«Heta strašny son luboha zachodniaha ŭrada: rasijskija bajcy va ŭłasnaj krainie. Sabatažniki, pravakatary, špijony. Toje, što hučyć jak fantastyka, u Šviejcaryi źjaŭlajecca realnaściu», — piša žurnalist šviejcarskaha vydańnia Blick Fabijan Ebierchard.
«Na praciahu niekalkich hadoŭ rasijskaja dziaržava metanakiravana stvaraje tut varožyja «śpiačyja jačejki». Dla hetaha Maskva vykarystoŭvaje spartyŭnyja škoły ŭ Ciurychu, Biernie i Łuhana, dzie pravodziacca treniroŭki pa rasijskim bajavym majsterstvie «Sistema». Na tak zvanyja «sieminary» ŭ Šviejcaryju prylatajuć byłyja bajcy elitnych padraździaleńniaŭ rasijskich śpiecsłužbaŭ», — apaviadaje aŭtar publikacyi.
«Nakolki surjoznaja niebiaśpieka z Uschodu, pakazvajuć frahmienty kanfidencyjnaha dakumienta, składzienaha Fiederalnaj słužbaj vyviedki Šviejcaryi (NDB). Zhodna z dakumientam, adnoj z zadač sietki «Sistema» źjaŭlajecca «pamnažeńnie ŭzbrojenaj mocy (…) z dapamohaj nieidentyfikavanaha padraździaleńnia». Meta: «ažyćciaŭleńnie biesparadkaŭ i destabilizacyi ŭ metavym rehijonie», a taksama viarboŭka «budučych elitnych bajcoŭ». NDB piša ab finansavym i ideałahičnym upłyvie rasiejskich uładaŭ », — pieradaje vydańnie.
Byłyja bajcy rasijskaha śpiecnaza pravodzili ŭ apošnija hady i treniroŭki ŭ škołach «Sistemy» ŭ Biernie, siarod ich — Uładzimir Vasiljeŭ i Michaił Rabko. «Apošni nibyta pa hety dzień źjaŭlajecca blizkim daradcam rasijskaha ministra justycyi i znachodzicca takim čynam u pramym padnačaleńni ŭ Pucina», — piša šviejcarskaje vydańnie.
U dakumiencie NDB, praciahvaje Ebierchard, jość namioki i na toje, chto źjaŭlajecca hałoŭnym u šviejcarskaj sietcy «Sistemy». «U dakumiencie NDB ŭspłyvaje imia D.C. Jon kiruje kłubam spartyŭnych adzinaborstvaŭ ŭ Rehiensdorfie i ličycca centralnaj fihuraj. U rasparadžeńni SonntagsBlick majucca fatahrafii, jakija paćviardžajuć jaho suviazi z vysokapastaŭlenymi pradstaŭnikami rasijskaj armii», — pieradaje žurnalist. U pryvatnaści, adznačaje Ebierchard, D.C. sustrakaŭsia z Hienadziem Nikułavym, kiraŭnikom achoŭnaha chołdynhu «Voŭk», jaki taksama znachodzicca pad sankcyjami ZŠA z-za sieparatysckaj dziejnaści na Uschodzie Ukrainy.
Pa słovach niamieckaha žurnalista i ekśpierta pa Rasii Barysa Rajtšustara, u škołach «Sistemy» ŭ asnoŭnym trenirujucca zvyčajnyja spartsmieny. «Ale niekatorych ź ich u vyniku viarbujuć. Jany lotajuć u Maskvu i vučacca tam vykarystańniu vybuchoŭki i zbroi», — havorycca ŭ artykule. «Hetyja bajavyja padraździaleńni źjaŭlajucca na Zachadzie apornaj kałonaj u sakretnaj vajnie Pucina», — pieradaje vydańnie słovy Rajtšustara. «Infarmacyja NDB pakazvaje, što dziejnaść rasiejcaŭ daŭno vychodzić za ramki štabnych hulniaŭ. U kanfidencyjnym dakumiencie zhadvajucca vučeńni pa vajenna-prykładnych vidach sportu ŭ šviejcarskim vysakahorje», — piša Ebierchard naprykancy.
Kamientary