Tematyčnyja forumy i supołki ŭ sacsietkach dla maładych maci čas ad času napaŭniajucca abjavami nastupnaha źmiestu:
«Kuplu hrudnoje małako, pa dźvie šklanki ŭ dzień. Vielmi patrebna. Telefanujcie».
«Usim pryvitańnie! U mianie šmat małaka, hatovaja padzialicca. maładaja maci, dziciaci — tydzień, zdarovaja, biez škodnych zvyčak. Minsk».
Čaściej za ŭsio patrebu ŭ hrudnym małace majuć maci niedanošanych dzietak, u jakich pa tych ci inšych pryčynach źbiŭsia ŭłasny «małočny» praces. Abo žančyny, jakija nie mohuć karmić dzicia samastojna pa miedycynskich pakaźnikach.
U padtrymku hrudnoha vykormlivańnia chacia b da taho momantu, pakul małomu nie spoŭnicca paŭhoda, vystupaje Suśvietnaja arhanizacyja achovy zdaroŭja. I dla mnohich maci heta, a taksama arhumienty blizkich nie na karyść sumiesiaŭ, stanovicca pryčynaj, kab šukać małako ŭ inšych žančyn.
Ale ci niebiaśpiečna heta? Nakolki aktualny dla Biełarusi popyt na donarskaje małako?
Praanalizavali situacyju i raspytali pa temie maładych maci-udzielnic forumaŭ i śpiecyjalistaŭ pa hrudnym vykormlivańni.
Što kažuć žančyny, jakija nabyvajuć/pradajuć małako na forumach?
«Kupić sumiesi lahčej»
U Alesi siońnia — dvoje dziaciej. Kali jana naradziła pieršynca, to aktyŭna raźmiaščała na forumach abjavy pra prodaž małaka: «U mianie było jaho šmat, tamu i chaciełasia padzialicca. Praŭda, da mianie ŭ vyniku nichto nie źviartaŭsia, i heta, dumaju, dobra. Bo potym kolkaść małaka ŭ mianie pačała źmianšacca i dapamahać kamuści jašče ja b zmahła maksimum niekalki tydniaŭ».
Alesia ličyć, što biełaruski nie da kanca razumiejuć, nakolki karysnaje svajo małako ŭ paraŭnańni z sumiesiami z kram: «U mianie šmat znajomych admaŭlalisia ad hrudnoha vykormlivańnia prosta tamu, što niešta kryšačku nie ŭdałosia, i jany paśla i nie zachacieli praces adnaŭlać. Jany nabyvajuć dzietkam sumiesi, bo tak lahčej».
«Svajo małako ja addavała susiedcy»
Nadzieja z foruma ŭ pryvatnaj razmovie raskazvaje, što aktyŭna dzialiłasia svaim małakom z susiedkaj, ź jakoj jany razam lažali ŭ radzilni. «Joj dziciaci nie adrazu addali, 2300, zdajecca, naradziłasia. Pieršapačatkova prykładańniaŭ da hrudziej nie było — małako źnikła. A sumieś jany taksama doŭha nie mahli padabrać: nabyvali, a tyja ŭsio nie padychodzili, u dziaciej alerhija «vyłaziła». Ujavicie, kolki hrošaj vykinuli na śmietnicu. A majo małako, zdajecca, pajšło. Ja i sama zamarožvała sabie jaho, a potym dziciaci to kašu im razvodziła, to tvaroh rabiła».
Žančyny raskazvajuć, što pradajuć butelečki z małakom pa 250-300 mł u siarednim za 5 rubloŭ. Niechta addaje jaho prosta tak, bo zusim nie ŭsprymaje spravu jak biznes — usiaho tolki jak dapamohu tym, chto sapraŭdy maje ŭ hetym patrebu.
Alena raspaviadaje, što pradavała małako niekalkim žančynam, papiarednie atrymaŭšy daviedki pra svoj stan zdaroŭja ŭ paliklinicy, i śćviardžaje, kali b małaka nie było ŭ jaje samoj, to taksama b addała pieravahu tamu, kab uziać jaho ŭ inšaj maci.
