Bjucifuturyzm: jakoj kaśmietykaj buduć karystacca ludzi budučyni?
Apošnija 20 hadoŭ kaśmietyčny rynak Jeŭropy i ZŠA charaktaryzujecca tendencyjaj admaŭleńnia ad dekaratyŭnaha mas-markietu na karyść arhaničnych srodkaŭ. Pra heta kaža, naprykład, štohadovaja stanoŭčaja dynamika rostu rynku naturalnaj kaśmietyki: zhodna z novaj spravazdačaj firmy Grand View Research Inc., da 2025 hoda jaho abjom dasiahnie 25,11 miljarda dalaraŭ ZŠA.
Ideja «back to basics» (nazad da pryrody) dla mnohich zasnavanaja, u pieršuju čarhu, na vialikim rasčaravańni. Jašče niadaŭna ludzi byli ŭpeŭnienyja, što štučnaje charčavańnie lepšaje za hrudnoje tolki tamu, što stvarajecca navukoŭcami i prajšło vialikuju kolkaść testaŭ u łabaratoryjach. Na źmienu navukova-techničnamu prahresu prychodzić stahodździe ŭśviadomlenaści, kali ludzi pačynajuć addavać pieravahu tym rašeńniam, jakija padychodziać tolki im: samastojna piakuć chleb, hatujuć tvaroh i šyjuć sabie vopratku. Źmiena takoha padychodu adbiłasia i na vybary kaśmietyki. Kali prytrymlivacca praviła ajurviedy («ad sanskr. आयु «āyu» i वेद «veda» — «viedańnie žyćcia»), nanosić na skuru varta tolki toje, što my mahli b źjeści.
Siońnia razam z bjuci-trenierkaj Natallaj Dzičkoŭskaj razvažajem nakont taho, jakoj moža stać naša kaśmietyčka budučyni.
Daviedka: Natalla Dzičkoŭskaja, kiraŭnica pieršaj u Biełarusi Škoły pryhažości, śpiecyjalist pa naturalnym amaładžeńni skury.
— Ja časta pravodžu takuju paralel: čałaviek — univiersalny sałdat, jaki moža vyžyć navat na niezasielenaj vyśpie. Pieršapačatkova naša skura nie raźličvała na raźvićcio chimičnaj pramysłovaści i stvareńnie śpiecyjalnych kremaŭ. Pry ŭmovie fizičnaha zdaroŭja i narmalnaha emacyjnaha stanu my možam vyhladać dobra, vykarystoŭvajučy tolki pryrodnyja srodki. Va ŭmovach dzikaj pryrody skurnaje sała i jość naš najlepšy krem, ale va ŭmovach horada jaho ŭžo niedastatkova. Prablema ekałohii pryviała ludziej da nieabchodnaści šukać anałahi. Ale, z punktu hledžańnia histałohii, na praciahu apošnich tysiač hadoŭ skura čałavieka nie źmianiałasia. Adnak vytvorcy kaśmietyki kožnyja paŭhoda sprabujuć pierakanać nas, što znajšli toj samy inhredyjent, jaki padoryć viečnuju maładość. Składana pavieryć, ale, na maju dumku, skury patrebny vielmi prosty dohlad.
Pierš za ŭsio, kaśmietyčka budučyni dakładna budzie składacca ź mienšaj kolkaści srodkaŭ. Naturalnaja kaśmietyka šmatfunkcyjanalnaja.
Adzin tolki alej daje nam šmat mahčymaściaŭ dla dohladu za saboj: jaho možna ŭcirać ŭ skuru hałavy dla źnižeńnia vypracoŭki skurnaha sała, nanosić pad krem i zamiest kremu, apracoŭvać im kancy vałasoŭ i ŭcirać u kutykułu, navat vykarystoŭvać jak demakijaž. I heta daloka nie ŭsio. Pry hetym siezonnaść budzie ŭpłyvać tolki na skład kremu: zimoj u im budzie bolš alejaŭ i, adpaviedna, bolš vysoki pracent tłustaj fazy, a letam jon budzie bolš lohkim.
Efirny alej. Jaho atrymlivajuć z duchmianych častak raśliny. Jany ŭjaŭlajuć saboj vysokakancentravanyja bijałahična aktyŭnyja rečyvy. Taki srodak treba dadavać pa kroplach, tamu ŭvodzić jaho ŭ skład svajoj kaśmietyki mohuć tolki darahija brendy. Siońnia takoha sintetyčnaha rečyva abo kaśmietyčnaha inhredyjentu, dziejańnie jakich mahli b pieravysić efirny alej, prosta nie isnuje. Jon vałodaje najmahutnym antybakteryjalnym, supraćmikrobnym i supraćvirusnym dziejańniem, zmahajecca sa stareńniem, palapšaje krovazvarot i zdolnaść skury da adnaŭleńnia.
