Telekanał ANT rezka raskrytykavaŭ słovy premjer-ministra Rasii Dźmitryja Miadźviedzieva. Nahadajem, toj u paniadziełak zajaviŭ, što jamu dziŭna čuć vykazvańni Łukašenki pra toje, što Biełaruś uciahvali ŭ roznyja vojny.
«My ni ŭ jakim razie nie pavinny kidać choć niejki cień na podźvih našych prodkaŭ, jakija abaraniali svaju ziamlu. Jany žyli na terytoryi sučasnaj Rasii abo Biełarusi, ale abaraniali svaju ziamlu ad zachopnikaŭ», — skazaŭ Miadźviedzieŭ. «Našy baćki i dziady abaraniali svaju ziamlu. Heta nie ŭdzieł u čužych vojnach. Tamu dla mianie vielmi dziŭna čuć takija słovy», — dadaŭ premjer-ministr Rasii.
Miadźviedzievu rezka adkazała pres-sakratar Alaksandra Łukašenki Natalla Ejsmant.
A ŭčora ANT pryśviaciła temie ceły siužet.
«Dźmitryj Miadźviedzieŭ ździviŭsia, što biełarusam nie vielmi padabajecca być raźmiennaj manietaj — prykładna tak koratka možna apisać reakcyju staršyni rasijskaha ŭrada na intervju Alaksandra Łukašenki kazachstanskim žurnalistam. Prezident Biełarusi, tłumačačy ciapierašniuju miratvorčuju pazicyju krainy, skazaŭ pra toje, što ŭsie vojny, jakija prakacilisia tudy i nazad pa Biełarusi, byli nie našymi. Łahična, bo my ich nie pačynali. Napaleon — usio razrabavana i źniščana. Pieršaja suśvietnaja vajna, Druhaja suśvietnaja vajna abo Vialikaja Ajčynnaja vajna - Biełaruś ścierli z tvaru ziamli», — kaža viadučy ANT.
«Dyk voś, čužyja vojny i podźvih prodkaŭ — heta, jak kažuć u viadomym horadzie, dzie Dźmitryj Anatoljevič naŭrad ci kaliści pabyvaje, dźvie vialikija roźnicy», — padjałdyknuŭ jon.
Dalej viadučy prachodzicca pa ŭsich troch vojnach:
«Napaleon pajšoŭ na Uschod ŭžo paśla taho, jak rasijskaja armija niaŭdała schadziła na Zachad pad Aŭsterlicam. Da taho ž, kali vieryć padručnikam historyi, Rasija pieršaj parušyła padpisany z Francyjaj Tylzicki mir. A biełarusy na svajoj ziamli stali zakładnikami čužych vajennych ambicyj.
Pieršuju suśvietnuju vajnu biełarusy taksama nie raźviazvali. Niemcy siudy pryjšli paśla taho, jak rasijski car Mikałaj II abviaściŭ mabilizacyju, što tady było roŭnaje dla Bierlina abviaščeńniem vajny. Znoŭ Zachad i Uschod rvali hetuju ziamlu na častki.
A voś ciapier pra Vialikuju Ajčynnuju… Kali b nie biełaruski žyvy ščyt taŭščynioj u 700 kiłamietraŭ, niamieckija tanki byli b pad Maskvoj jašče da taho, jak pažaŭcieła liście. My zapłacili za pieramohu ŭ vajnie, jakuju nie pačynali, kožnym trecim žycharom».
«Jašče bolš dziŭnym dla rasijskaha premjera pavinna vyhladać toje, što paśla stolkich projdzienych razam vyprabavańniaŭ našy krainy zahraźli ŭ biaskoncych pieramovach pa nafcie, hazie i navat praduktach charčavańnia. Čarhovaja padstava ŭkusić biełarusaŭ, pakul amierykancy prahravajuć svaje tanki?
Kali niechta ŭ postsaviecki pieryjad i adchryščvaŭsia ad čahości, to rabiłasia heta nie ŭ Biełarusi, a ŭ samoj Rasii.
Sapraŭdy, heta nie my mianiali nazvy haradoŭ i nakidvali stalovyja zaviesy na hałovy pomnikaŭ. Nie my zamianili milicyju palicyjaj. Prosta być palicajem u Biełarusi da hetaha času… nie vielmi prestyžna.
Pra toje, jak biełarusy ŭšanoŭvajuć svaich hierojaŭ, tysiačy rasijskich turystaŭ vydatna bačać kožnaje 9 Maja. Nivodny z tysiač pomnikaŭ ci brackich mahił na biełaruskaj ziamli nie zakinuty. My navat za mohiłkami ź Pieršaj suśvietnaj vajny hladzim.
«I pakul sioj-toj lepić na svaje mašyny nalepki «Možam paŭtaryć», biełarusy rekanstrujujuć adzin z svaich hałoŭnych simvałaŭ — płošču z manumientam Pieramohi. Kab navat našy praŭnuki nie zabyvali canu, jakuju pryjšłosia zapłacić, i rabili ŭsio, kab strašnaja vajna nie paŭtaryłasia, — stroha padkreślivaje viadučy ANT i reziumuje: — Tema sumnieńniaŭ u śviataści Vialikaj Pieramohi dla biełarusaŭ začyniena i ŭ dapaŭnieńniach nie maje patreby».
Ciapier čytajuć
Natalla Piatkievič stała vice-premjeram, a Karanik uznačaliŭ Akademiju navuk12
Natalla Piatkievič stała vice-premjeram, a Karanik uznačaliŭ Akademiju navuk
«Siomaja DNK-ekśpiertyza paćvierdziła: Alaksiej ź biełaruskaj vioski Rymucieŭcy — baćka Chansa». Jak narviežac znajšoŭ baćku-biełarusa praz 78 hadoŭ55
Kamientary