Pamior lehiendarny vyratavalnik Fiat Sierdža Markjonie: jon biez škadavańnia vyhaniaŭ top-mieniedžaraŭ i nieachajna apranaŭsia

Prezident kancerna Fiat Chrysler Serdža Markjonie pamior u Šviejcaryi va ŭzroście 66 hadoŭ. Na minułym tydni jon pakinuŭ pasadu hiendyrektara kampanii z-za uskładnieńniaŭ paśla apieracyi.

Markjonie ŭznačaliŭ Fiat ŭ 2004 hodzie. Pad jaho kiraŭnictvam kampanija, jakaja znachodziłasia ŭ pieradbankrotnym stanie, prajšła šlach da vychadu na Ńju-Jorkskuju fondavuju biržu ŭ 2014 hodzie. Da hetaha momantu jana ŭžo nazyvałasia Fiat Chrysler — paśla taho, jak Fiat kupiŭ amierykanskaha aŭtavytvorcu, što znachodziŭsia ŭ stadyi bankructva.

U 2003 hodzie straty Fiat składali 6 młrd jeŭra. Markjonie, uznačaliŭšy kampaniju, uvajšoŭ u partniorstva z General Motors. Heta pryviało da zvalnieńnia tysiač supracoŭnikaŭ, ale taksama i da źjaŭleńnia novych madelaŭ mašyn i skaračeńnia času vyvadu novaha aŭtamabila na rynak z čatyroch hadoŭ da paŭtara hoda. U vyniku ŭžo ŭ 2005 hodzie Fiat znoŭ staŭ prybytkovym.

Pad jaho kiraŭnictvam kapitalizacyja Fiat vyrasła bolš čym u 10 razoŭ dziakujučy restrukturyzacyi biznesu i padziełu aktyvaŭ.

Markjonie vyłučyŭ u asobnuju kampaniju-vytvorcu spartovych mašyn Ferrari i vyvieŭ jaje na biržu. U ramkach IPO kampaniju acanili ŭ 10 młrd dalaraŭ, a ciapier jana kaštuje amal 35 młrd dalaraŭ - amal stolki ž, kolki i Fiat Chrysler.

Serdža Markjonie naradziŭsia ŭ 1952 hodzie ŭ Italii ŭ siamji palicejskaha. Kali jamu było 14 hadoŭ, siamja pierajechała ŭ Taronta. U jaho było padvojnaje hramadzianstva. U Kanadzie Markjonie atrymaŭ stupień mahistra dziełavoha administravańnia i doktarskuju stupień pa pradprymalnickaj dziejnaści. Jon pačaŭ karjeru ŭ kanadskim padraździaleńni Deloitte & Touche, zatym pracavaŭ u niekalkich paŭnočnaamierykanskich i jeŭrapiejskich kampanijach.

Jak adznačaje ahienctva Bloomberg, Markjonie adroźnivaŭsia pramaliniejnym charaktaram i nieachajnaj pa italjanskich mierkach manieraj apranacca: jak praviła, jon źjaŭlaŭsia na publicy ŭ džynsach i švedry.

Jon lubiŭ chutkuju jazdu, i ŭ jaho haražy było niekalki «Fierary». Jon piŭ pa dziasiatku filižanak espresa ŭ dzień i kuryŭ pa pačku cyharet.

Reparcior ahienctva Tamaza Ebchart uspaminaje, što Markjonie pravodziŭ u ofisie pa 14-16 hadzin i patrabavaŭ ad padnačalenych poŭnaj addačy. Jon byvaŭ hruby, što kaštavała było jamu dobrych adnosin z mnohimi upłyvovymi pradstaŭnikami haliny i palitykami.

Markjonie biez škadavańnia rastavaŭsia z top-mieniedžarami - paśla prychodu ŭ Fiat jon zvolniŭ amal usio kiraŭnictva, a ŭ 2009 hodzie prarabiŭ taki ž numar z Chrysler, u toj ža dzień pryvioŭšy na miesca zvolnienych dziasiatak pačatkoŭcaŭ.

U Markjonie i jaho byłoj žonki zastalisia dvoje dziaciej.

• 0
• 0
• 0
• 0
• 0
• 0
• 0
• 0