Biełaruski anarchist raspavioŭ, jak jaho aryštavali ŭ Rasiei

Anarchist Arciom Markin pravioŭ dva dni ŭ rasiejskaj turmie i byŭ vysłany z krainy, bo «ŭjaŭlaje pahrozu nacyjanalnaj biaśpiecy». Jon viarnuŭsia ŭ Miensk i raspavioŭ padrabiaznaści svajho zatrymańnia ŭ intervju karespandentu belsat.eu.

30 červienia ŭ miastečku Pramuchina Ćviarskoj vobłaści adbyvałasia navukovaja kanfierencyja «Pramuchinskija čytańni», pryśviečanaja ŭ tym liku analizu moładzievych pratestaŭ 1968-ha hodu. Akramia lekcyjaŭ, udzielniki dapamahali ŭ restaŭracyi siadziby Michaiła Bakunina.

Jak tłumačyć Arciom Markin, na hetuju padzieju sabralisia nie tolki anarchisty, ale i prosta «ludzi, jakija krytyčna myślać», — tam byli nie tolki rasiejcy, ale i šmat zamiežnikaŭ. Ź biełarusaŭ tam byŭ tolki Arciom.

«Ranicaj 8 lipienia ŭ viaskovy dom, dzie my nočyli, uvajšli supracoŭniki miascovaj palicyi. Spačatku my ich nie bačyli, a tolki pačuli pytańnie «Ci jość tut chto?». Potym jany padyšli da mianie i paprasili pakazać dakumienty, usie troje byli ŭ formie. Svaje paśviedčańni jany pakazali, ale situacyja była stresavaja i proźviščy ja nie paśpieŭ zapisać. Pabačyŭšy moj biełaruski pašpart, jany pačali niešta źviarać u bazie dadzienych, jakaja była na telefonie».

Arciomu nie patłumačyli, što heta za baza i čamu jahonyja piersanalnyja źviestki tam apynulisia. Nieŭzabavie palicyjanty zajavili biełarusu: jon nieŭjazny i musić pajści ź imi dla raźbiralnictva.

«Na vulicy byli palicejskija mašyny, ludzi ŭ cyvilnym i žančyna z adździełu pa mihracyi. Ja pytaŭsia, čamu ja nieŭjazny ŭ Rasiei, ale palicyjanty skazali, što pryčynu mnie patłumačać tolki supracoŭniki FSB i tolki kali my prajedziem u pastarunak».

Chłopiec vielmi ździviŭsia, bo dahetul u jaho nie ŭźnikała prablem z rasiejskimi ŭładami. Peŭny čas jon navat pracavaŭ u Maskvie. Miažu pierasiakaŭ lehalna, pamiežniki bačyli jahony pašpart i nie zadali nivodnaha pytańnia.

«Čamuści FSBšniki nie mahli mnie pieradać pastanovu ab vysyłcy z krainy na miescy, im treba było pahutaryć sa mnoj mienavita ŭ pastarunku. Užo ŭ adździele palicyi ŭ Taržku, kudy mianie pryvieźli, ja daviedaŭsia: sa mnoj buduć hutaryć ludzi z Centru «E» (padraździaleńnie FSB pa baraćbie z ekstremizmam). Tolki na sudzie ja daviedaŭsia, što adnaho «ešnika» zvali Raman Biazusin. Spačatku mnie ŭručyli paviedamleńnie, što ja mušu pakinuć Rasieju da 13 lipienia na padstavie padpunktu 1 častki 1 artykuła 27 adpaviednaha Fiederalnaha zakonu, bo «ujaŭlaju pahrozu nacyjanalnaj biaśpiecy, cełasnaści miežaŭ i biaśpiecy žyćcia hramadzianaŭ Rasiejskaj Fiederacyi. Potym sfatahrafavali, niahledziačy na majo abureńnie. «Siadzi cicha, zakryj rot», — taki byŭ adkaz».

