Jak mahnij upłyvaje na naš arhanizm i čamu važna nie dapuścić jaho deficytu
Ci zadumvalisia vy, što abmien rečyvaŭ u arhaniźmie zaležyć ad makraelemienta, jakoha ŭ našym arhaniźmie ŭtrymlivajecca ŭsiaho tolki adna stałovaja łyžka — 20 hramaŭ?
Havorka pra makraelemient mahnij.
Viktoryja Bołbat, doktar-endakrynołah i dyjetołah 5-j haradskoj kliničnaj palikliniki, raskazała hałoŭnaje, što treba viedać pra mahnij, dla čaho jon patrebny i adkul jaho brać.
«Bolš za ŭsio mahniju ŭ kaściach, zubach i samych «nahružanych» orhanach: ciahlicach, sercy, nyrkach, piečani, mazhach. Čym bolš vysokafunkcyjanalny orhan, tym bolš mahniju my tam znojdziem», — tłumačyć Viktoryja Bołbat.
Mahnij uvachodzić u skład vielizarnaj kolkaści fiermientaŭ, jakija ŭdzielničajuć u abmienie rečyvaŭ.
«Z hetaj pryčyny simptomy deficytu mahniju mohuć być vielmi roznymi: ad vypadzieńnia vałasoŭ i bolu ŭ žyvacie da depresii, halucynacyj i źnižeńnia libida. Ale čaściej za ŭsio na fonie deficytu mahniju my sutykajemsia z sutarhami i «muraškami» ŭ ciele. U stałych ludziej niedachop mahniju moža vyklikać pavyšeńnie cisku».
Treba adznačyć, što ciažarnyja žančyny, a taksama ludzi, jakija žyvuć u chraničnym stresie ci jakija złoŭžyvajuć ałkaholem, majuć usie šancy zajmieć deficyt mahniju ŭ arhaniźmie.
«Praciahły deficyt mahniju moža pryvieści da ŭźniknieńnia chvarob serca i sasudaŭ, branchitaŭ i branchijalnaj astmy, sindromu deficytu ŭvahi i hipieraktyŭnaści ŭ dziaciej. A voś lišak mahniju atrymać składaniej. Dla hetaha treba mieć, jak minimum, ciažkuju nyračnuju niedastatkovaść. U inšych vypadkach nyrki mohuć spravicca z mahnijem davoli apieratyŭna», — kaža doktar.
Kalcyj i mahnij — dva palicejskija ŭ našym arhaniźmie
Mahnij daloka nie adziny patrebny makraelemient u našym arhaniźmie. Najčaściej, zhadvajučy mahnij, my ŭspaminajem i kalcyj.
«Kab było prykładna zrazumieła, jak mahnij źviazany z kalcyjem, možna ŭjavić mietafaru «dobry i zły palicejski»: kalcyj «napružvaje», a mahnij «rassłablaje». I choć, zdajecca, jany zusim procilehłyja pa svaim dziejańni, mienavita ich bałans pryvodzić da narmalnaj rehulacyi raboty ciahlic, bićcia serca, aktyŭnaści niervovych impulsaŭ. I źviazvaje ich nie tolki heta: mahnij, jak i kalcyj, usmoktvajecca pry ŭdziele vitamina D. Abmien mahniju, jak i abmien kalcyju, rehulujuć maleniečkija, ale takija važnyja kalaščytapadobnyja załozy», — raskazvaje Viktoryja Bołbat.
Kab być upeŭnienymi, što vaš arhanizm pravilna pracuje i vam nie pahražaje deficyt mahniju, doktar-endakrynołah raić dadavać u svoj racyjon niekatoryja pradukty.
«Mahnij jość va ŭsich naturalnych praduktach, jak raślinnych, tak i žyviolnaha pachodžańnia. Asabliva šmat jaho ŭ arechach, siemačkach, marskim bahavińni i babovych», — kaža Viktoryja Bołbat.
Kali vy siabie dobra adčuvajecie, doktar nie raić prybiahać da roznych lekavych preparataŭ.
«Kali vy narmalna siabie adčuvajecie, nie abaviazkova prymać dadatkovyja preparaty z mahnijem. Kali ž vyjaŭleny deficyt mahniju, nieabchodna pierš za ŭsio znajści jaho pryčynu. Lačeńnie ŭ hetym vypadku budzie pryznačać doktar — lekavymi srodkami z dakazanaj efiektyŭnaściu ŭ dačynieńni da kankretnaj patałohii», — kaža doktar-endakrynołah.
Ciapier čytajuć
Lehiendarnaja žurnalistka Luboŭ Łuniova raskazała pra Viktara Łukašenku i adnakurśnikaŭ, stvareńnie «Viasny» i palityčny bamond8
Kamientary