«Što značyć — ci ŭmieju ja stralać?» Hutarka z majoram Kaciarynaj Alaksiejevaj, jakaja raptoŭna stała internet-zorkaj
Archiŭny materyjał za 2019 hod.
Čytajcie. Major Kaciaryna Alaksiejeva ździviła internet kolkaściu svaich miedaloŭ na paradzie FOTAFAKT
Efiektnaja błandzinka pierad vami nie instabłohierka, a major Minabarony. Kaciaryna Alaksiejeva słužyć staršym aficeram upraŭleńnia vieryfikacyi departamienta mižnarodnaha vajskovaha supracoŭnictva. Jana raskazała «Našaj Ninie», ci lohka dziaŭčatam trapić va Uzbrojenyja siły, čym biełaruski-vajennyja adroźnivajucca ad kaleh za miažoj, ci hatova jana pramianiać armiju na madelny biznes i jaki mužčyna moh by skaryć jaje serca.
«Konkurs na vajenny fakultet dla dziaŭčat — 33 čałavieki na miesca»
Kaciaryna vyrasła ŭ Klimavičach. Joj zaŭsiody dobra davalisia zamiežnyja movy — paśla 9 kłasa jana pajšła vučycca ŭ linhvistyčny licej, a ŭ 11-m vyjhrała respublikanskuju alimpijadu pa francuzskaj. Vybar, zdajecca, byŭ vidavočny: abo Linhvistyčny ŭniviersitet (tudy navat bieź ispytaŭ pryniali b), abo fakultet mižnarodnych adnosin Biełaruskaha dziaržaŭnaha ŭniviersiteta.
«Mnie zdavałasia, što hetyja śpiecyjalnaści abiacajuć mnie vialikuju budučyniu. Ale ja taki čałaviek, jaki ŭvieś čas kidaje sabie vykliki, i ja vyrašyła pastupać na vajenny fakultet. Ekzamieny tudy pravodziacca za miesiac da pačatku ŭstupnaj kampanii. Ja prachodziła try śpiecyjalnyja adbory: miedycynskaje abśledavańnie, maralna-psichałahičny test i fizkulturu.
Na 99 achvotnych dziaŭčat było ŭsiaho try miescy. Konkurs — 33 čałavieki na miesca! Mnie zdajecca, heta ličba vielmi pakazalnaja. Kali ja ŭvajšła ŭ trojku i mianie zaprasili jak kursanta na sustreču z dekanam fakulteta, ja zrazumieła, što pavinna štości zrabić dla radzimy, napeŭna, heta niejki znak. Kali ja pastupiła, prajšoŭšy taki adbor, vidać, ja dla hetaha stvoranaja».
Za miesiac da pryniacca prysiahi ŭ kursantaŭ pačynajecca kurs maładoha bajca — vučać stralać, chadzić strojem, vykonvać kamandy.
«Paturańniaŭ dla dziaŭčat nie było. I ŭ nas dziaŭčaty byli vielmi metanakiravanyja. Ja nie pamiataju vypadkaŭ, kab niechta płakaŭ, chacieŭ dadomu», — kaža Kaciaryna.
Padstroicca pad režym na vajennym fakultecie, uspaminaje jana, było vielmi składana. Padjom a siomaj ranicy, zaradka, pavierka… Užo na druhim kursie dziaŭčyna palubiła fizkulturu.
«Za čas kursanctva ja pachudzieła na 16 kiłahramaŭ. Nie toje, kab ja načami płakała i jeła kapustu. Prosta ja metanakiravana zaniałasia sportam, pačała pravilna charčavacca. Mnie chaciełasia, kab na mnie forma vyhladała vielmi pryhoža.
Da dziaŭčat u pahonach zapyt z boku hramadstva dvajny. Akramia taho, što ty pavinna zaŭsiody być ź ćviarozym rozumam i chałodnym sercam, ty musiš zastavacca dziaŭčynaj — dahledžanaj, z dobrym manikiuram, akuratnymi vałasami, adprasavanaj formaj».
Vajenny fakultet Kaciaryna skončyła z čyrvonym dypłomam. Daskanała viedaje try zamiežnyja movy — francuzskuju, ispanskuju i anhielskuju.
«U mianie niama nivodnaj vaśmiorki, i ja hetym vielmi hanarusia. Choć mnohija pytajuć: «Voś, a što daŭ tabie hety čyrvony dypłom?» A što jon pavinien dać? Čyrvony dypłom — heta status. Ludzi, jakija ŭ hetym niešta razumiejuć, aceńvajuć heta pazityŭna: atrymać čyrvony dypłom u mižnarodnych adnosinach vielmi składana».
«A stralać umiejecie?»
«Umieju — heta miakka kažučy, — uśmichajecca Kaciaryna. — Ja zdała na «piać» ahniavuju padrychtoŭku.
Dla ŭsich aficeraŭ Uzbrojenych sił dva razy na hod pravodziacca zaniatki pa ahniavoj padrychtoŭcy. Ty pavinien prademanstravać svajo ŭmieńnie vałodać roznymi vidami zbroi — pistaletam Makarava, aŭtamatam Kałašnikava. I treci narmatyŭ — kidańnie hranaty. Ja minuły raz usie try zdała na vydatna.
