Minčuk Kanstancin Načatkin robić sajt i pracuje nad dadatkam, jakija dapamahajuć znachodzić z dakładnaściu da 10 sm mahiły pa ŭsioj Biełarusi, piša dev.by.
Siońnia ŭ anłajn-bazie, stvoranaj Kanstancinam i jaho pamočnikami, užo kala 100 tysiač pachavańniaŭ. Ale jašče bolš treba budzie ŭnieści: kiraŭnik prajekta «Pamiatajem» płanuje «pakryć usiu Biełaruś» — a pachavańniaŭ u krainie, pavodle jaho prybliznych padlikaŭ, kala 30 miljonaŭ.
Minčuk nie pieršy hod zajmajecca rytualnymi pasłuhami. Da jaho časta źviartajucca ludzi, jakija pa niejkaj pryčynie nie viedajuć, dzie znachodzicca miesca pachavańnia ich rodnych.
Na žal, kanstatuje Kanstancin, u Biełarusi niama nivodnaje arhanizacyi, jakaja zajmałasia b pošukam miescaŭ pachavańnia. Niejki čas jon čakaŭ, što padobny prajekt voś-voś źjavicca — jak dziaržaŭnaja ci pryvatnaja inicyjatyva. Ale «čas išoŭ, a ni ŭ kaho ź biełarusaŭ i ŭ dumkach ničoha padobnaha nie było».
Dumać, jak zrabić svaju bazu i zapoŭnić jaje, pryjšłosia samomu.
Za ŭłasnyja hrošy Kanstancin zamoviŭ u raspracoŭščykaŭ mabilny dadatak, pryciahnuŭ vałancioraŭ, jakija chadzili na mohiłki i ŭnosili ŭ jaho źviestki: proźvišča, imia, imia pa baćku, daty naradžeńnia i śmierci.
U niekatorych pachavańniaŭ jość fota i hieapazicyja. Taksama dadavać pachavańni ŭ bazu mohuć usie karystalniki.
U Kanstancina vialikija płany: chutka na sajcie dadaducca niekrałohi, kab u pamiaci naščadkaŭ zastalisia nie tolki daty naradžeńnia i śmierci kankretnych ludziej, ale i historyi ich žyćcia. Budzie praduhledžana mahčymaść redahavać niekrałohi, «chavać» ich. Akramia taho, u aŭtara prajekta jość žadańnie ŭkaranić hienieałahičnaje dreva, ale pytańnie, jak heta zrabić, jašče zastajecca adkrytym.
Z časam Načatkin źbirajecca zrabić mabilnyja dadatki dla smartfonaŭ na Android i iOS, jaki buduć dublavać sajt.
A jašče jon płanuje pryviazać da miescaŭ pachavańniaŭ spasyłki, kab ludzi mahli znajści niepadalok ad mohiłak chramy i cerkvy, kaścioły abo habrejskija abščyny: «Tak karystalniki zmohuć źviartacca da śviataroŭ, kab zamović adpiavańnie, panichidu».
Anłajn-baza dastupnaja pa spasyłcy.
Kamientary