbičy, a taksama niekalki izalavanych nievialikich vieładarožak u lesaparkavych zonach. Bolšaść inšych minskich «vieładarožak» ujaŭlaje ź siabie prosta namalavanuju na tratuarach pałasu dla viełasipiedystaŭ.
U Lvovie da vieładarožak padyšli bolš surjozna. Niahledziačy na toje, što časam prajekciroŭščyki i budaŭniki dapuskajuć pamyłki pry budaŭnictvie lvoŭskich vieładarožak, maštab hetaha budaŭnictva zachaplaje.
Akramia budaŭnictva śpiecyjalnych adasoblenych vieładarožak, u Lvovie isnuje ceły šerah inšych spadarožnych siervisaŭ. Jašče ŭ 2016 hodzie ŭ Lvovie zapuścili sistemu hramadskaha viełaprakatu Nextbike, i zaraz u 24 punktach Lvova luby hramadzianin moža ŭziać viełasipied naprakat.
Aktyŭna ŭstaloŭvajucca śpiecyjalnyja śviatłafory dla viełasipiedystaŭ, a taksama nanosicca śpiecyjalnaja viełaraźmietka na darohach: va Ukrainie, u adroźnieńnie ad Biełarusi, viełasipiedysty majuć prava jechać pa prajeznaj častcy.
Imklivaje raźvićcio viełaruchu ŭ Lvovie stała mahčymym dziakujučy inšaziemnaj dapamozie. Płan pabudovy viełasipiednaj sietki Lvova byŭ składzieny pry dapamozie niamieckaha Tavarystva mižnarodnaha supracoŭnictva. Sami vieładarožki, jak i inšyja abjekty viełainfrastruktury, budujucca z pryciahnieńniem hrantaŭ niamieckaha ŭrada.
Niahledziačy na peŭnyja pośpiechi, raźvićcio viełaruchu ŭ Lvovie maje svaje prablemy. Z-za drennaj jakaści zvyčajnych tratuaraŭ lvoŭskija vieładarožki stali ŭlublonym miescam dla piešych prahułak. Častka ludziej prosta nie zrazumieła ich pryznačeńnia. Nizkaja kultura kiravańnia aŭtamabilem ukrainskimi aŭtamabilistami časam robić viełasipiednuju pajezdku prosta niebiaśpiečnaj dla žyćcia. Niahledziačy na imklivy rost kolkaści vieładarožak, istotnaha pavieličeńnia kolkaści viełasipiedystaŭ u horadzie nie adbyłosia.
Ale biełaruskim haradam jość čamu pavučycca ŭ Lvova. Biełaruski Homiel, jaki nienašmat mienšy za ŭkrainski Lvoŭ, i blizka nie maje takoj viełainfrastruktury.
Ciapier čytajuć
U Minsku adbylisia masavyja zatrymańni vydaŭcoŭ i kniharaspaŭsiudnikaŭ34
Kamientary