Biełaruskamoŭny masažyst Aleś Ablak — adzin ź lidaraŭ bresckich pratestaŭ

Užo druhi hod praciahvajecca pratest žycharoŭ Bresta suprać pabudovy la horada akumulatarnaha zavoda. Za hety čas u horadzie źjavilisia novyja hramadskija lidary, jakija biaruć na siabie adkaznaść i čaściej za astatnich traplajuć pad zatrymańni.

Adnym z takich źjaŭlajecca 28-hadovy Aleś Ablak. Chto jon taki i jak pryjšoŭ da hramadskaj dziejnaści?

Pavialičyć

Mužčyna rodam z Barysava. Kali skončyŭ škołu, to chacieŭ pastupać na historyka, ale miedkamisija paraiła hetaha nie rabić. Sprava ŭ tym, što Ablak — invalid pa zroku, a na histfaku davodziłasia b čytać šmat knižak, pracavać z kampjutaram. Chłopcu prapanavali pastupać na masažysta abo psichołaha. Alesiu pryjšoŭsia daspadoby pieršy varyjant.

Tak jon pastupiŭ u Hrodzienski miedycynski kaledž na masažysta, vučyŭsia dva hady. Potym pracavaŭ u Respublikanskaj balnicy miedycynskaj reabilitacyi ŭ Aksakaŭščynie pad Minskam.

Mabyć, tak by i zastaŭsia ŭ Minsku ci Barysavie, ale sustreŭ kachańnie. Dziaŭčyna była rodam z Bresta, tak i pierajechaŭ u žončyn horad. Žonka pracuje buchhałtaram na pradpryjemstvie «Santa-Bremar».

U Breście spadar Ablak pracavaŭ spačatku ŭ sanatoryi, a paśla ŭ paliklinicy masažystam. Kaža, što zarobak ŭ paliklinicy składaje nie bolej za 400 rubloŭ. U studzieni jon sam zvolniŭsia z pracy. «Mianie nichto nie zvalniaŭ, ja sam zrazumieŭ, što doŭha mianie tut ciarpieć nie buduć praz aktyŭnaść», — kaža Aleś. Ciapier šukaje novuju pracu.

Da 2017 hoda Ablak nijak nie prymaŭ udzieł u hramadskaj aktyŭnaści Bresta i krainy, ale paśla zdarylisia «darmajedskija» pratesty, u jakich udzielničaŭ i małady masažyst. Jon ličyć, što heta stała pierałomnaj dla jaho kropkaj.

«Kali pačałasia historyja z akumulatarnym zavodam, to heta byŭ taki ŭzdym dla bieraściejcaŭ, jany abjadnalisia, pačali raźbiracca ŭ situacyi, zrazumieli, što niešta tut nie tak, treba havaryć z kiraŭnictvam zavoda, čynoŭnikami», — raskazvaje Ablak.

Pa jahonych słovach, samym žorstkim šturškom byli debaty, jakija adbyvalisia ŭ studzieni 2018 u Telmach pad Brestam. «Na bolšaść pytańniaŭ tam i haradskija ŭłady, i kiraŭnictva zavoda nie adkazali. My zrazumieli, što treba zmahacca», — kaža bieraściejec.

Pavialičyć

Paśla heta pačałasia kraŭdfandynhavaja kampanija. «Było šmat narodnych hrošaj, ludzi achviaroŭvali na kampaniju suprać akumulatarnaha zavoda». Tady ž pačaŭsia zbor podpisaŭ. Pryčym źbirali nie ŭ internecie, a na vulicy. Źbiraŭ i Aleś Ablak.

«Za hadzinu mahło raśpisacca pa 50 čałaviek. Kazali, što strašna, ale ŭsio adno, my vas padtrymlivajem, tamu raśpišamsia», — raskazvaje Aleś. Ahułam tady było sabrana 38 tysiač podpisaŭ bieraściejcaŭ. Usie jany byli nakiravanyja ŭ Administracyju prezidenta.

Aleś raskazvaje, što pieršapačatkova isnavała vialikaja hrupa ludziej, jakaja była pierakananaja, što nijakich pratestaŭ nie treba, maŭlaŭ, usio heta atrymajecca vyrašyć šlacham sudoŭ i zvarotaŭ da čynoŭnikaŭ. Naprykład, z takich byŭ Dziamjan Lepiasievič, jašče adzin ź lidaraŭ pratestu.

«Paśla jany zrazumieli, što nijakaha suda ŭ našaj krainie niama. Cikava nazirać za ich transfarmacyjaj, u ludziej nibyta raspluščylisia vočy. «Vy nas sami zrabili apazicyjanierami», — časta ciapier jany kažuć čynoŭnikam», — raskazvaje Aleś.

Kali stała jasna, što ŭłada nie pojdzie na sastupki, to byŭ abrany varyjant «karmleńnia hałuboŭ» na płoščy, jakija prapanavali błohiery Siarhiej Piatruchin i Alaksandr Kabanaŭ. Na pieršuju akcyju ŭ lutym 2018 hoda pryjšło 30 čałaviek.

U krasaviku taho samaha hoda ŭłady adziny raz dazvolili akcyju suprać akumulatarnaha zavoda. Prachodziła jana ŭ parku Voinaŭ internacyjanalistaŭ, na jaje sabrałasia kala 2000 čałaviek. Nazyvałasia akcyja «Bieraściejki suprać śvincu».

Paśla hetaha pratestoŭcy padavali 112 zajavak na praviadzieńnia padobnych akcyj, ale nivodnaja ź ich nie była zadavolenaja.

Alesia Ablaka dvojčy zatrymlivali za «karmleńnie hałuboŭ». Pieršy raz heta adbyłosia ŭ kastryčniku letaś. Jaho vyklikali ŭ milicyju ŭ niadzielu, tam zatrymali i noč pratrymali ŭ izalatary, a na zaŭtra aštrafavali na 10 bazavych vieličyń. Druhoje ž zatrymańnie adbyłosia 14 krasavika. Darečy, tam Ablak vykazaŭsia i adnosna kryžałomu ŭ Kurapatach.

Aleś Ablak pryncypova karystajecca biełaruskaj movaj. Kaža, što cikavaść da hetaha abudzili ŭsie tyja ž akcyi «darmajedaŭ». «Było niekalki siabroŭ, jakija natchnili i dapamahli», — kaža mužčyna.

Razmaŭlaŭ jon pa-biełarusku sa svaimi klijentami i ŭ paliklinicy. «Nivodnaha razu nie było praz heta niehatyŭnych incydentaŭ, ludzi reahavali vielmi pryjazna. Ja absalutna haradski chłopiec, ale chutka zmoh vyvučyć biełaruskuju», — kaža jon.

«Ja rady, što nadaŭ hetamu pratestu krychu biełaruskaha hučańnia», — kaža Aleś Ablak.

Niahladziačy na ŭsie pratesty, akumulatarny zavod, jaki znachodzicca za niekalki kiłamietraŭ ad Bresta, chutka pačnie pracavać. Zmahary z zavodam usio adno nie adčajvajucca. «Nie treba zdavacca. Moža, jak adkryjecca, tak i zakryjecca. Ja liču, što situacyju mohuć źmianić tolki pratesty», — kaža Aleś.

• 0
• 0
• 0
• 0
• 0
• 0
• 0
• 0