Kala restarana «Pajedziem, pajadzim» aŭtamabil źbiŭ aktyvista Leanida Kułakova. U jaho pierałom ruki
Incydent adbyŭsia 27 červienia kala 17 hadziny padčas pikietavańnia restaracyi «Pajedziem, pajadzim», piša «Radyjo Svaboda».
«Dźvie dziaŭčyny padjechali da restarana na aŭtamabili «Tajota» i, nie źnižajučy chutkaści, choć bačyli pikietoŭcaŭ, pasprabavali prajechać na terytoryju restarana. Choć tut znak visić — usiaho 5 kilametraŭ na hadzinu.
Aŭtamabil litaralna ŭjechaŭ u pikiet i źbiŭ Leanida Kułakova z noh. U jaho paškodžana naha i ruka ździorta da kryvi. Pikietoŭcy vyklikali chutkuju i DAI. Ciapier z kiroŭcam raźbirajucca supracoŭniki DAI, a Leanidu Kułakovu akazvajuć dapamohu medyki», — skazaŭ Pavał Sieviaryniec.
Aleś Turovič paźniej paviedamiŭ Svabodzie, što ŭ špitali, kudy jaho adviezła chutkaja, u jaho dyjahnastavali pierałom levaj ruki.
Aktyvist «Eŭrapiejskaj Biełarusi» Leanid Kułakoŭ ciaham červienia rehularna biare ŭdzieł u pikietach kala restaracyi ŭ Kurapatach, zakryćcia jakoj užo miesiac damahajucca aktyvisty roznych partyj i hramadzkich arhanizacyj demakratyčnaha kirunku.
Supracoŭniki DAI raniej skłali na Leanida Kułakova niekalki pratakołaŭ za parušeńnie praviłaŭ darožnaha ruchu. U adnym z pratakołaŭ Leanid Kułakoŭ napisaŭ, što «stajaŭ i budzie stajać u pikietach», pakolki pratestuje suprać znachodžańnia zabaŭlalnaj ustanovy ŭ achoŭnaj zonie Kurapataŭ.
Kamientary