La «Minsk-Areny» projdzie vielizarnaje śviata maroziva — całkam pa-biełarusku i z udziełam top-hurtoŭ
30 červienia la «Minsk-Areny» pabudujuć «Krainu maroziva». Tematyčny zabaŭlalny park na adzin dzień arhanizuje brend maroziva «Bieły polus», kab adznačyć 80 hod biełaruskaha płambiru.
U mini-krainy budzie svoj ściah, himn u styli chip-chop, a hramadzianam-naviedvalnikam vydaduć pašparty, ź jakimi možna budzie vandravać pa terytoryi «krainy» i atrymać biaspłatnaje eskimo ci płambir u vaflevym kubačku. Aficyjnaja mova «krainy» — biełaruskaja, tamu i na scenie zajhrajuć Akute, «Małanka Arkiestr», «Razbitaje serca pacana» dy Shuma.
Uvachod na śviata volny, čakajuć i darosłych, i dziaciej. Apošnija zmohuć ułasnaručna pabudavać fabryku maroziva z kanstruktara i pasprabavać pryhatavać chałodny desiert na impravizavanaj kuchni. Ale, pa słovach arhanizataraŭ, heta budzie pieršy fiestyval maroziva ŭ Biełarusi, skiravany nie tolki na dziaciej, ale i na darosłych.
««Bieły polus» — heta, kali možna tak skazać, «darosłaje» maroziva, — kaža Maksim Žurovič, namieśnik dyrektara pa markietynhu brenda «Bieły polus». — Biełaruski płambir pačali vypuskać u našaj krainie roŭna 80 hod tamu, i naša fabryka maroziva była adnoj ź pieršych. Nam samim stała cikava — jaki jon, toj samy smak. I zusim niadaŭna my adnavili na pradpryjemstvie aŭtentyčny recept. Nam spadabałasia toje, što atrymałasia, i tady naradziłasia ideja ŭ honar jubileju vypuścić limitavanuju partyju «Biełaha polusa 1938»».
Paŭmiljona pačak histaryčna pravilnaha płambiru ŭžo pastupili ŭ prodaž. Jaho prazvali ekamarozivam, bo ŭ składzie niama nivodnaha «Je» — tolki vosiem naturalnych inhredyjentaŭ ad viarškoŭ da vanilinu.
Padtrymlivajučy temu ekałahičnaści i dla zručnaści prajezdu da «Minsk-Areny» arhanizatary puściać u dzień fiestyvalu bieły elektrobus. Jon budzie kursiravać ad prypynku «Pałac sportu» da «Krainy maroziva» i biaspłatna padvozić haściej z 13:30 da 21:00.
Dla žycharoŭ stalicy, jakija abiaruć ekatranspart, praduhledziać asobnuju parkoŭku. Pieršyja 500 biełarusaŭ, jakija pryjeduć na fest na rovary, samakacie, skiejtach ci elektramabili, adrazu atrymajuć u padarunak pačak płambiru biez «Je».
Arhanizatary abiacajuć, što budzie taksama vialiki fud-kort, dzie možna budzie nabyć maroziva ŭ roznych spałučeńniach i inšyja desierty. Kandytary «Krainy maroziva» majuć namier ździŭlać haściej dranikami z marozivam i inšymi niečakanymi stravami.
Dla amataraŭ sportu na feście zładziać Płambiryjadu-80 — spabornictvy pa skačkach na batucie, stralbie z łuka, badmintonie, nastolnym tenisie i baskietbole 3x3.
«My pravodzim fest na terytoryi i pry padtrymcy «Minsk-Areny». Jaje technałohii dazvalajuć stvaryć śnieh navat uletku, tamu ŭ haračuju červieńskuju subotu «hramadzianie krainy» zmohuć pahulać u sapraŭdnyja śniežki», — zaznačaje arhanizatar Maksim Žurovič.
«Kraina maroziva» pačnie vydavać pašparty svaim hramadzianam u subotu 30 červienia a 14-j hadzinie. Z hetaha času buduć pracavać usie zabaŭlalnyja zony, a ŭžo ŭ 16:00 na hałoŭnaj scenie źjavicca pieršy vystupoŭca — biełaruski hurt Akute. Biełaruskamoŭny open-air budzie praciahvacca da kanca viečara, jon złučyć čatyry muzyčnyja napramki: fołk, rep, rok i dyp-chaus, što znoŭ nabiraje papularnaść. Paśla Akute na hałoŭnaj scenie vystupiać «Małanka Arkiestr», «Razbitaje Serca Pacana», a zavieršyć prahramu Shuma.
Dzień naradžeńnia płambiru skončycca a 21-j hadzinie — da hetaha času, jak miarkujuć arhanizatary, usie 30 tysiač zahadzia padrychtavanych da festu porcyj maroziva pa recepcie 1938 hoda buduć źjedzienyja.
Ciapier čytajuć
Pamiatajecie Asol Śliviec? Žyćcio frystajlistki źmianiłasia da niepaznavalnaści, ciapier jana Abihal6
Kamientary