Płastyčny chirurh: U pieršyja dni studzienia apieracyj zaŭvažna bolš
«Płastyčnaja chirurhija — heta kampramis», — ličyć doktar miedycynskaha centra «Konfidens» Aleh Stasievič, jaki bolš za 20 hadoŭ dapamahaje ludziam udaskanalvać siabie.
«Kampramis, bo kali chočaš vialikija hrudzi, to musiš dumać pra toje, jak heta adabjecca na chrybietniku, — raźvivaje dumku Aleh Stasievič. — Kali chočaš, kab tvar byŭ padciahnutym i vyhladaŭ maładym, to musiš razumieć, što zastanucca šnary (i jany zaŭvažnyja, treba tolki viedać, kudy hladzieć). I tak možna kazać pra lubuju płastyčnuju apieracyju».
Bolšaść pacyjentaŭ, jakija źviartajucca da płastyčnych chirurhaŭ, imknucca pazbavicca prykmiet uzrostu. Šmat chto choča skarektavać formu hrudziej, nosu ci vušej. Ale jak adznačaje doktar, vialikaja cikavaść jość taksama da karekcyi konturu ruk, noh, karekcyi intymnaj vobłaści, da lipasakcyi.
«Čaściakom pacyjenty prychodziać damaŭlacca pra lipasakcyju, ale nie da kanca razumiejuć, što heta, — adznačaje płastyčny chirurh. — Lipasakcyja nie dapamoža pachudzieć, heta niapravilnaja dumka. Lipasakcyja dapamahaje źmianić kontur cieła. Naprykład, kali ŭ pacyjenta fihura typu «jabłyk», to paśla lipasakcyi jana stanie niby «piasočny hadzińnik»», — tłumačyć Aleh Stasievič.
Płastyčnaja chirurhija — nie vyrašeńnie psichałahičnych prablem
Siońnia miedycyna dazvalaje pryznačać apieracyju litaralna na nastupny dzień paśla pieršaj kansultacyi. Adnak zdarajecca, što pacyjent u apošni momant pieradumvaje.
«Ja zaŭsiody kažu, što płastyčnaja chirurhija — heta nie vyjście dla ludziej ź psichałahičnymi prablemami. Pacyjenty ž zdarajucca roznyja, byvaje, patrabujuć kardynalna źmianić abličča. Ale heta niemahčyma, bo adna z hałoŭnych umoŭ luboj płastyčnaj apieracyi na tvary — kab pacyjent byŭ paznavalnym paśla ŭmiašańnia, — raspaviadaje chirurh. — Byvaje, pacyjent zastajecca niezadavoleny vynikam. Heta adbyvajecca tady, kali ź niejkich pryčyn doktar i pacyjent zrazumieli adno adnaho pa-roznamu, nie pryjšli da adzinaha mierkavańnia pra vynik apieracyi».
«Byvaje, chtości pieradumvaje rabić apieracyju prosta ŭ dzień, na jaki jana była pryznačana. Čamu? Chto viedaje? Byli ŭ majoj praktycy pacyjenty, jakija admaŭlalisia ad apieracyi praz toje, što ranicaj im pierabieh darohu kot. Raskazvali pra vypadki, kali pacyjent nie pahadžaŭsia apieravacca ŭ doktara, bo jon niejak nie tak pachnie».
Štohod na pačatku studzienia, kali ŭsia kraina jašče dahulvaje navahodnija śviaty, u płastyčnych chirurhaŭ zvyčajna asabliva haračaja para — klijentaŭ šmat jak nikoli.
«Ale ja dumaju, što heta źviazana nie z tym, što ŭsie imknucca pačać novaje žyćcio, a z tym, što pieršyja tydni novaha hoda zvyčajna niepracoŭnyja. Voś i chočuć ludzi niešta padpravić u źniešnaści. Sacyjalnyja harantyi nie raspaŭsiudžvajucca na estetyčnyja apieracyi, a značyć, daviedka pra niepracazdolnaść nie vydajecca. U siarednim za tydzień možna adnavicca praktyčna paśla luboj płastyčnaj apieracyi i viarnucca da ofisnaj pracy», — raspaviadaje doktar.
Jak praviła, na 15 klijentak-žančyn u jaho prypadaje adzin pacyjent-mužčyna.
«Mužčyny źviartajucca z tych ža pryčyn, što i žančyny — chočuć vyhladać maładziej i estetyčniej. Prychodziać i viadomyja ludzi, kudy ž biez hetaha».
Niekatoryja klijenty Aleha Stasieviča stanoviacca stałymi. I źjava hetaja nie takaja i redkaja.
«Ci vaźmusia ja rabić čarhovuju apieracyju, zaležyć ad fizičnych mahčymaściaŭ pacyjenta i zdarovaha sensu. Naturalna, lepš nie rabić umiašańniaŭ na roznych častkach cieła adnačasova. Adnak zdarajecca, što nie zakranać roznych častak cieła niemahčyma prosta technałahična. Naprykład, pry karekcyi nosu ŭ niekatorych vypadkach nieabchodna skarystać u jakaści krynicy płastyčnaha materyjału chrastkovyja častki vušnych rakavin ci rebraŭ. A pry pierasadkach ułasnaj tłuščavaj tkaniny (lipafilinh) u adnoj častcy cieła vykonvajecca lipasakcyja, a ŭ druhoj, ułasna, lipafilinh».
Ceny ŭ biełaruskich klinikach płastyčnaj chirurhii adny z samych nizkich u Jeŭropie i va ŭsim śviecie naohuł, śćviardžaje doktar. Da ich u centr, naprykład, pryjazdžajuć «miedycynskija turysty» z samych roznych krain: ad Polščy i Rasii da Novaj Ziełandyi i ZŠA.
Dobry doktar toj, chto moža vysłuchać i paspačuvać
Płastyčny chirurh — svajho rodu psichołah.
«Kaniečnie, ludzi prychodziać ź vielmi asabistymi historyjami. I ty pavinien nie prosta ich vysłuchać, ale i paspačuvać, i prapanavać rašeńnie. Pra lekaraŭ naohuł časam kažuć «dobry doktar» — dyk voś heta charaktarystyka čaściakom nie maje dačynieńnia da niejkich prafiesijnych navykaŭ abo majsterstva. Heta pra toje, što dobry doktar vysłuchaje i suciešyć. Časam ja stamlajusia ad hetaha, ale lubić svaju prafiesiju nie pierastaju».
Ciapier čytajuć
Dziejačy emihracyi pasvarylisia z nahody śpisaŭ zaprošanych na pryjom da prezidenta Polščy65
Dziejačy emihracyi pasvarylisia z nahody śpisaŭ zaprošanych na pryjom da prezidenta Polščy
Ciahnik Pinsk—Minsk spyniŭsia pad Dziaržynskam biez aciapleńnia. Paśla prybyćcia ŭ stalicu pasažyraŭ razabrali ludzi z sacsietak i raźvieźli pa chatach1515
Kamientary