Asudžany ŭ Rasii za dziaržaŭnuju zdradu aficer HRU Siarhiej Skrypal, mahčyma, byŭ atručany nieviadomym jadam u anhlijskim Sołśbiery.
Napiaredadni dvoje čałaviek — 66-hadovy mužčyna i maładaja žančyna — byli dastaŭleny ŭ balnicu paśla taho jak im stała kiepska ŭ handlovym centry.
Handlovy centr i niekatoryja inšyja rajony horada byli ačepleny, śpiecyjalisty ŭ kaściumach chimabarony pravodzili tam dezinfiekcyju. Pryjomnaje adździaleńnie balnicy było zakryta, adnak paźniej adkryłasia.
Skrypal byŭ asudžany ŭ 2006 hodzie, a ŭ 2010 hodzie pamiłavany razam z tryma inšymi rasijanami. Paźniej ich abmianiali na zatrymanych u ZŠA rasijskich ahientaŭ. Skrypal pražyvaje ŭ Vialikabrytanii.
Susiedzi raspaviali, što palicyja pryjechała ŭ dom Skrypala kala piataj viečara i z tych časoŭ nie źjazdžała. Samoha Skrapala jany apisali jak vietlivaha čałavieka. Pa ich słovach, niekalki hadoŭ nazad u jaho pamierła žonka.
Śviedka zdareńnia raspaviała Bi-bi-si, što zaŭvažyła paru na łaŭcy kala ŭvachodu ŭ kramu kala 4 hadzin viečara.
«Mužčyna chaatyčna varušyŭ rukami, u vačach — pustata. Dziaŭčyna ŭtknułasia ŭ jaho tvaram, jak byccam zasnuła, vidavočna straciła prytomnaść. Ščyra kažučy, jany byli vidavočna nie ŭ sabie», — skazała jana.
Aficyjnyja asoby pakul ustrymlivajucca ad kamientaroŭ, ale, jak zaŭvažaje ahladalnik Bi-bi-si pa pytańniach biaśpieki Hordan Karera, historyja ź nieviadomymi patencyjna niebiaśpiečnymi atrutnymi rečyvami niepaźbiežna prymušaje ŭspomnić atručeńnie Alaksandra Litvinienki ŭ 2006 hodzie.
Były aficer FSB Alaksandr Litvinienka pamior u špitali Łondana 23 listapada 2006 hoda ŭ 43 hady. Za niekalki hadoŭ da śmierci jon paprasiŭ prytułak u Brytanii. Jak stała viadoma paśla, jon byŭ atručany izatopam pałoniju.
Śledstva pa spravie ab śmierci Alaksandra Litvinienki pryjšło da vysnovy, što jaho zabojstva było, «imavierna, sankcyjanavana» Uładzimiram Pucinym.
Kamientary