Mnohija maje znajomyja lubiać cir. Heta, kaniečnie, inšaje: jak zajmacca ŭ trenažornaj zale i biehčy paŭmarafon. Ja byvaju ŭ ciry. Ale stralba — mužčynskaja zabava. Ja bolš lublu hatavać, majstar-kłasy pa kulinaryi naviedvać».
«Ja była ŭ 30 krainach — našy dziaŭčaty-vajskoŭki vyhladajuć vielmi hodna»
U Ministerstva abarony Kaciaryna trapiła adrazu paśla zakančeńnia ŭniviersiteta. Spačatku zajmałasia infarmacyjna-analityčnaj pracaj (prahnazavała hramadskija tendencyi i palityčnyja źjavy), a čatyry hady tamu pierajšła va ŭpraŭleńnie kantrolu nad uzbrajeńniem.
«U adpaviednaści ź mižnarodnymi damovami my jak inśpiektary jeździm u jeŭrapiejskija krainy, kab praviarać, nakolki jany prytrymlivajucca ŭstanoŭlenych uzroŭniaŭ uzbrajeńnia. Robim heta źnianacku. Kirujemsia Vienskim dakumientam 2011 hoda i Dahavoram ab zvyčajnych uzbrojenych siłach u Jeŭropie. Taksama supravadžajem delehacyi, jakija pryjazdžajuć praviarać nas. Plus ja źjaŭlajusia pierakładčycaj dla našych vyšejšych słužbovych asob. Naprykład, u červieni jeździła z načalnikam hienieralnaha štaba ŭ Ńju-Jork na kanfierencyju AAN pa miratvorčaści», — apisvaje svaju rabotu Kaciaryna.
U kamandziroŭki dziaŭčyna časta lotaje ŭ Francyju, Hiermaniju, Italiju. Niekalki razoŭ jeździła vykładčycaj u škołu NATA.
«Ja była ŭ 30 krainach pa rodzie svajoj dziejnaści, dzie sustrakałasia z kalehami, u tym liku ź dziaŭčatami. Chaču skazać, što našy vyhladajuć vielmi hodna.
Za miažoj dziaŭčaty-vajskoŭki ŭ bolšaści vypadkaŭ nosiać karotkuju stryžku, krychu daŭžejšuju za chłapčukovuju. Takija rečy, jak makijaž, manikiur, parfium (navat u Francyi!), — vialikaja redkaść.
Jak na mianie reahujuć? Mahu takuju historyju raskazać. Ja była ŭ Francyi. Kali spuskalisia ź viertalota, francuzski vajskovasłužboviec mnie padaŭ ruku, a svajoj kalezie — nie. Dla mianie heta tak dziŭna było — spusk ź viertalota, pavyšanaja niebiaśpieka.
Pytajusia potym: a čamu? Jon: a ŭ nas dziaŭčaty ŭ armii — heta vajskovasłužboŭki, a nie žančyny. Takoje staŭleńnie. Ale ja liču, što jak ty siabie padaješ, tak ciabie i ŭsprymajuć».
«Taja sistema, u jakoj ja słužu, mnie vielmi padabajecca»
Va Uzbrojenych siłach słužyć 60 tysiač čałaviek. Žančyn ź ich — 4 tysiačy. Cikavimsia, jak pracujecca ŭ mužčynskim kalektyvie.
«Mnie padabajecca słužyć siarod mužčyn. Usie vielmi intelihientnyja, čułyja — i dźviery adčyniać, i ruku padaduć (heta, napeŭna, zakładziena ŭ biełaruskich mužčynach). Nas, dziaŭčat, mała, tamu jany nas lubiać, achoŭvajuć.
Pytańnie pra kamplimienty časta zadajuć maje hramadzianskija siabry. Jano mianie zaŭsiody stavić u stupar. Ja, naprykład, nie liču, što «ty pryhožaja» — heta kamplimient. Dla mianie ŭsie dziaŭčaty pryhožyja, u kožnaj niešta padabajecca.
Samy kłasny kamplimient, kali kažuć: «Słuchajcie, vy ćviaroza razvažajecie». Ci kali čałaviek tabie telefanuje i choča pa niejkich pytańniach paraicca.
U našu epochu pastajannych abvinavačańniaŭ — «voś, bolšaść dziaŭčat nie chočuć pracavać, chočuć dobra vyjści zamuž, spadziajucca na lohkaje žyćcio» — pačuć, što ty razumnaja, zaŭsiody ciešyć. Ja taki kamplimient zaŭvažaju i navat dzieści dla siabie staŭlu ptušačku».
30-hadovaja Kaciaryna ŭ svaim padraździaleńni samaja maładaja. Majoram jana stała dva hady tamu.
«Va Uzbrojenych siłach jość žančyny-pałkoŭniki — siarod miedykaŭ, naprykład. A voś hienierałaŭ-žančyn jašče niama».
«Chočacie stać?»
