Karona i maska dla snu: piać lubimych rečaŭ mamy 13-ci dziaciej
U našaj rubrycy «Piać rečaŭ» tradycyjna prosim roznych hierojaŭ padzialicca svaimi lubimymi kaśmietykaj, adzieńniem, cackami ci niečym jašče — karaciej, darahimi sercu rečami.
Bahinia, Karaleva drakonaŭ i Supier-žančyna — tak nazyvajuć Viktoryju Onachavu-Žuraŭlovu jaje siabroŭki. Kali Viktoryja dumała, pra jakija rečy raspavieści, joj chaciełasia, kab jany nie byli źviazanyja ź jaje stałaj dziejnaściu.
— Ja vychoŭvaju 13 dziaciej, i mnie važna, kab mianie nie ŭsprymali vyklučna jak šmatdzietnuju maci praz stereatyp, jaki jość u hramadstvie. Mnie chočacca pakazać svajo maciarynstva praz pradmiety, jakija vyklikajuć u mianie ciopłyja pačućci.
Sukienka ručnoha tkactva Heartiness
Zdymacca ja pryjšła ŭ sukiency Heartiness. Dla mianie heta nie prosta adzieńnie, satkanaje ŭručnuju, a jašče i historyja samavyznačeńnia, pošuku svajho šlachu i rostu siabie jak prafiesijanała.
Kiraŭnica i duša brenda Aksana Vinahradava dziŭnym čynam spałučaje ŭ sabie rašučaść i čullivaść da pakupnikoŭ, a mnie padabajecca, kali reč niasie ŭ sabie enierhiju stvareńnia i dušeŭnuju ciepłyniu.
Zavušnicy Ptushka
Ja abrała hetyja zavušnicy, bo jany absalutna supadajuć z maim nastrojem — ja našu ich čaściej za inšyja z toj ža pryčyny, što i sukienku ručnoha tkactva.
Viedaju, jak jany stvarajucca, ź jakim nastrojem i luboŭju da žančyn, jakija buduć ich nasić. Mnie zdajecca, što jany dosyć varjackija i śmiełyja.
Maska dla snu
Mnie zdajecca, heta niezamiennaja reč dla kožnaj mamy, a asabliva dla šmatdzietnaj. Možna zasnuć va ŭmovach luboj aśvietlenaści, što važna dla adnaŭleńnia siłaŭ i padtrymańnia resursu.
A ŭ takim vykanańni, jak hetaje, možna jašče adčuć siabie Afradytaj, jakaja naradžajecca ź pieny.
Ja čuła, što maska dobra idzie ŭ kamplekcie ź bierušami, ale pakul na svoj dośvied hety tandem vyprabavać nie paśpieła.
Kniha «Jak choča žančyna»
Ja lublu čytać, mnie padabajecca šmat raznastajnaha čytva. Ja pierakanana, što samy prosty sposab pryvić dzieciam luboŭ da čytańnia — pakazać im, jak kniha zaciahvaje ŭ svoj śviet.
Apošniaja pračytanaja mnoju kniha — «Jak choča žančyna», i heta absalutny mast ryd dla luboha čałavieka, na moj pohlad.
Jana pra seks, jak mahčymaść adčuć u pieršuju čarhu siabie, zrazumieć, što padabajecca tabie i prysłuchacca da partniora, pra toje, što niama nijakaj normy i miežaŭ, jakich my musim prytrymlivacca.
Heta vielmi važnaje ŭśviedamleńnie ŭ śviecie patryjarchatu, u jakim my žyviem, i dzie žančynie nieabchodna adpaviadać čakańniam hramadstva. Kniha, jakuju ja ŭžo paraiła pačytać usim svaim siabroŭkam, a ciapier i čytačkam «Našaj Niny» taksama raju.
Karona
I apošniaja, ale, badaj, samaja značnaja dla mianie reč — karona. Ja zaraz usio patłumaču. My ŭsie hrajem niejkija roli, dyk čamu b časam nie vykrucić niekatoryja na maksimum? Kaniešnie, pryjemna adčuvać siabie karalevaj, asabliva, kali ŭsie navokał padyhryvajuć.
Maje dzieci lubiać, kali ja nadziavaju karonu, a heta byvaje niačasta, tamu što nikoli nielha złoŭžyvać dziejsnym instrumientam. Usie prośby, jakija ja ahučyła ŭ karonie, vykonvajucca niaŭchilna i chutka, bo hulnia — heta toje, što dzieci lubiać bolš za ŭsio na śviecie.
Ja pierakanana, što karonu musić mieć absalutna kožnaja žančyna, bo my ŭsie absalutna dakładna Karalevy ŭ svajoj siamji.
Navat cacačnaja karona nakładaje peŭnyja abaviazki, ale taksama daje i pryvilei — dazvalaje lubić siabie bolš, kłapacicca ab sabie i čakać dalikatnaha staŭleńnia ad usich navokał.
Mnie chočacca, kab žančyny pračytali ŭ maich słovach, jakija jany cudoŭnyja bahini i stvaralnicy, jakoj lubovi jany ŭsie hodnyja i jak jany mohuć vypramieńvać ciepłyniu i piaščotu ŭ hety śviet, kali jany ŭ biaśpiecy i raŭnavazie. Maciarynstva vielmi važnaja sacyjalnaja rola, ale nie adzinaja mahčymaść dla samarealizacyi žančyny.
Ciapier čytajuć
«Biełarusy dastatkova mudryja, kab čakać». Sieviaryniec vystupiŭ u Vilni14
Kamientary