ZŠA adnavili sankcyi suprać Irana, jakija byli admienienyja ŭ 2015 hodzie administracyjaj Baraka Abamy. Donald Tramp nazvaŭ heta «najmacniejšymi sankcyjami, jakija kali-niebudź ŭvodzili ZŠA».
Abmiežavańni ŭviedzieny na handal naftaj, bankaŭski siektar, sudnachodstva. Usiaho, pa słovach dziaržsakratara ZŠA Majka Pampiea, sankcyi zakranuć 700 iranskich firmaŭ i bankaŭ.
Pavodle jaho źviestak, pracu ŭ Iranie ŭžo prypynili bolš za sto mižnarodnych kampanij, a ekspart nafty źniziŭsia bolš čym na adzin miljon baralaŭ u dzień, z 2,8 miljona baralaŭ da 1,7 miljona.
Adnaŭleńnie pakieta sankcyj ZŠA suprać Irana supała z hadavinaj zachopu amierykanskaha pasolstva ŭ Tehieranie, jakija adbylisia ŭ 1979 hodzie padčas Isłamskaj revalucyi. U krainie prajšli pamiatnyja mitynhi, pryśviečanyja hetaj padziei, a viarchoŭny lidar, ajatała Chamieniei, vystupiŭ z ahulnanacyjanalnaj zajavaj, paviedamlaje iranski telekanał Press TV.
«Meta amierykanskich sankcyj — kalečyć i strymlivać ekanomiku Irana, ale ŭ realnaści vynikam stała imknieńnie krainy da samadastatkovaści», — źviarnuŭsia Chamieniei da suajčyńnikaŭ. Jon nahadaŭ, što supraćstajańnie Tehierana i Vašynhtona praciahvajecca z 1979 hoda, kali byŭ skinuty łajalny Vašynhtonu režym piersidskaha šacha. «Užo 40 hadoŭ praciahvajecca supraćstajańnie pamiž Amierykaj i Iranam, i naš vorah zrabiŭ niamała krokaŭ — ad viadzieńnia vajennaj i ekanamičnaj baraćby, da vajny z dapamohaj ŚMI … Hałoŭnaja zadača Złučanych Štataŭ va ŭsim hetym — znoŭ damahčysia daminavańnia, jakoje było ŭ pieryjad tyranii [šacha], ale hetaha nie budzie», — skazaŭ viarchoŭny lidar Irana.
Chamieniei padkreśliŭ, što z punktu hledžańnia Tehierana, mienavita irancy atrymali vierch u hetym 40-hadovym supraćstajańni.
Kamientary