«Zboryšča vyb***aŭ». 19-hadovaja vychavalnica z Salihorska aburyła baćkoŭ fotam dziaciej u instahramie
U sieciva trapiŭ skrynšot pierapiski 19-hadovaj Karaliny Sanikovič, vychavalnicy adnaho ź dziciačych sadkoŭ Salihorska. U asabistaj pierapiscy dziaŭčyna zrabiła fotazdymak padčas cichaj hadziny i padpisała jaho: «Zboryšča vyb***aŭ».
Paśla taho, jak siabroŭka Karaliny vykłała pierapisku ŭ adnu z supołak Salihorska, pavodzinami dziaŭčyny aburylisia ledźvie nie ŭsie mamy i taty horada.
Dziaŭčynu litaralna zakidali paviedamleńniami. Karalina sprabavała adkazvać, što nasamreč jaje ŭzłamali, i jana takoha nie pisała.
«Naša Niva» źviazałasia z Karalinaj, kab pačuć, što ŭsio ž taki adbyłosia:
«A davajcie nie budziem razduvać šumichi. Užo ničoha nie papraviš. Adrazu paśla taho, jak u adździele adukacyi daviedalisia pra heta, mianie zvolnili pa artykule. A pracavała ja pa raźmierkavańni. Dy jašče pa metavym. Ciapier mnie treba vypłacić 15 tysiač rubloŭ», — skazała Karalina.
Dziaŭčyna praciahvaje: «I ja, ščyra kažučy, naohuł nie razumieju, što mnie zaraz rabić i jak žyć dalej. U sadku ja atrymlivała prykładna 350 rubloŭ u miesiac. I jak by tam chto ni dumaŭ i ni kazaŭ, mnie padabałasia pracavać ź dziećmi. I na dziaciej ja nikoli nie kryčała, nie złavała».
Načalnik Salihorskaha adździeła adukacyi: «Najlepšy kantralor za vychavacielami — dzieci i ich baćki»
Načalnik adździeła adukacyi Ihar Cybulka raskazaŭ «Naša Nivie», što pakul Karalina nie zvolnienaja.
«Stvoranaja kamisija, joj pravodzicca pravierka i rašeńnie ab zvalnieńni hetaj vychavacielki budzie pryniataje zaŭtra. Chutčej za ŭsio, Karalina budzie zvolniena pa artykule 47 pracoŭnaha kodeksu: «Amaralnyja pavodziny supracoŭnika». Niedachopu ŭ kadrach u Salihorskim rajonie niama, i na jaje miesca my voźmiem druhoha rabotnika. «Čornych śpisaŭ» u nas niama, tamu Karalina moža sprabavać uładkavacca ŭ inšuju ŭstanovu adukacyi. Paśla hetaj situacyi baćki prapanoŭvali ŭstalavać u sadkach kamiery videanazirańnia. My hetaha rabić nie budziem. Jany jość va ŭsich ustanovach, ale ŭ ich inšaja meta — nie sačyć za piedahohami. Najlepšy kantralor za pavodzinami piedahohaŭ — heta našy dzieci i ich baćki, — padsumavaŭ Ihar Cybulka.
Kamientary