Raspracoŭščyk nacyjanalnaj sistemy videanazirańnia: U Biełaruś trapiŭ vypadkova. Zabaraniaju biełaruskuju movu ŭ čatach

Alaksandr Šatroŭ — stvaralnik IT-kampanii Synesis z centrami raspracoŭki ŭ Minsku i Maskvie. Jon zajmaje 52-je miesca ŭ rejtynhu samych upłyvovych i paśpiachovych biznesmienaŭ Biełarusi.

Pavialičyć

Samy važny pradukt jaho Synesis — sistema, jakaja dazvolić abjadnać tysiačy kamier videanazirańnia i datčykaŭ va ŭsioj Biełarusi ŭ adzinuju sietku. Prajekt realizujecca sumiesna ź Ministerstvam unutranych spraŭ.

Čytajcie: Šunievič abjadnaje tysiačy kamier videanazirańnia i datčykaŭ va ŭsioj krainie ŭ adzinuju sietku

Partał dev.by zrabiŭ hutarku z Šatrovym.

Žurnalistka vyciahnuła vonki pierakanańni biznesmiena, videa daje davoli jasnaje razumieńnie jahonaha partretu. 

Tak, Šatroŭ raskazaŭ, što sam jon z Rasii — baćki skončyli Baŭmanski ŭniviersitet, baćka pajšoŭ pracavać u KDB. 

U Biełaruś Šatroŭ trapiŭ vypadkova, kali ŭžo mieŭ biznes u Maskvie, bo «znajomy pračytaŭ, što jość taki horad — Minsk, tam jość prahramisty, tam ludzi značna tańniejšyja». 

Žurnalistka paprasiła jaho prakamientavać čutki, što va ŭnutranych čatach kampanii, jakaja pracuje ŭ Biełarusi, nibyta zabaroniena vykarystoŭvać biełaruskuju movu.

«U našych čatach zabaroniena vykarystoŭvać movy, jakija nie viedaje bolšaść ludziej. Nielha vykarystoŭvać ispanskuju, ukrainskuju, italjanskuju. Bolšaść ludziej vykarystoŭvajuć ruskuju i anhlijskuju. Kali vy chočacie ź ludźmi ŭzajemadziejničać, to pryniata vykarystoŭvać tyja movy, jakija razumiejuć usie, — adkazaŭ Šatroŭ. —

U nas było niekalki vypadkaŭ, kali narod padkreślena vykarystoŭvaŭ biełaruskuju, viedajučy ruskuju. Padkreślena! To bok, heta nie taja situacyja, kali čałaviek nie viedaje ruskaj. Jon viedaje, ale vykarystoŭvaje biełaruskuju. Ja kateharyčna suprać takich momantaŭ, bo jon stvaraje pieraškody dla ŭsich tych, chto hetaj movy nie viedaje. Tamu tut niama nijakaj teoryi zmovy». 

Žurnalistka taksama zhadała post Šatrova ŭ fejsbuku pra padziei 25 sakavika 2017 hoda, kali ŭ centr Minska vyvieli śpiecnaz i bronietechniku, kab nie dać ludziam sabracca na Dzień Voli. Heta byŭ hod, kali ludzi masava vychodzili na vulicy, kab vykazać niazhodu z pryniatym «padatkam na darmajedaŭ». 

«Było skuholeńnie na temu, što tut nijakaj demakratyi, voś Jeŭropa, Amieryka!.. Tam trava zielaniejšaja i ŭsio lepš. Ale kali niechta choča adstojvać hramadzianskuju pazicyju, treba rabić heta ŭ ramkach zakona. Ja nie kažu, što nie treba parušać zakon — vaša prava. Viedajecie, možacie rabić dvornikam i atrymlivać mała, a možacie narkotyki pradavać — zarablać šmat. Ale vy ŭśviedamlajecie, što kali vas zatrymajuć, vy atrymajecie hihancki termin. Budzie dziŭna, kali vy tady pačniecie kryčać, što kali ŭ Amierycy lehalizavali narkotyki, čamu dla vas tady tut takoje staŭleńnie? Vy sami ŭśviedamlajecie nastupstvy, a kali jany nastupajuć, to prymicie heta. Jany išli na demanstracyju, jakuju im nie sankcyjanavali, jany na što raźličvali?», — patłumačyŭ Šatroŭ. 

I taksama dadaŭ, što za dva hady svajoj pazicyi nie źmianiŭ. 

• 0
• 0
• 0
• 0
• 0
• 0
• 0
• 0