Mižnarodnaja hrupa navukoŭcaŭ vyjaviła pareštki raniej nieviadomaha staražytnaha čałavieka, nazvanaha Homo luzonensis, piša Nature.
Małyja pamiery kostak pakazvajuć na toje, što heta jašče adzin karlikavy vyhlad hominini, padobny da «chobitaŭ» Homo floresiensis. U artykule havorycca, što jon žyŭ na Filipinach niekalki dziasiatkaŭ tysiač hadoŭ tamu, što źmianiaje karcinu mihracyj dahistaryčnych ludziej z Afryki.
Paleantołahi znajšli 12 čałaviečych kostak u piačory Kaljan (vostraŭ Łuson, Filipiny) u tym ža stratyhrafičnym płaście adkładaŭ, dzie ŭ 2007 hodzie była vyjaŭlenaja častka nahi — pluśnievaja kostka — uzrostam 67 tysiač hadoŭ. Pry hetym samyja staryja reštki čałavieka vidu Homo sapiens, znojdzienyja niepadalok, na vostravie Pałavan, datavalisia bolš poźnim časam, ad 30 da 40 tysiač hadoŭ tamu. To bok, da pryšeścia ludziej sučasnaha typu na Filipinach ŭžo žyli hominini. Adnak adnoj kostki było niedastatkova dla identyfikacyi novaha vyhladu.
Novaja znachodka ŭklučaje kostku stupni, frahmienty ruk, ściehnavuju kostku i zuby. Astanki naležać jak minimum trom indyvidam — dvum darosłym i dzicia. Jany nahadvajuć kostki Homo Sapiens, adnak majuć adroźnieńni. Premalarnyja zuby majuć prykmiety, što nazirajucca ŭ čałavieka pramachodziačaha Homo erectus i aŭstrałapitekaŭ, a malary padobnyja na zuby čałavieka sučasnaha typu, ale majuć mienšyja pamiery.
Ciapier čytajuć
Cichanoŭskaja pavinšavała biełarusaŭ razam z Kaleśnikavaj, Sieviaryncam i Łatuškam15
Kamientary