Arciom adrazu pasprabavaŭ vyśvietlić, dopyt heta ci prosta hutarka, a kali dopyt, to chto viadzie pratakoł? Pavodle słovaŭ anarchista, supracoŭnik FSB zadavaŭ zbolšaha ahulnyja pytańni pra kanfierencyju, navošta jon pryjechaŭ, ci ŭdzielničaje ŭ palityčnych arhanizacyjach. Arciom na ŭsie pytańni adkazvać admoviŭsia.

«Hałoŭnym apasieńniem było, što maje zatrymańnie niejak źviazanaje sa spravaju «Sietki». Heta vialikaja kryminalnaja sprava suprać anarchistaŭ u Rasieju, jakuju aktyŭna raskručvaje FSB, a aryštavanych katujuć. Tym bolš u aficyjnaj farmuloŭcy siłavikoŭ adznačajecca, nibyta jačejka arhanizacyi jość u Biełarusi… Adnak jany nie ŭžyvali fizičnaj siły ŭ dačynieńni da mianie, nie kazali ničoha, źviazanaha z «Sietkaj» i ja chutka zrazumieŭ, što heta nie moj vypadak..».

Razam z tym, Arciom uzhadvaje, jak adzin ź siłavikoŭ zapytaŭsia: «Siabroŭ tvaich na minułym tydni ŭ lesie SOBR pakłaŭ, kruta, a?». Na ŭvazie majecca zatrymańnie anarchistaŭ pad Krupkami 30 červienia, kali siłaviki z aŭtamatami amal 5 hadzin pratrymali aktyvistaŭ na ziamli. Na dumku Arcioma, takija słovy rasiejskaha pravaachoŭnika śviedčyć ab vielmi ščylnaj supracy ź biełaruskimi orhanami ŭ pieraśledzie siabraŭ anarchičnaha ruchu.

Nie dabiŭšysia pakazańniaŭ, Markina pavieźli na miedyčny ahlad, ale toj kateharyčna admoviŭsia. Pavodle č. 1 art. 6.9 KoAP RF, admova ad ahladu daje padstavy mierkavać, što čałaviek užyvaŭ narkotyki. Tamu na jaho skłali pratakoł i źmiaścili ŭ kamieru pastarunka ŭ Taržku.

«Umovy tam byli žudasnyja: kamiera 2 na 2 mietry, kudy nabilisia šeść čałaviek. Na padłozie piasok, šmatki ježy ź pieradačak, pavietra nie pastupaje. Nijakaj bializny nie vydajuć, tamu daviałosia prosta na padłozie lažać. U takim stanie ja pravioŭ 27 hadzin».

Arcioma asudzili na 2 sodni administratyŭnaha aryštu. Astatni čas paśla sudu jon adbyvaŭ pakarańnie ŭ ahulnaj kamiery SIZA ŭ Taržku.

«Kanvoj i achova hladzieli na mianie bolš ź cikaŭnaściu, čym z ahresijaj. Dla ich źjaŭleńnie «palityčnaha» było redkaściu. U kamiery SIZA spačatku my spali na «scenie» — naścile z došak, bieź bializny. Ale potym pa majoj prośbie jaje prynieśli, stali trochu lepiej stavicca. Adpuścili mianie na svabodu roŭna ŭ termin. Kali ja vychodziŭ, to chacieŭ pakinuć ježu ź pieradačy svaim sukamiernikam, ale achoŭnik zabaraniŭ. «Heta ŭ inšych miescach dzialicca dobra, a ŭ nas — nie». Nu što skažaš, heta pieraviernuty śviet».

27-hadovy Arciom Markin nie ŭpieršyniu patrapiŭ pad represii. Letaś 15 sakavika paśla dazvolenaha ŭładami Maršu niedarmajedaŭ, jaho z paplečnikami brutalna zatrymali na tralejbusnym prypynku siłaviki ŭ cyvilnym. Tady anarchist atrymaŭ 12 sodniaŭ aryštu, jakija adbyŭ u CIP na Akreścina.

• 0
• 0
• 0
• 0
• 0
• 0
• 0
• 0