Raślinny alej. Atrymlivajuć šlacham chałodnaha prasavańnia z tłuščaźmiaščalnaj syraviny (nasieńnia, travy, arechaŭ). Raślinny alej treba vybirać u zaležnaści ad tłusta-kisłotnaha składu, jaki pradvyznačaje jaho ŭłaścivaść: ciakučaść, pranikalnaść, zdolnaść imhnienna ŭbiracca ci stvarać plonku. Alei treba padbirać indyvidualna, pad typ skury, i nanosić tolki na vilhotnuju skuru, bo sami pa sabie jany nie ŭtrymlivajuć vilhać. Usiaho dźvie-try kropli pry pravilnym i rehularnym dohladzie buduć prynosić vam karyść. Ranicaj nieabchodna ačyścić skuru čymści miakkim, naprykład, nutavaj abo harochavaj mukoj. Dalej jaje treba zakiślić z dapamohaj tonika. Jość try raślinnyja alei, jakija padychodziać dla ŭsich typaŭ skury: heta kunžut, rys i lasny arech.
DIY-krem. Voś užo amal 10 hod ja varu sabie kremy samastojna i liču heta vialikim praryvam. Pa-pieršaje, samastojnaja vytvorčaść — heta mahčymaść mianiać recepturu ŭ zaležnaści ad siezonnaści i biahučaha stanu skury. Pa-druhoje — heta mahčymaść vybirać tyja inhredyjenty, jakija padabajucca i padychodziać mienavita vam. Naprykład, kali ja chaču zrabić krem dla skury vakoł vačej, to viedaju, što jość kala 10 efirnych alejaŭ, jakija ja mahu ŭklučyć u skład dla dasiahnieńnia pažadanaha vyniku. Ź ich ja vybieru try, vodar jakich maksimalna pryjemny mnie tut i ciapier, i dadam ich u skład. DIY-kaśmietyka kudy bolš bijałahična aktyŭnaja, čym pramysłovyja srodki. Zusim nie abaviazkova mieć adukacyju kuchara i prafiesijnuju plitu, kab hatavać smačnuju i karysnuju ježu. Tamu mahčymaść zrabić krem, jaki padychodzić mienavita vam, a nie jašče miljonu žančyn, — vydatny sposab padabrać idealny srodak dla svajoj skury.
Hidrałat. Kvietkavaja vada vielmi karysnaja dla taniziravańnia skury paśla ačyščeńnia i adnaŭleńnia vałasoŭ paśla myćcia. Niezdarma našy babuli spałoskvali hałavu paśla myćcia advaram krapivy abo cytrynavaj kisłatoj. Hety sposab dapamahaje pryhładzić łuskavinki i adnavić pH paśla ŭździejańnia ščołačnych ačyščalnych srodkaŭ.
A jašče siarod pracedur pa dohladzie za saboj u budučyni abaviazkova buduć sieansy ŭ psichołaha, bo vaša źniešnaść prama zaležyć ad unutranaha stanu.
Asnoŭnaj zadačaj kožnaha pavinna być prapracoŭka siabie ž dla zdabyćcia ŭnutranaj ustojlivaści i niezaležnaść ad mierkavańnia navakolnych. U vypadku pulpitu abo karyjesu my nie zajmajemsia samalačeńniem, a zapisvajemsia da stamatołaha. Hetak ža i za rašeńniem psichałahičnych prablem treba źviartacca da śpiecyjalistaŭ. Kali vy prapracoŭvajecie svaje hłybinnyja prablemy z kampietentnym psichołaham, to pačynajecie bačyć siabie inšymi vačyma.
Ustanoŭka «pryhažość patrabuje achviar» pavinna nazaŭsiody zastacca ŭ 20-m stahodździ. Paviercie, palubić siabie našmat praściej, čym vieści biaskoncuju baraćbu z asablivaściami svajoj źniešnaści. Bo ŭ kančatkovym vyniku vy ŭsio roŭna prajhrajecie. Tamu dla mianie kaśmietyčka budučyni — heta, pierš za ŭsio, historyja pra luboŭ da sabie i ŭmieńnie słuchać svaje žadańni.
Kamientary