Saakašvili zajaviŭ, što ŭłady Ukrainy chočuć departavać jaho ŭ Polšču
Imihracyjnaja słužba Ukrainy pryniała rašeńnie ab departacyi lidara «Ruchu novych sił» Michaiła Saakašvili ŭ Polšču. Pra heta sam Saakašvili ŭ subotu, 10 lutaha, zajaviŭ u intervju telekampanii «Rustavi-2», paviedamlaje TASS.
Va ŭkrainskim Ministerstvie justycyi raniej śćviardžali, što nie bačać nijakich pieraškod dla departacyi palityka.
Saakašvili, jaki ciapier znachodzicca ŭ Kijevie, raspavioŭ žurnalistam, što ŭsie nieabchodnyja dakumienty dla jaho departacyi ŭ Polšču ŭžo padpisanyja. Pry hetym jon padkreśliŭ, što «niezaležna ad taho, što budzie dalej», jon praciahnie «mirnuju baraćbu za źmienu ŭłady» va Ukrainie.
Nahadajem, u mai 2015 h. eks-prezident Hruzii Michaił Saakašvili atrymaŭ hramadzianstva Ukrainy i byŭ pryznačany na pasadu kiraŭnika Adeskaj vobłaści. 26 lipienia 2017 hoda prezident Piatro Parašenka pazbaviŭ byłoha paplečnika hramadzianstva, za niekalki dzion da hetaha toj pakinuŭ pasadu hubiernatara. Z tych časoŭ Saakašvili adkryta vystupaje ŭ apazicyi da dziejučaj u Kijevie ŭłady, patrabujučy jaje adstaŭki.
10 vieraśnia jon prarvaŭsia na terytoryju Ukrainy ŭsio z toj ža Polščy. Paśla hetaha ŭ dačynieńni da jaho va Ukrainie była raspačata sprava pa piaci artykułach.
Kamientary