Studenty miechanika-matematyčnaha fakulteta BDU skardziacca ŭ sacsietkach: nibyta namieśnik dekana zaklikaŭ ich pryniać udzieł u daterminovym hałasavańni ź fiejeryčnaj arhumientacyjaj. «Naša Niva» vyrašyła spraŭdzić cytatu ŭ samoha vykładčyka.
Pa słovach studentaŭ, namieśnik dekana pa vučebnaj pracy Valery Kursaŭ skazaŭ nastupnaje: «Ci vy idziacie hałasavać daterminova, ci vy pojdziecie handlavać abutkam na Ždanovičy».
Valery Kursaŭ zajaviŭ «Našaj Nivie», što «studenty pierakručvajuć» jaho słovy.
Ale Kursaŭ nie admaŭlaje, što sapraŭdy zaklikaje studentaŭ hałasavać daterminova i tłumačyć čamu:
«Ja prosta paprasiŭ studentaŭ. Studenty pieršaha kursa karystajucca ŭsiakimi ilhotami. My ich zasialajem u internat — usich studentaŭ ź inšych haradoŭ. Jany žyvuć avansam. Da Novaha hoda im pryznačajuć stypiendyju — ni za što. Jany jašče ničoha nie zdali.
Jany vučacca ŭ dziaržaŭnym VNU, karystajucca lhotami. U nas studenty starejšych kursaŭ niezadavolenyja tym, što ich z vysokimi bałami nie zasialajuć u internat, bo nibyta treba moładź u metach adaptacyi zasialić u internat. A vy viedajecie košty na zdymnaje žyllo ŭ Minsku, — raspavioŭ Kursaŭ. —
I voś hetyja dzieci, jakija, napeŭna, pryvykli hrebliva stavicca da svaich školnych vykładčykaŭ, namahajucca raspaŭsiudzić hetaje staŭleńnie da vykładčykaŭ užo ŭ VNU.
Jany kiepska vychavanyja svaimi baćkami. I kali ja źviartajusia da ich z prośbaj vykanać hramadzianski abaviazak, jany pačynajuć tut hulać u revalucyjanieraŭ…
Chaj jany iduć [hałasavać] 18-ha, ja nie viedaju. Jak chočuć».
Kursaŭ taksama rastłumačyŭ, čamu «hramadzianski abaviazak» — heta mienavita daterminovaje hałasavańnie.
«Bo šmat chto źjedzie da baćkoŭ. I ja bajusia, što abaviazak jany ŭvohule nie vykanajuć. A heta budzie vielmi kiepska. Bo dziaržava robić dla ich vielmi šmat. Voś u hałoŭnym korpusie adramantavali stałovuju. Cudoŭnaja stałovaja, tam ciapier tanna i dobra kormiać. To bok, usio dla studentaŭ. I ciapier my čakajem simietryčnaha adkazu na ŭsie hetyja dziejańni».
Na Šry-Łancy ŭ 37 hadoŭ pamior biełaruski kinapradziusar Andrej Matałyha4
Kamientary