Prezident Rasii Uładzimir Pucin padčas pieramoŭ u Minsku 11 i 12 lutaha 2015 hoda z Anhiełaj Mierkiel, Fransua Ałandam i Piatrom Parašenkam pahražaŭ ukrainskamu prezidentu razdušyć ukrainskaje vojska.
Pra heta eks-prezident Francyi Fransua Ałand napisaŭ u svaich miemuarach, paviedamlaje ŭkrainskaje vydańnie «Tiždień».
«Parašenka z Pucinym pastajanna pavyšali hołas adzin na adnaho. Rasijski prezident tak raźniervavaŭsia, što staŭ pahražać kančatkova razdušyć vojska svajho vizavi. Heta pakazała, što rasijskija vojski na ŭschodzie Ukrainy jość. Pucin schamianuŭsia i ŭziaŭ siabie ŭ ruki», — cytuje vydańnie miemuary francuzskaha prezidenta.
Pa słovach Ałanda, Parašenka abaraniaŭ suvierenitet Ukrainy, kali Pucin patrabavaŭ aŭtanomiju dla častak uschodnich ukrainskich rehijonaŭ.
«Parašenka nieadstupna abaraniaŭ suvierenitet svajoj krainy, tady jak Pucin damahaŭsia aŭtanomii dla paŭstancaŭ pravincyj i chacieŭ adciahnuć spynieńnie ahniu jašče na try tydni. Jon byŭ nastolki žorstkim, što admaŭlaŭ svaju pramuju suviaź ź vierchavodami sieparatystaŭ, kazaŭ, što nie moža za ich vyrašać, patrabavaŭ, kab ź imi prakansultavalisia», — piša Ałand.
Pavodle jaho słoŭ, pieramovy prasoŭvalisia vielmi pavolna ź vialikaj kolkaściu piarečańniaŭ. Zatym Pucin zajaviŭ, što jamu treba prakansultavacca ź vierchavodami sieparatystaŭ.
«Pucin vychodzić patelefanavać. Praź niekalki chvilin jon viartajecca i paviedamlaje, što sieparatysty — tyja samyja, pra jakich jon kazaŭ ranicaj, maŭlaŭ, ich nie viedaje, — zhodny», — adznačyŭ Ałand.
Akramia taho, jak adznačaje vydańnie, Ałand, nie vahajučysia, vyznačaje vinavatych u padzieńni samalota MN-17.
«Za niekalki miesiacaŭ da pieramoŭ, u lipieni 2014-ha, rakieta, jakuju vypuścili prarasijskija bajaviki, niespadziavana źbiła ŭ rajonie Daniecka samalot Malaysia Airlines i zabiła 298 pasažyraŭ, ź jakich 80 byli dziećmi», — napisaŭ eks-kiraŭnik Francyi.
Ciapier čytajuć
Kalekcyju karcin Viktara Babaryki raspradajuć ź vialikimi źnižkami. Ale biez samaha darahoha dla jaho tvora4
Kamientary