Sud daŭ hod «chimii» fanatu z Rasii, jaki źbiŭ dzicia, što vybiehła na darohu
Sud Savieckaha rajona Minska prysudziŭ da adnaho hoda «chimii» futbolnaha zaŭziatara z Rasii, jaki źbiŭ mašynaj dzicia, što vybiehła na darohu. Svajaki rychtujuć apielacyju.
Avaryja zdaryłasia ŭ Minsku 11 žniŭnia 2018 hoda, kala 16.00. 22-hadovy Kirył Lachoŭski jechaŭ na Chevrolet Orlando pa vulicy Jakuba Kołasa. Kiroŭca najechaŭ na trochhadovaha chłopčyka, jaki pierabiahaŭ darohu pablizu rehulavanaha piešachodnaha pierachodu na čyrvony sihnał śviatłafora.
U vyniku DTZ chłopčyk atrymaŭ ciažkija cialesnyja paškodžańni. Praz tydzień jaho vypisali ź lakarni, jaho žyćciu i zdaroŭju ničoha nie pahražaje.
Kiroŭcu ŭziali pad vartu
Jašče ŭ chodzie śledstva abvinavačany całkam pryznaŭ svaju vinu, raskajaŭsia i kampiensavaŭ maralnuju i materyjalnuju škodu baćkam, a taksama kampiensavaŭ vydatki na lačeńnie dziciaci.
Baćki dziciaci dvojčy pisali chadajnictva śledčamu, u jakim prasili źmianić Lachoŭskamu mieru strymańnia, paviedamlali, što pretenzij da jaho nie majuć.
Miera strymańnia ŭ chodzie śledstva była źmienienaja na zakład. Da suda abvinavačany znachodziŭsia ŭ Minsku i žyŭ na zdymnaj kvatery.
Siońnia sud Savieckaha rajona Minska pryznaŭ pieciarburžca Kiryła Lachoŭskaha vinavatym u parušeńni PDR, što paciahnuła pryčynieńnie ciažkaha cialesnaha paškodžańnia. Zhodna z č. 2 art. 317 KK Biełarusi, jaho prysudzili da adnaho hoda pazbaŭleńnia voli z adbyvańniem pakarańnia ŭ kałonii-pasialeńni.
Na sudovaje pasiadžeńnie z Rasii pryjazdžali rodnaja siastra Kiryła, jaho ciotka i dziaŭčyna.
Svajaki Lachoŭskaha nie čakali takoha prysudu, uličvajučy, što, paśla taho jak Kiryła adpuścili pad zakład, jany «nie chavalisia ŭ Rasii, a sumlenna pryjechali na sud».
Rodnyja Kiryły Lachoŭskaha paviedamili, što buduć abskardžvać prysud u haradskim sudzie Minska.
Kamientary