Fitnes abo praca stojačy? Adkaz vas ździvić

Pamiarkoŭnaja fizyčnaja nahruzka i stajańnie akazvajuć na naša cieła roznaje ŭździejańnie. Pra novyja vysnovy medykaŭ što da siadziačaj pracy piša ŭ hazecie The New York Times Hretchen Rejnaldz, pieradaje Radyjo Svaboda.

Pra nieabchodnyja 15 chvilin nahruzki štotydzień

Medyki kažuć, što adnych fizyčnych praktykavańniaŭ niedastatkova, kab padtrymlivać dobraje zdaroŭje.

Pavodle vynikaŭ novaha daśledavańnia, vielmi dobry ŭpłyŭ na naš arhanizm majuć zusim niečakanyja faktary, takija, naprykład, jak praca stojačy.

Ahulnaviadoma, što medyki dla padtrymańnia narmalnaha zdaroŭja i daŭhalećcia rajać nia mienš za 150 chvilin pamiarkoŭnaj fizyčnaj nahruzki štotydzień abo kala 20-30 chvilin kožny dzień.

Ale što my robim pa-za hetymi 30 chvilinami? Kali my ofisnyja pracaŭniki — my siadzim pa 10-11 hadzin.

Pry hetym medycyna ŭžo viedaje, što praciahłaje siadzieńnie źviazana z pavyšeńniem ryzyki dyjabetu, atłuścieńnia i vysokaha ŭzroŭniu chalesterynu.

Novy eksperyment u Niderlandach

Halandzkija navukoŭcy vyrašyli pastavić eksperyment z udziełam dobraachvotnikaŭ. Medyki vybrali 61 čałavieka, niekatoryja ź jakich byli całkam zdarovyja, inšyja mieli praźmiernuju vahu, a inšyja — i zališniuju vahu, i cukrovy dyjabet. Usich pravieryli na zdaroŭje serca i stan metabaličnaha abmienu, uklučajučy rezystentnaść da insulinu i ŭzrovień chalesterynu.

Paśla hetaha ŭsie ŭdzielniki eksperymentu pražyli try roznyja čatyrochdzionnyja peryjady, praktykujučy vyznačany medykami ład žyćcia.

Padčas pieršaha mužčyny i žančyny siadzieli pa 14 hadzin u dzień, pierapyniajučysia tolki na sanitarnyja pracedury.

Padčas druhoha ŭdzielniki eksperymentu pieraryvali siadzieńnie na adnu hadzinu, kab pazajmacca na viełatrenažory abo zrabić inšyja fizyčnyja praktykavańni. Astatnija 13 hadzin jany siadzieli.

Padčas treciaha peryjadu jany siadzieli pa 8 hadzin, a astatnija 5-6 hadzin stajali ci prahulvalisia ŭ niaśpiešnym ci źmiešanym tempie.

Paśla kožnaha z hetych čatyrochdzionnych cyklaŭ medyki paŭtarali poŭnaje abśledavańnie.

Vyniki

Paśla siadzieńnia pa 14 hadzin va ŭdzielnikaŭ eksperymentu naziralisia vysokaja ŭstojlivaść da insulinu, rost uzroŭniu chalesterynu až da niepažadanych ličbaŭ, a taksama źmieny ŭ sudzinach na kletačnym uzroŭni, što pavialičvajuć ryzyku sardečnych chvarobaŭ.

Paśla druhoha cyklu z adnoj hadzinaj pamiarkoŭnych fizyčnych nahruzak stan tak zvanych endatelijalnych kletak u sudzinach palepšyŭsia, a uzroŭni cukru i insulinu nie źmianilisia.

Paśla treciaha cyklu ličby, jakija charaktaryzujuć rezystentnaść da insulinu i ŭzrovień chalesterynu, istotna palepšylisia.

Lekary zrabili vysnovu, što stajańnie akazvaje stanoŭčy ŭpłyŭ na arhanizm praz pavieličeńnie kolkaści myšačnych skaračeńniaŭ.

Myšcy padčas pracy spalvajuć cukar u kryvi dla vypracoŭki rečyvaŭ, jakija dapamahajuć trymać uzrovień insulinu pad kantrolem, z adnaho boku, a ź inšaha, vykidajuć chimičnyja rečyvy, jakija źnižajuć uzrovień škodnaha chalesterynu.

Padsumavańnie

Vysnova, jakuju zrabili aŭtary eksperymentu, hučyć tak: adnoj pamiarkoŭnaj fizyčnaj nahruzki dla padtrymańnia dobraha zdaroŭja niedastatkova, treba skaračać kolkaść času, jaki my pravodzim siedziačy.

Tamu i adkaz na pastaŭlenaje ŭ zahałoŭku pytańnie hučyć tak: i fitnes, i praca stojačy.

• 0
• 0
• 0
• 0
• 0
• 0
• 0
• 0