Biełarusa, jaki ličyć siabie palituciekačom, zatrymali ŭ Varšavie pa zapycie biełaruskaha boku. Chto jon taki?

Alaksiej D. — biełarus, jaki stała žyvie ŭ Varšavie i ŭžo niekalki hod čakaje palityčnaha prytułku (suśvietnaja žurnalisckaja praktyka aśviatleńnia temaŭ, źviazanych z uciekačami, raić nie nazyvać ich proźvišča da rašeńnia suda — Red.)

Sajt Jeŭraradyjo niadaŭna paviedamlaŭ pra dziŭnuju historyju, jakaja adbyłasia ź im.

Maŭlaŭ, da Alaksieja D. pryjšli na rabotu polskija siłaviki i zatrymali jaho na zapyt biełaruskaha boku. Papiarednie za zhvałtavańnie, a potym nibyta pryčyna stała inšaj — niaspłata padatkaŭ.

Polski sudździa vyzvaliŭ Alaksieja pad zakład da taho momantu, pakul Biełaruś nie dašle dakładnyja fakty jaho złačynstvaŭ.

Sam ža «Alaksiej D.» źviazvaje svoj pieraśled z «palityčnaj dziejnaściu». Što ž heta za čałaviek? I jakuju dziejnaść jon vioŭ, što biełaruskija ŭłady nie mohuć ab im zabycca?

Jak vyśvietliłasia, aktyvist datyčny da «Ruchu salidarnaści «Razam», niezarehistravanaj u Biełarusi arhanizacyi, jakaja asacyjujecca ź imiem svajho byłoha kiraŭnika Viačasłava Siŭčyka.

Pa słovach Siŭčyka, Alaksiej D. ciapier źjaŭlajecca siabram rady ruchu «Razam» u Polščy.

Palityčny prytułak jon paprasiŭ u hetaj krainie jašče ŭ 2015 hodzie.

Admietna, što nivodnaja pošukavaja sistema nie indeksuje imia hetaha čałavieka (pravaabaroncy viaduć padrabiaznuju chroniku zatrymańniaŭ i pieraśledu), a ŭ sacyjalnych sietkach biełaruski aktyvist padpisany pa-polsku, jahonuju apošnuju vyjavu ŭpryhožvaje polski hierb i ściah dy nadpis «11 listapada — śviata niezaležnaści».

Pavialičyć

Pra abstaviny palityčnaha pieraśledu my zapytalisia ŭ samoha Alaksieja D.

«Chadziŭ na usie akcyi: paśla vybaraŭ, Dzień Voli, Čarnobylski šlach… Na Płoščy-2010 zaśviaciŭsia, zaleh na dno, bo zvanili časta. Mianie zvolnili z pracy. U sakaviku 2011 hoda adkryŭ svaju małuju firmu, bo treba było niešta jeści. U siabie na firmie pačaŭ drukavać roznyja ŭlotki i nalepki, voś takaja techničnaja padtrymka rucha «Razam», — napisaŭ jon.

My jašče raz pierapytali, dyk u čym ža była jaho palityčnaja dziejnaść? Bo dziasiatki tysiač biełarusaŭ «zaśviacilisia» na Płoščy, i daloka nie kožny ź ich pretenduje na status palityčnaha ŭciekača ŭ Jeŭrasajuzie.

Na heta Alaksiej D. paviedamiŭ, što nie maje času adkazvać.

Varta dadać, što kolišni minski kiraŭnik ruchu «Razam» Iryna Ščasnaja skazała «Našaj Nivie», što takoha čałavieka nie viedaje.

«Z «Razam» była takaja situacyja, što kožny, chto prychodziŭ na ich schod, aŭtamatyčna zaličvaŭsia ŭ siabry», — padsumavaŭ Illa Dabratvor, jaki niekali ŭvachodziŭ u ruch.

• 0
• 0
• 0
• 0
• 0
• 0
• 0
• 0