Adnak daloka nie ŭsie pradaŭcy hrudnoha małaka z forumaŭ majuć na rukach daviedki pra stan zdaroŭja. Miž inšym, praz małako moža pieradacca šerah infiekcyj.
U takoj situacyi, ličyć pradstaŭnica abjadnańnia baćkoŭ niedanošanych dziaciej «Rana» Volha Skarbienka, było b niadrenna, kab u Biełarusi źjaviŭsia svoj bank hrudnoha małaka (na siońniašni momant abjadnańnie składajecca z 450 ludziej z aficyjnymi členskimi biletami, usiaho ž pa respublicy ŭ ich čatach padtrymki znachodziacca bolš za 700 baćkoŭ).
Mienavita dla niedanošanych dzietak hrudnoje małako, raskazvajuć śpiecyjalistki centra, źjaŭlajecca załoham chutčejšaha naboru vahi.
Bijachimik, śpiecyjalistka pa hrudnym vykormlivańni Taćciana Karpienka ŭvohule nastojvaje:
«Hrudnoje małako — heta kompleksnaja bijałahičnaja vadkaść, jakaja adroźnivajecca nie tolki ŭ roznych žančyn, ale i pieražyvaje źmieny ŭ adnoj i toj ža žančyny ŭ ramkach adnaho dnia i pa chodu rostu dziciaci. Sumieś ža štodzień maje tolki adzin skład».
«Nam patrebny bank indyvidualnaha małaka»
Banki hrudnoha małaka isnujuć ŭ ZŠA, Kanadzie, Francyi, Italii i šerahu inšych krain Jeŭropy. U 2014-m pieršy padobny prajekt źjaviŭsia ŭ Rasii (pry tym što ŭ časy SSSR donarskija punkty małaka pry paliklinikach ŭvohule byli pašyranaj źjavaj, ale ŭžo ŭ pačatku 90-ch hadoŭ hetyja ŭstanovy spynili svajo isnavańnie ŭ suviazi ź ciažkaściami ŭ kantroli jakaści małaka i raźvićciom industryi dziciačych pažyŭnych sumiesiaŭ).
Usie donary bankaŭ prachodziać mnostva miedycynskich testaŭ, kab paćvierdzić, što jany całkam zdarovyja — tolki paśla scedžanaje imi małako pasteryzujuć i zamarožvajuć. U takim vyhladzie jano moža zachoŭvacca da hoda.
«Donarskaje małako pavinna prachodzić šmatstupieńčatuju sistemu pravierki, i ŭ našaj krainie zabiaśpiečyć heta pakul što ciažka. Tym bolš u pracentnych suadnosinach nie tak šmat žančyn hatovyja na toje, kab karmić dzicia čužym małakom. Tamu my sa svajho boku vystupajem za toje, kab u Biełarusi, pierš za ŭsio, źjavilisia banki indyvidualnaha vykormlivańnia. Kab pry radzilniach toje małako, što maci scedžvaje, naprykład, pakul dzicia znachodzicca ŭ reanimacyi, možna było zachavać i zamarozić, a potym karystacca im na druhim etapie vykormlivańnia, kali ŭ maci ad stresu ci niedasypaŭ źmianšajucca jaho zapasy».
U 2017-m hodzie płanavałasia, što pry RNPC «Maci i dzicia» źjavicca bank indyvidualnaha hrudnoha małaka, ale pytańnie zastałosia adkrytym.
Bijachimik Taćciana Karpienka ličyć, što asnoŭnaja prablema tut — u hrašach.
«Banka niama, a stvaryć jaho vielmi niaprosta, heta patrabuje finansavych vydatkaŭ. Tamu pakul što maci, dumaju, buduć praciahvać abmieńvacca małakom pamiž saboj. Naprykład, pry dapamozie vałanciorskich prajektaŭ, jaki funkcyjanujuć u Rasii, ale tam šukajuć i prapanoŭvajuć svajo małako i biełaruski».
Čytajcie taksama:
Minčanka kormić dzicia hrudźmi ŭ ludnym miescy — VIDEAekśpierymient
Ciapier čytajuć
Adstaŭny padpałkoŭnik milicyi adsudziŭ kvateru ŭ svajoj dački. Hučnaja siamiejnaja historyja z Bresta10
Kamientary