Viciebskaja milicyja za achovu mitynhu da Dnia Voli choča hrošaj — 60 rubloŭ za pracu kožnaha milicyjaniera

Viciebskaja milicyja patrabuje z arhanizataraŭ akcyi da 100-hodździa BNR amal 60 rubloŭ za pracu kožnaha milicyjaniera, paviedamlaje «Radyjo Svaboda».

Kanstancin Smolikaŭ, adzin z zajaŭnikaŭ śviatočnaj imprezy da 100-ch uhodkaŭ niezaležnaści BNR u Viciebsku, atrymaŭ adkaz z abłasnoj upravy milicyi na prośbu zaklučyć damovu nakont achovy pravaparadku 25 sakavika. Milicyjanty vystavili rachunak: 30 udzielnikaŭ mitynhu buduć achoŭvać 15 milicyjantaŭ, arhanizataram heta budzie kaštavać 865 rubloŭ.

Spadar Smolikaŭ kaža, što jon u šoku ad umovaŭ, prapanavanych milicyjaj:

Pavialičyć

«U zajaŭcy my ŭkazvali, što kolkaść udzielnikaŭ mitynhu — 30 čałaviek. Navošta ž tam 15 čałaviek achovy? Dy jašče płacić za heta 865 rubloŭ? Ja pačaŭ aburacca, i milicyjanty skazali, što pojduć nasustrač. Damovu pahadzilisia pierazaklučyć na takich umovach: pravaachoŭnikaŭ budzie 10, i jany buduć pracavać try hadziny. Usio heta abydziecca nam u 582 rubli. Hrošy dla nas niepadjomnyja», — skazaŭ Smolikaŭ Svabodzie.

Jon kaža, što nie razumieje sensu trochhadzinnaj pracy milicyi na mitynhu, zajaŭlenym praciahłaściu adnu hadzinu. Miž tym biez papiarednie zaklučanaj damovy na achovu pravaparadku mierapryjemstva nie budzie dazvolena — takija ŭmovy zapisanyja ŭ rašeńni Viciebskaha harvykankamu «Ab masavych mierapryjemstvach u horadzie Viciebsku».

10 hod biez dazvołu na mitynh

Pavodle hetaha rašeńnia zajaŭniki abaviazanyja zaklučyć papiarednija damovy z supracoŭnikami ŽKH, medykami i milicyjaj «na absłuhoŭvańnie» mierapryjemstva. 10 hadoŭ paśla pryniaćcia rašeńnia № 881 u Viciebsku nie było dazvolena nivodnaj vuličnaj akcyi ź inicyjatyvy hramadzian, padkreślivaje Kastuś Smolikaŭ.

«Dadzieny vypadak biesprecedentny: ni miedyki, ni milicyjanty jašče ni razu nie pahadzilisia zaklučyć damovu z aktyvistami. Pahadžalisia tolki słužby ŽKH. Napiaredadni 100-hodździa BNR situacyja krychu źmianiłasia: miedyki pahadzilisia naładzić dziažurstva, jakoje budzie kaštavać kala 70 rubloŭ. Ale vydatki na milicejskija pasłuhi z hetym nie paraŭnać», — kaža zajaŭnik.

Viciebskija aktyvisty chacieli zładzić mitynh da ŭhodkaŭ BNR u Parku kultury i adpačynku čyhunačnikaŭ — adnym z troch uskrainnych parkaŭ, vyznačanych uładami dla praviadzieńnia masavych mierapryjemstvaŭ. Adkazu ad administracyi Čyhunačnaha rajona dahetul niama, i Smolikaŭ źbirajecca na asabisty pryjom, kab patłumačyć sytuacyju z nadta vysokimi koštami za milicejskija pasłuhi.

• 0
• 0
• 0
• 0
• 0
• 0
• 0
• 0