Na poŭdni Tadžykistana dniom 29 lipienia byŭ ździejśnieny napad na hrupu turystaŭ, jakija vandravali pa krainie na viełasipiedach. Pra heta ŭ paniadziełak, 30 lipienia, paviedamlaje «Radyjo Ozodi» (miascovaja słužba «Radyjo Svaboda»).
Incydent adbyŭsia ŭ pasiołku Danhara. Aŭtamabil na chutkaści prataraniŭ hrupu zamiežnych turystaŭ, jakija vandravali pa krainie na rovarach. Ministr unutranych spraŭ Tadžykistana Ramazon Rachimaŭ zajaviŭ, što paśla hetaha kiroŭca i pasažyry mašyny vyjšli z sałona i napali na turystaŭ z ahniastrelnaj zbrojaj i nažom.
Byli zabityja dva amierykancy, 56-hadovy hramadzianin Niderłandaŭ i šviejcarac, jašče try čałavieki paciarpieli. Vidavočcy zdareńnia paviedamili «Radyjo Ozodi», što cieły turystaŭ byli raskidanyja daloka adno ad adnaho. Taksama śviedki zabojstva vykazali zdahadku, što zdareńnie było padobna chutčej nie na DTZ, a na staranna spłanavany napad.
Pavodle infarmacyi, jakaja pastupiła ad rehijanalnaha kiravańnia achovy zdaroŭja, na ciełach zahinułych byli vyjaŭlenyja nažavyja ranieńni.
Pravaachoŭnyja orhany krainy arhanizavali śpiecapieracyju pa pošuku tych, chto napadaŭ. Užo ŭviečary niadzieli adzin z udzielnikaŭ raspravy byŭ zatrymany, jašče dvoje — źniščany. Kiraŭnik MUS krainy padkreśliŭ, što rasśledavańnie spravy znachodzicca pad asabistym kantrolem prezidenta krainy Emamali Rachmona.
2018 hod u Tadžykistanie abvieščany hodam turyzmu. Pa aficyjnych dadzienych, kolkaść zamiežnych turystaŭ, jakija tolki za piać miesiacaŭ hetaha hoda prybyli ŭ Tadžykistan, pieravysiła 900 tysiač čałaviek, što ŭ čatyry razy bolš u paraŭnańni z anałahičnym pieryjadam letaś.
Ciapier čytajuć
«Čamu ja pavinien dakazvać, što nie darmajed?» Pradprymalnika z Homiela pamyłkova zapisali ŭ niezaniatyja — jon daviedaŭsia tolki paśla vializnych rachunkaŭ za kamunałku2424
Kamientary