«Nu jaki sałdat nie maryć stać hienierałam? — adžartoŭvajecca dziaŭčyna. — Ja nie žyvu dumkami: voś, chutčej by piensija. Budu iści pa karjernaj leśvicy, nakolki budzie dazvalać maja adukacyja, čas.
Taja sistema, u jakoj ja słužu, mnie vielmi padabajecca. Ja liču jaje hodnaj.
Kožny raz, kali baču ŭ infarmacyjnaj prastory niehatyŭnyja naviny pra Uzbrojenyja siły, rastrojvajusia. Bo ŭ bolšaści vypadkaŭ rečy padajucca nie tym čynam».
«Kali była kursantkaj, mužčyny ličyli patrebnym padyści raskazać, dzie jany słužyli»
Svabodny čas major addaje sportu. Dźvie treniroŭki na tydzień — heta abaviazkova.
«Chadžu na roznyja zaniatki. U subotu była na fitnes-boksie — krutaja tema! Šmat pacieješ, i myšcy macujucca. U mianie niama mety pajści na konkurs fitnes-bikini. Meta — dobra vyhladać u kupalniku i vajskovaj formie. Pa sutnaści, kali my pryjazdžajem za miažu, pa nas miarkujuć, jak vyhladajuć usie Uzbrojenyja siły.
Dla vajskoŭcaŭ vydzielena try hadziny na tydzień u pracoŭny čas dla zaniatkaŭ sportam. Ja hetym časam zaŭsiody karystajusia. Ale potym z nas i pytajuć. Dva razy na hod my zdajom fizičnuju padrychtoŭku. Narmatyvy — bieh na 100 mietraŭ, na kiłamietr i pres. Ja, darečy, taksama ŭsio zdała na «piaciorku».
U mianie jość znajomyja, jakija zajmajucca tolki johaj. Heta nie majo.
Ja liču, što treniroŭka, na jakoj ty nie ŭspacieŭ, — heta prosta marnavańnie času. Mnie padychodziać aktyŭnyja vidy sportu: padabajucca stepy, tajbo, zaniatki, dzie trenier ažno ravie «vyšej, vyšej!».
Bieh lublu. Ja pačynała z taho, što ŭviečary, kali ciamnieła, nadziavała spartyŭny kaścium i biehała ŭ siabie na rajonie».
Siarod Kacinych siabrovak šmat fotamadelaŭ. Adna navat doŭhi čas była tvaram «Miłavicy».
«Mnie takich prapanoŭ nie pastupała, — adkazvaje major. — I navat kali pastupić, naŭrad ci pahadžusia. Ja liču, kožny pavinien zajmacca svajoj spravaj. Doktar — lačyć, vajskoviec zajmacca nacyjanalnaj biaśpiekaj, a madel — zdymacca».
«U mianie jość try vidy formy. Paŭsiadzionnaja (u jakoj ja ciapier), paradnaja (ź miedalami, aksielbantam, biełaj kašulaj) i bajavaja (ci palavaja, u joj my supravadžajem zamiežnyja inśpiekcyi ŭ vojenskija čaści). Ja formu zaŭsiody ŭšyvaju pad siabie».
U razmovie Kaciaryna nie raz padkreślivaje, što jana pierfiekcyjanistka. I da mužčyn u jaje taksama vysokija patrabavańni.
«Moj vobraz idealnaha mužčyny składajecca z sukupnaści tych jakaściaŭ, jakija ja baču ŭ mužčynach, što mianie atačajuć. U cełym ja, peŭna, vyjdu zamuž za čałavieka razumnaha — prosta z durnym mnie budzie niecikava.
Vierahodna, heta budzie mužčyna, ź jakim ja najdu supolnyja intaresy ŭ vyhladzie sportu. Sport peŭnuju samadyscyplinu daje, niervy razhružaje».
«Abaviazkova, kab mužčyna byŭ vajskoŭcam?»
«Nie. Ja ludziej nie dzialu na vajskovych i cyvilnych».
Dziaŭčyna ŭśmichajecca: kali jana idzie pa vulicy ŭ formie, ź joj pastajanna znajomiacca.
«Jašče kali była kursantkaj, mužčyny ličyli patrebnym padyści da mianie i raskazać, dzie jany słužyli. Robiać kamplimienty vielmi časta — navat u zatory, na zapraŭcy.
A kali nie ŭ formie… Ja asabliva nie afišuju: o, vitaju, ja Kacia, ja vajskoŭka. Ale ŭ bolšaści vypadkaŭ ździŭlajucca, kali daviedvajucca, kim pracuju. Bo ŭ nas jość stereatyp, što armija — nie dla žančyn. A heta zusim nie adpaviadaje rečaisnaści. U bolšaści vypadkaŭ žančyny-vajskoŭki — heta dobryja miedyki, jurystki, pierakładčycy, psichołahi. Voś tut ja hatova dać adpor tym, chto skaža, što armija — nie žanočaja sprava».
Ciapier čytajuć
Halina Dzierbyš kazała prakuroru: «Jak pamru, budu da ŭsich vas nočču prychodzić». I žyćcio ŭžo dahnała jaje sudździu i śviedak. Historyja piensijanierki, jakoj dali 20 hadoŭ kałonii9
Kamientary