Kampanija Wargaming zvolniła dvuch minskich supracoŭnikaŭ za vykładzienyja ŭ instahram FOTA
16 sakavika dva supracoŭniki kampanii Wargaming, jakaja zajmajecca raspracoŭkaj kampjutarnych hulniaŭ, raźmiaścili na svaich staronkach u instahramie zroblenaje ŭ ofisie kampanii sełfi ź viadomym na ŭvieś śviet «Haraldam, jaki chavaje bol» — čałaviekam, za ŭśmieškaj jakoha chavajecca bol i samota. Pra heta napisaŭ partał dev.by.
23 sakavika stała viadoma, što abodva supracoŭniki byli zvolnienyja, bo źjaŭleńnie znakamitaści ŭ minskim ofisie było karparatyŭnaj tajamnicaj Wargaming.
Nieŭzabavie paśla publikacyi naviny na dev.by zdymki źnikli z adkrytaha dostupu. A ŭ paniadziełak, 20 sakavika, ich aŭtaraŭ apaviaścili ab spynieńni pracoŭnych adnosin z kampanijaj.
Pavodle słovaŭ adnaho ź ich, fitnes-treniera Alaksandra Chvaščeŭskaha (na pravym fota), nie ŭsie rabotniki byli ŭ kursie taho, što publikavać fotazdymki z «Haraldam, jakija chavaje bol» zabaroniena. Aficyjny list u karparatyŭnaj pošcie pryjšoŭ tolki bližej da viečara, užo paśla źjaŭleńnia infarmacyi ŭ miedyja, śćviardžaje Alaksandr.
«Ja, viadoma, razumieju, čamu kampanija tak pastupiła, ale ŭsio roŭna niepryjemna. […] Z majho boku heta było hłupstvam, ale zvalniać praz fatahrafiju — heta taksama vyhladaje davoli pa-durnomu», — kaža Alaksandr Chvaščeŭski.
Jon taksama śćviardžaje, što pracavaŭ pa damovie padradu i nie padpisvaŭ dakumientaŭ, jakija zabaraniajuć «kantraktnikam» vydavać peŭnuju karparatyŭnuju infarmacyju.
Na dumku fitnes-treniera, jon chutka znojdzie inšuju pracu: Wargaming dla jaho była, chutčej, padpracoŭkaj. Druhomu ž zvolnienamu supracoŭniku, dyzajnieru interaktyŭnych miedyja, jaki pracavaŭ pa kantrakcie, u hetym sensie moža być składaniej, ličyć Alaksandr Chvaščeŭski.
«Harald, jaki chavaje bol» staŭ znakamitym u 2011 hodzie paśla raspaŭsiudžańnia ŭ internecie sieryi zdymkaŭ ź im. Karystalniki źviarnuli ŭvahu na jaho niezvyčajnuju ŭśmiešku, za jakuju hieroj i atrymaŭ svoj mianušku. U 2016-m stała viadomaja asoba «fotamadeli»: im akazaŭsia žychar vienhierskaha horada Kiosieha Andraš Arata.
Raniej Wargaming zaprašała ŭ Biełaruś suśvietna viadomych hierojaŭ bajevikoŭ — Styviena Sihała i Dolfa Łundhrena.
Ciapier čytajuć
18‑hadovy były palitviazień raskazaŭ, što jon svajak Cichanoŭskaj. Jaho zatrymali, kali jon jechaŭ vajavać za Ukrainu2
Kamientary