Biełarusy sabrali 6000 rubloŭ na bronzavuju došku da 100-hodździa BNR za try hadziny

Zbor hrošaj na bronzavuju došku da 100-hodździa BNR paśpiachova skončany. Hramada sabrała patrebnyja 6000 rubloŭ. Admietna, što dla hetaha spatrebiłasia mienš za try hadziny času.

U zbory hrošaj, raźmieščanym na «Tałace», paŭdzielničała bolš za 230 čałaviek. 

Pavialičyć

Bolš za ŭsio — 1000 rubloŭ — achviaravaŭ były maładafrontaviec, ajcišnik Michaś Butylin.

Tym časam praciahvajecca zbor hrošaj na praviadzieńnia śviatočnaha kancertu da 100-hodździa BNR na placoŭcy kala Opiernaha teatra ŭ Minsku. Na hety momant sabrany 51% ad zapytanaj sumy.

* * *

Prośbu ab dapamozie ŭ svaim fejsbuku apublikavaŭ Hleb Łabadzienka.

«Jak vy mahli čuć uryŭkami z presy, ułady pahadzilisia paviesić došku na dom u Miensku, dzie była abvieščana Biełaruskaja Narodnaja Respublika. Učora stała kančatkova viadoma, što taki dazvoł jość.

I tut paŭstali dźvie prablemy. Pieršaja — ciapierašniaja doška (jakaja była vyrablena 25 hadoŭ tamu, ale tak i nie źjaviłasia na domie) znachodzicca, miakka kažučy, nie ŭ samym dobrym stanie. Jana adlitaja ŭ 1993 hodzie ź siłuminu (spłaŭ aluminiju z kremnijem). Heta nie samy šlachietny materyjał, hladzicca jon bolš čym prościeńka. Ale dla taho času heta było, badaj, samym dastupnym varyjantam. U dvoch miescach na došcy byli dzirki, zaroblenyja nie vielmi achajna. Vieršnik składajecca z troch častak i litaralna razvalvajecca. Litary skačuć i majuć rozny pamier (aŭtar narakaje, što adlitaja doška była nie vielmi jakasna). Druhaja prablema — nam nie pahadžajucca ŭzhadniać nadpis na došcy taraškievicaj. Da tekstu pytańniaŭ niama, ale jon musić być sučasnym pravapisam.

U suviazi z hetym Arhkamitetam pryniataje rašeńnie ekstranna vyrabić kopiju hetaj doški z bronzy. U zhodzie z Arhkamitetam pa śviatkavańni jubileju adkaznaść za hetuju spravu ja biaru na siabie. Na fota — mienavita novaja doška, jakaja ciapier budzie adlivacca.

Adkazvaju na mahčymyja pytańni.

1. A ci možna niejak pierarabić ciapierašniuju došku? Možna. Ale ci nie budzie nam soramna za jaje pierad naščadkami? Bo doška znachodzicca praktyčna ŭ avaryjnym stanie i pry detalovym ahladzie vyhladaje, skažam tak, nie samym pryvabnym čynam.

2. Čamu nie adlić znoŭku ź siłuminu, kab aščadzić hrošy? Tamu što ekanomija na materyjale składzie tolki kala 40%, a hladziecca jana budzie ŭ razy horš. Robim ža na stahodździ, praŭda? Bronza — vysakarodny materyjał. Stahodździe BNR — taja data, da jakoj treba paviesić hodnuju došku.

3. Čamu my pavinny słuchacca ŭładu i vypraŭlać taraškievicu na narkamaŭku? Nie pavinny, možam pačać dyskutavać i adkłaści spravu jašče na 25 hadoŭ. Lepš, kab doška źjaviłasia z paračkaj papraŭlenych litar ci kab nie źjaviłasia zusim?

4. Ci zhodny aŭtar Aleś Šaternik z praŭkami na došcy i adliŭkaj jaje z bronzy? Tak, heta robicca ź jahonaj zhody. Bolš za toje, spadar Aleś vielmi rady, bo ŭ 1993 hodzie došku adfarmavali i adlili nie vielmi jakasna — i ciapier možna pierarabić jaje bolš hodna. Pakolki spadar Aleś ciapier za miažoj, zrabić kopiju doški jon upaŭnavažyŭ skulptara Ihara Zasimoviča.

5. Ci nie źniknie z doški «Pahonia». Nie źniknie. Hetaje pytańnie ŭzdymałasia i na ciapierašni momant havorka pra prybirańnie «Pahoni» nie idzie.

6. Dzie budzie źmieščanaja hetaja doška? Na budynku pa ciapierašniaj vulicy Vaładarskaha, 9 — mienavita tam 25 sakavika 1918 hoda była abvieščana BNR.

Pavialičyć

7. Čamu źbirajecca mienavita takaja suma? Kiłahram bronzy z adliŭkaj kaštuje ŭ siarednim 25 dalaraŭ. Naprykład, doška Baradulinu, supastaŭnaja pavodle pamieraŭ, važyła 114 kiłahram. Kali b my mieli bolš času, to adlili b jaje va Ukrainie, jak pomnik Kaściušku. Ale zrabić heta za try tydni i pryvieźci jaje aficyjna siudy niemahčyma.

8. Kali źjavicca doška? Ciapier staić meta vyrabić i pieradać jaje na mantaž da 20 sakavika z umovaj, što da 25.03 jana budzie visieć na domie.

• 0
• 0
• 0
• 0
• 0
• 0
• 0
• 0