Ułady Lvova zakupili biełaruskija evakuatary, ale ciapier admaŭlajucca ad ich — tam znajšli rasijskija detali
Ukrainski Lvoŭ atrymaŭ try novyja evakuatary MAZ, jakija płanavałasia kupić na ŭmovach finansavaha lizinhu. Adnak paśla ahladu i testavaha vyprabavańnia adnaho z evakuataraŭ vyjavili šmatlikija zaŭvahi da jaho raboty. Kamisija skłała akt pravierki i viernie techniku pastaŭščyku, piša Zaxid.net.
Jak adznačyŭ Siarhiej Babak, namieśnik mera Lvova pa pytańniach biaśpieki horada, techniku dastavili ŭ Lvoŭ 23 lipienia. Paśla hetaha jaje testava vyprabavali na vulicach horada i praviali ahlad. Kamisija vyjaviła zaŭvahi da techničnych i narmatyŭnych charaktarystyk mašyn. Akramia taho, vyśvietliłasia, što asobnyja ahrehaty ruchavika i chadavoj častki vyrableny ŭ Rasii, choć raniej śćviardžałasia, što mašyny zrobleny vyklučna ź biełaruskich kamplektujučych.
Usie zaŭvahi adznačyli ŭ akcie pravierki, techniku adpraviać nazad pastaŭščyku.
«Bieručy pad uvahu techničnyja zaŭvahi i zakanadaŭčyja akty, jakija zabaraniajuć handal z krainaj-ahresaram, ličym niedapuščalnym vykarystańnie takoj techniki ŭ Lvovie. Takim čynam, my budziem patrabavać ad pastaŭščyka zamianić techniku, kab jana adpaviadała techničnym i ekspłuatacyjnym narmatyvam dla efiektyŭnaha jaje vykarystańnia na vulicach Lvova, albo viartańnia avansavaha płaciažu», — adznačyŭ Siarhiej Babak.
Kamientary