«Koržyč havaryŭ, što baicca pamierci». Što jaho sasłužyŭcy raskazvajuć pra słužbu ŭ Piečach
Na pracesie ŭ spravie ab śmierci sałdata pačaŭsia dopyt sasłužyŭcaŭ. Usie jany pryznanyja paciarpiełymi, u zali prysutničajuć 22 čałavieki, jašče kala dziasiatka sałdat u sud nie pryjšli. Radyjo «Svaboda» cytuje frahmenty ź ichnaha dopytu prakuroram, a taksama ŭryŭki pakazańniaŭ, dadzienych padčas śledztva.
Paciarpieły Andrej Sivucha: «Ja atrymlivaŭ pa šyi.
Na pastrajeńni heta zdaryłasia, za toje, što mieŭ nieakuratnuju pryčosku. Dva ŭdary było. Bolš nie pryhadaju ničoha. Jašče adnojčy ŭnačy nas padniali siaržanty i zahadali nadzieć supraćhazy, a paśla adciskacca ad padłohi. Nia pamiataju, jak doŭha my adciskalisia. Mnie padabałasia heta, ja narmalna ŭsprymaŭ, narmalna pastaviŭsia. Hrošaj siaržantam ja nie davaŭ, pradukty im nie nabyvaŭ. Svajho siaržanta Skuratoviča charaktaryzuju stanoŭča».
Paciarpieły taksama skazaŭ, što pra Koržyča viedaje mała i blizkich stasunkaŭ ź im nie padtrymlivaŭ.
Zhodna z materyjałami śledztva, na dopycie ŭ Śledčym kamitecie Sivucha raskazvaŭ, što Koržyč addaŭ svoj telefon siaržantu Baranoŭskamu i toj im karystaŭsia. Taksama, pavodle Sivuchi, «siaržant Baranoŭski praktyčna kožny dzień nanosiŭ udary sałdatam nahoj, prymušaŭ adciskacca ad padłohi ŭ supraćhazach».
U pakazańniach Sivuchi, dadzienych padčas śledztva, taksama jość zhadki ab praktycy vykupu mahčymaści karystacca mabilnymi telefonami za 20-40 rubloŭ. Akramia hetaha, Sivucha raskazvaŭ śledčym pra čutki, zhodna ź jakimi Alaksandar Koržyč płaciŭ siaržantam za toje, što jaho vyzvalali ad ciažkoj haspadarčaj pracy i strajavoj padrychtoŭki.
Paciarpieły Kirył Štyk: «Padčas słužby ja mieŭ mahčymaść karystacca telefonam
u budnyja dni, choć dazvolena było tolki raz na tydzień u vychodnyja. My ŭtroch karystalisia adnym telefonam. Skinulisia z sasłužyŭcami pa 10 rubloŭ, i siaržant Baranoŭski dazvoliŭ nam zvanić. Sam ja hrošy jamu nie davaŭ. Kolki takich vypadkaŭ było za čas słužby, ja nia viedaju. Nia pamiataju.
Byŭ adzin vypadak, kali siaržant Skuratovič prymusiŭ mianie ŭpaści na padłohu, daŭ kamandu «va ŭpor ležačy». Heta zdaryłasia paśla taho, jak ja dapuściŭ parušeńnie. Taksama paćviardžaju vypadak z supraćhazami i adciskańniami.
Paśla adboju siaržant Baranoŭski daŭ kamandu «Hazy!», my nadzieli supraćhazy i paśla kamandy pačali adciskacca.
Ci rabiŭ heta Koržyč, ja nia viedaju, sam nia bačyŭ. Adciskalisia my prykładna 15-20 razoŭ. Siaržant Baranoŭski ličyŭ. Ja nia viedaju, navošta heta ŭsio było zroblena. Mahčyma, niechta razmaŭlaŭ paśla adboju, šumieŭ. Paśla jašče byŭ taki ž vypadak. Pryčynaj stała toje, što my nie pamyli adtuliny ŭ prybiralni — «ački».
Jak ja pastaviŭsia da hetaha? Ja navat nia viedaju. Dumaju, takija rečy niedapuščalnyja. Fizyčna nie było ciažka asabista dla mianie. Kali ty idzieš u armiju i nia možaš adcisnucca 30 razoŭ, to što heta? Mahčyma, niekamu było.
Byŭ adzin vypadak, što niekamu stała drenna. Dakładna nia pamiataju.
Što mahu skazać pra siaržantaŭ? Narmalnyja. Pravodzili nam zaniatki, dapamahali, padbadziorvali na palihonie. Siaržant Baranoŭski mnie adnojčy dapamoh, pakłaŭ hrošy na telefon.
Pra staŭleńnie siaržantaŭ da Koržyča nie mahu ničoha skazać, akramia taho vypadku, kali Viaževič zahnaŭ Koržyča ŭ jamu i špurlaŭ u jaho rydloŭki. 4-5 rydlovak kinuŭ, tak.
Z Koržyčam pra stan jaho zdaroŭja ja nie razmaŭlaŭ. Adzin raz tolki jon mnie skazaŭ, što baicca za svajo žyćcio, kali siadaje ŭ tank. Jon skazaŭ: «Ja bajusia, što pamru. Kali siadaju ŭ tank». Nia viedaju, čamu Koržyč tak siabie adčuvaŭ. Apošni raz žyvym ja jaho bačyŭ pierad tym, jak Koržyča adpravili ŭ medrotu».
Paciarpieły Kirył Štyk taksama raskazaŭ, što ŭ jaho nie zabirali pradukty ź pieradač. Nie sutykaŭsia jon i z vymahańniem praduktaŭ i cyharet uzamien za mahčymaść naviedvać raźmieščanuju na terytoryi častki kramu. Z Alaksandram Koržyčam siabroŭskich adnosinaŭ nia mieŭ, ničoha drennaha pra jaho skazać nia moža.
Siaržantaŭ Baranoŭskaha, Skuratoviča i Viaževiča abvinavačvajuć u vymahańni i złoŭžyvańni ŭładaj, jakoje paciahnuła za saboj ciažkija nastupstvy ŭ vyhladzie samahubstva padnačalenaha Alaksandra Koržyča. Usie jany pryznajuć vinu častkova.
Spravu ab trahičnaj hibieli sałdata terminovaj słužby Alaksandra Koržyča raśśledavali kala 9 miesiacaŭ, jana znachodziłasia na asabistym kantroli ŭ Alaksandra Łukašenki. Da pracesu raśśledavańnia ŭ jakaści vyklučeńnia była dapuščanaja maci niabožčyka Śviatłana Koržyč.
No media source currently available
U vyniku śledztva pryjšło da vysnovy, što Alaksandra Koržyča daviali da samahubstva tavaryšy pa słužbie, abvinavačańni pradjaŭlenyja bolš jak 15 asobam. Pry hetym sam SK raniej paviedamlaŭ, što cieła znajšli ŭ piatli sa źviazanymi nahami i naciahnutaj na hałavu majkaj — jak heta spałučajecca z versijaj pra samahubstva, maci nie patłumačyli. Śviatłana Koržyč kateharyčna nia zhodnaja z vysnovami śledztva. Na dumku žančyny, jaje syna zabili, a pryčynaj hetaha stała niežadańnie Koržyča płacić tavaryšam pa słužbie hrošy.
Kamientary