Zialenski paćvierdziŭ uzhadnieńnie formuły Štajnmajera: «Nie budzie nijakaj kapitulacyi»
Prezident Ukrainy Uładzimir Zialenski zajaviŭ, što Ukraina paćvierdziła tekst formuły Štajnmajera, jakaja ŭvojdzie ŭ novy zakon ab statusie Danbasa, piša Ukrajinśka pravda.
Pavodle jaho słoŭ, formuła Štajnmajera budzie implemientavana ŭ novy zakon ab śpiecyjalnym statusie Danbasa, jaki budzie pryniaty ŭ suviazi z tym, što dziejańnie dziejučaha zakona zaviaršajecca 31 śniežnia 2019 hoda.
Pry hetym Zialenski adznačyŭ, što ŭ novym zakonie nie «piarojduć ni adnu čyrvonuju liniju» i «nie budzie nijakaj kapitulacyi».
«Formuła Štajnmajera — heta adzin-dva skazy… Časovy zakon pra śpiecyjalny paradak miascovaha samakiravańnia ŭ asobnych rajonach Danieckaj i Łuhanskaj abłaściej… pačynaje dziejničać na stałaj asnovie pry ŭmovie, kali tam adbuducca miascovyja vybary, praviedzienyja zhodna z Kanstytucyjaj Ukrainy i zakanadaŭstva Ukrainy, a taksama paśla publikacyi spravazdačy ABSIE, što vybary prajšli pa standartach ABSIE i mižnarodnych standartach demakratyčnych vybaraŭ», — rastłumačyŭ Zialenski.
Pavodle jaho słoŭ, heta aznačaje, što «nijakich vybaraŭ pad dułam kulamiotaŭ nie budzie i nie moža być».
Zialenski nahadaŭ, što isnujučy zakon pra śpiecyjalny status Danbasa dziejničaje da kanca 2019 hoda, jaho zamienić inšy zakon, jaki budzie raspracoŭvać Viarchoŭnaja Rada.
Kamientary